ಕನ್ನಡದ ಜನಪ್ರಿಯ ಕಾರ್ಯಕ್ರಮ 'ಬಿಗ್ ಬಾಸ್' ಎರಡನೇ ವಾರಾಂತ್ಯ ತಲುಪಿದೆ. ವಾರದ ಕಥೆ ಕಿಚ್ಚನ ಜೊತೆ ಅಥವಾ ವೀಕೆಂಡ್ ಎಪಿಸೋಡ್ ವೀಕ್ಷಿಸಲು ಹೆಚ್ಚಿನ ಸಂಖ್ಯೆಯ ಪ್ರೇಕ್ಷಕರು ಕಾತರರಾಗಿರುತ್ತಾರೆ. ಇಂದು ರಾತ್ರಿ ವೀಕೆಂಡ್ ಎಪಿಸೋಡ್ ಪ್ರಸಾರ ಆಗಲಿದ್ದು, ಮನೆಯಿಂದ ಒಬ್ಬರು ಹೊರ ನಡೆಯಲಿದ್ದಾರೆ.
ವಾರದ ಕಥೆ ಕಿಚ್ಚನ ಜೊತೆ: ಬಹುನಿರೀಕ್ಷಿತ ವಾರದ ಕಥೆ ಕಿಚ್ಚನ ಜೊತೆ ಎಪಿಸೋಡ್ನ ಪ್ರೋಮೋ ರಿಲೀಸ್ ಆಗಿದೆ. ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ಗಳಲ್ಲಿಯೂ ಕಲರ್ಸ್ ಕನ್ನಡ ವಾಹಿನಿ ಇಂದಿನ ಪ್ರೋಮೋ ಶೇರ್ ಮಾಡಿದ್ದು, ಪ್ರೇಕ್ಷಕರ ಕುತೂಹಲ ಕೆರಳಿಸಿದೆ. ''ಗರಂ ಆದ್ರು ಕಿಚ್ಚ (ಫೈಯರ್ ಎಮೋಜಿಯೊಂದಿಗೆ), ಓಪನ್ ಆಯ್ತು ಮುಖ್ಯದ್ವಾರ! ವಾರದ ಕಥೆ ಕಿಚ್ಚನ ಜೊತೆ'' ಎಂಬ ಶೀರ್ಷಿಕೆ ಕೊಟ್ಟು ಶೇರ್ ಮಾಡಿರುವ ಪ್ರೋಮೋದಲ್ಲಿ, ನಿರೂಪಕ - ನಟ ಅಭಿನಯ ಚಕ್ರವರ್ತಿ ಸುದೀಪ್ ಅಸಮಾಧಾನಗೊಂಡಿರುವುದನ್ನು ಕಾಣಬಹುದು.
ಬಿಗ್ ಬಾಸ್ ಪ್ರೋಮೋ:ಪ್ರೋಮೋದಲ್ಲಿ, ಸುದೀಪ್ ಸಖತ್ ಸ್ಟೈಲಿಶ್ ಆಗಿ ವೇದಿಕೆಗೆ ಎಂಟ್ರಿ ಕೊಡುತ್ತಾರೆ. ಮನೆಯ ಸ್ಪರ್ಧಿಗಳೊಂದಿಗೆ ಮಾತು ಆರಂಭಿಸುತ್ತಾರೆ. ವಿನಯ್ ಹಾಗೂ ಕಾರ್ತಿಕ್ ಅವರನ್ನು ಬಿಟ್ಟು ಉಳಿದವರು ಸೋಫಾ ಹಿಂದೆ ಹೋಗಿ ನಿಲ್ಲಿ ಎಂದ ಸುದೀಪ್, ಕಂಟೆಸ್ಟೆಂಟ್ ಬಳಿ ಪ್ರಶ್ನೆಗಳನ್ನು ಕೇಳುತ್ತಾರೆ. ಎರಡು ಟೀಮ್ ಲೀಡರ್ ಚೂಸ್ ಮಾಡಿ ಅಂತಾರೆ, ಆಯ್ಕೆಗೆ ಯಾರೂ ಕೂಡ 20 ಸೆಕೆಂಡ್ಸ್ ಕೂಡ ತೆಗೆದುಕೊಳ್ಳಲಿಲ್ಲ. ನಾನ್ಯಾಕೆ ಕ್ಯಾಪ್ಟನ್ ಆಗಬಾರದು ಎಂದು ಯಾರಿಗೂ ಬರ್ಲಿಲ್ವಾ? ಎಂಬ ಸುದೀಪ್ ಪ್ರಶ್ನೆಗೆ ಸ್ಪರ್ಧಿಗಳು ನಾನಾ ಕಾರಣಗಳನ್ನು ಕೊಡುತ್ತಾರೆ.
ಗೇಟ್ ಓಪನ್ ಪ್ಲೀಸ್....ಈ ರೀತಿಯ ಭಯ ಇರುವವರು ಮನೆ ಒಳಗಡೆ ಯಾಕಿದ್ದೀರಾ? ಎಂದು ಸುದೀಪ್ ಮರು ಪ್ರಶ್ನಿಸುತ್ತಾರೆ. 'ನಾನು ನೋಡಿದ್ದು ನನಗೆ ಇಷ್ಟ ಆಗಿಲ್ಲ' ಎಂದು ಕಿಚ್ಚ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ನೀವು ಹೀಗೆ ಇರ್ತೀರಾ ಅಂದ್ರೆ ನಾನು ಈ ಕೂಡಲೇ ಬಾಗಿಲು ತೆರೆಯುತ್ತೇನೆ. ಖಂಡಿತ ಇರಬೇಡಿ. ಗೇಟ್ ಓಪನ್ ಪ್ಲೀಸ್ ಎಂದು ಸುದೀಪ್ ಹೇಳಿದ ಕೂಡಲೇ ಬಿಗ್ ಬಾಸ್ ಮನೆಯ ಮುಖ್ಯದ್ವಾರ ತೆರೆದಿದೆ. ಈ ಪ್ರೋಮೋ ಪ್ರೇಕ್ಷಕರಲ್ಲಿ ಸಾಕಷ್ಟು ಕುತೂಹಲ ಮೂಡಿಸಿದೆ. ಏನಾಗಬಹುದೆಂದು ಅಭಿಮಾನಿಗಳು ಕುತೂಹಲ ವ್ಯಕ್ತಪಡಿಸಿದ್ದಾರೆ.