ಕನ್ನಡದ ಜನಪ್ರಿಯ ರಿಯಾಲಿಟಿ ಕಾರ್ಯಕ್ರಮ 'ಬಿಗ್ ಬಾಸ್ ಸೀಸನ್ 10' ಕುತೂಹಲಕಾರಿ ಸನ್ನಿವೇಶಗಳೊಂದಿಗೆ ಮುಂದುವರಿಯುತ್ತಿದೆ. ಈ ವಾರದ ಎಲ್ಲಾ ಟಾಸ್ಕ್‌ಗಳಲ್ಲಿಯೂ 'ಮಣ್ಣಿನ ಮಕ್ಕಳು' ತಂಡ ಸೋತಿದೆ. ಈ ತಂಡದ ನಾಯಕತ್ವ ವಹಿಸಿದ್ದ ಡ್ರೋಣ್ ಪ್ರತಾಪ್ ಜೈಲುಪಾಲಾಗಿದ್ದಾರೆ. ಕಳಪೆ ನಾಯಕತ್ವದ ಪರಿಣಾಮವಾಗಿ ಜೈಲುಡುಗೆ ತೊಟ್ಟ ಪ್ರತಾಪ್ ಅವರ ದೃಶ್ಯವನ್ನು ಜಿಯೋಸಿನಿಮಾ ಬಿಡುಗಡೆ ಮಾಡಿರುವ ಪ್ರೋಮೋದಲ್ಲಿ ನೋಡಬಹುದು.
ಬಿಗ್ ಬಾಸ್ ಪ್ರೋಮೋ: ''ಈ ವಾರದ ಕಳಪೆ ಪ್ರತಾಪ್!'' ಶೀರ್ಷಿಕೆಯಡಿ ಕಲರ್ಸ್ ಕನ್ನಡ ಸೋಷಿಯಲ್ ಮೀಡಿಯಾಗಳಲ್ಲಿ ಇಂದಿನ ಸಂಚಿಕೆಯ ಪ್ರೋಮೋ ಅನಾವರಣಗೊಳಿಸಿದೆ. ವಾರದ ಕೊನೆಗೆ ಕಳಪೆ ಯಾರು? ಉತ್ತಮ ಯಾರು? ಎಂಬುದನ್ನು ಆರಿಸುವ ಸಂದರ್ಭದಲ್ಲಿ ಎರಡೂ ತಂಡದ ಬಹುತೇಕ ಸದಸ್ಯರು ಪ್ರತಾಪ್ ಅವರ ಹೆಸರನ್ನೇ ಸೂಚಿಸಿದ್ದಾರೆ.
ಮನೆ ಮಂದಿ ಕೊಟ್ಟ ಕಾರಣಗಳಿವು..:ಪ್ರತಾಪ್ ಹೆಸರು ಸೂಚಿಸಿರುವ ಮನೆಯ ಸದಸ್ಯರು ತಮ್ಮ ಕಾರಣಗಳನ್ನೂ ಎದುರಿಟ್ಟಿದ್ದಾರೆ. "ನನ್ನನ್ನು ಕ್ಯಾಪ್ಟನ್ಸಿ ಟಾಸ್ಕ್‌ನಿಂದ ಹೊರಗಿಟ್ಟಿದ್ದು ಬೇಜಾರಾಯ್ತು" ಎಂದು ನಮ್ರತಾ ಕಾರಣ ಕೊಟ್ಟರೆ, "ಕಾರ್ತಿಕ್ ಅವರಂಥ ಆಟಗಾರನನ್ನು ಹೊರಗಿಟ್ಟಿದ್ದರಿಂದ ತಂಡ ವಾರದ ಎಲ್ಲಾ ಟಾಸ್ಕ್‌ಗಳಲ್ಲಿಯೂ ಸೋಲುವಂತಾಯ್ತು" ಎಂದು ವಿನಯ್ ಹೇಳಿದರು. "ಎಲ್ಲೋ ಒಂದು ಕಡೆ ಕೋಪದಿಂದ ಮಾತಾಡ್ತಾರೆ ಎಂದು ಈ ವಾರವೂ ಅಗ್ರೆಶನ್‌ನಲ್ಲಿಯೇ ಆಡ್ತಾರೆ ಅಂದುಕೊಳ್ಳುವುದು ಸರಿಯಲ್ಲ" ಎಂದು ತನಿಷಾ ತಿಳಿಸಿದರು. ವರ್ತೂರು ಸಂತೋಷ್ ಮತ್ತು ಸ್ನೇಹಿತ್‌ ಸಹ ಪ್ರತಾಪ್ ಹೆಸರನ್ನೇ ಹೇಳಿದರು.