ಕನ್ನಡದ ಜನಪ್ರಿಯ ರಿಯಾಲಿಟಿ ಶೋಗಳಲ್ಲಿ 'ಬಿಗ್ ಬಾಸ್' ಕೂಡ ಒಂದು. ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಡೆಸಿಕೊಡುವ ಈ ಕಾರ್ಯಕ್ರಮಕ್ಕೆ ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳಿದ್ದಾರೆ. ಈವರೆಗೆ ಒಂಬತ್ತು ಸೀಸನ್ಗಳನ್ನು ಯಶಸ್ವಿಯಾಗಿ ಮುಗಿಸಿರುವ ಬಿಗ್ ಬಾಸ್ ಇದೀಗ ಮತ್ತೆ ಬಂದಿದೆ. ಬಿಗ್ ಬಾಸ್ 10ನೇ ಸೀಸನ್ ಅಕ್ಟೋಬರ್ 8ರಂದು ಸಂಜೆ 6ಕ್ಕೆ ಗ್ರ್ಯಾಂಡ್ ಲಾಂಚ್ ಆಗಲಿದೆ. ಈ ಹಿಂದಿನ ಎಲ್ಲಾ ಸೀಸನ್ಗಿಂತ ಈ ಬಾರಿಯ ಬಿಗ್ ಬಾಸ್ ಸ್ಪೆಷಲ್ ಆಗಿರಲಿದೆ.
4 ತಿಂಗಳಲ್ಲಿ ಹೊಸ ಮನೆ ನಿರ್ಮಾಣ:ಬಿಗ್ ಬಾಸ್ ಸೀಸನ್ 10 ಮಾತ್ರ ಸ್ಪೆಷಲ್ ಅಲ್ಲ, ಸ್ಪೆಷಲ್ ಸೀಸನ್ಗೆ ಮನೆಯೂ ಸ್ಪೆಷಲ್ ಆಗಿರಲಿದೆ. ಕೇವಲ 4 ತಿಂಗಳಲ್ಲಿ ನೂರಾರು ಕಾರ್ಮಿಕರ ಎಡಬಿಡದ ಪರಿಶ್ರಮದಿಂದ 12 ಸಾವಿರ ಚದರ ಅಡಿಯಲ್ಲಿ ಅರಮನೆಯೊಂದು ತಲೆ ಎತ್ತಿ ನಿಂತಿದೆ. ಮನೆ ನಿರ್ಮಾಣದ ವಿಡಿಯೋವನ್ನು ಕಲರ್ಸ್ ಕನ್ನಡ ವಾಹಿನಿ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದೆ. "ಕತ್ತಲು ಬೆಳಕಿನ ಅಂತ್ಯವಲ್ಲ, ಅದು ಬೆಳಕಿನ ಆರಂಭ" ಎಂಬ ಮಾತಿನೊಂದಿಗೆ ವಿಡಿಯೋ ಪ್ರಾರಂಭಗೊಳ್ಳುತ್ತದೆ.
"ಹತ್ತನೇ ಸೀಸನ್ ಮಾತ್ರ ಸ್ಪೆಷಲ್ ಅಲ್ಲ, ಈ ಬಾರಿಯ ಮನೆಯೂ ಅಷ್ಟೇ ಸ್ಪೆಷಲ್. ನೂರಾರು ಕಾರ್ಮಿಕರ ಹಗಲು ರಾತ್ರಿಯೆನ್ನದ ನಾಲ್ಕು ತಿಂಗಳ ಈ ಎಡಬಿಡದ ಶ್ರಮ ಈ ಸುಂದರ ಮನೆಯ ಹಿಂದಿದೆ. ಖಾಲಿ ನೆಲದ ಮೇಲೆ ಭವ್ಯ ಮನೆಯೊಂದನ್ನು ನಿರ್ಮಿಸಲು ಪಟ್ಟ ಸಾಹಸವೆಷ್ಟೋ, ಸುರಿಸಿದ ಬೆವರೆಷ್ಟೋ. ಇಷ್ಟೆಲ್ಲಾ ತಯಾರಾಗಿರುವ ಈ ಮನೆಯಲ್ಲಿ ನಡೆಯುವುದು ನೂರು ದಿನಗಳ ಹಬ್ಬ" ಎಂಬ ಹಿನ್ನೆಲೆ ಧ್ವನಿಯೊಂದಿಗೆ ವಿಡಿಯೋ ಮೂಡಿಬಂದಿದೆ. ಬರಡು ನೆಲದಲ್ಲಿ ನಿರ್ಮಾಣಗೊಂಡ ದೊಡ್ಮನೆ ಅದ್ಭುತವಾಗಿದೆ.