ಖ್ಯಾತ ನಿರ್ದೇಶಕ, ನಟ ಹಾಗೂ ಸ್ಟಾರ್ ಕೊರಿಯೋಗ್ರಾಫರ್ ರಾಘವ ಲಾರೆನ್ಸ್ ಮತ್ತು ಬಾಲಿವುಡ್ ನಟಿ ಕಂಗನಾ ರಣಾವತ್ ನಟನೆಯ ಬಹುನಿರೀಕ್ಷಿತ ಚಿತ್ರ 'ಚಂದ್ರಮುಖಿ 2'. ಈ ಸಿನಿಮಾದ ಬಿಡುಗಡೆ ದಿನಾಂಕವನ್ನು ಸೆಪ್ಟಂಬರ್ 28ಕ್ಕೆ ಮುಂದೂಡಲಾಗಿದೆ ಎಂದು ತಯಾರಕರು ಶುಕ್ರವಾರ ಘೋಷಿಸಿದ್ದಾರೆ. ಹಿರಿಯ ನಿರ್ದೇಶಕ ಪಿ. ವಾಸು ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಈ ಹಾರರ್ ಕಾಮಿಡಿ ಸಿನಿಮಾವನ್ನು ಸೆಪ್ಟಂಬರ್ 19 ರಂದು ಬಿಡುಗಡೆಗೊಳಿಸಲು ನಿರ್ಧರಿಸಲಾಗಿತ್ತು. ಆದರೆ ಇದೀಗ 'ಚಂದ್ರಮುಖಿ 2' ಈ ತಿಂಗಳ ಕೊನೆಯಲ್ಲಿ ತೆರೆ ಕಾಣಲಿದೆ.
ನಿರ್ಮಾಪಕರು ಹೇಳುವಂತೆ, 'ಚಂದ್ರಮುಖಿ 2' ಚಿತ್ರದ ದೃಶ್ಯವನ್ನು ಜನರಿಗೆ ಹೆಚ್ಚು ಪರಿಣಾಮಕಾರಿಯಾಗಿ ತೋರಿಸಲು ನಿರ್ಮಾಣ ತಂಡಕ್ಕೆ ಇನ್ನೂ ಸಮಯದ ಅಗತ್ಯತೆ ಇದೆ. ಪ್ರೇಕ್ಷಕರಿಗೆ ಉತ್ತಮ ಗುಣಮಟ್ಟದ ಸಿನಿಮೀಯ ಅನುಭವಕ್ಕಾಗಿ ಚಿತ್ರತಂಡ ಶ್ರಮಿಸುತ್ತಿದೆ. ಈ ಕಾರಣದಿಂದ ಚಿತ್ರದ ಬಿಡುಗಡೆಯನ್ನು ವಿಳಂಬಗೊಳಿಸಲು ನಿರ್ಮಾಪಕರು ನಿರ್ಧರಿಸಿದ್ದಾರೆ. ಸಿನಿ ಪ್ರೇಮಿಗಳು ಮತ್ತೊಂದಿಷ್ಟು ಹೊಸತನವನ್ನು ಬಯಸುತ್ತಿರುವ ಕಾರಣದಿಂದಾಗಿ ಇಂತಹ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ.
ಚಂದ್ರಮುಖಿ 2 ರಿಲೀಸ್ ಡೇಟ್ ಮುಂದೂಡಲಿದೆ ಎಂಬ ಊಹಾಪೋಹಗಳು ಈ ಮೊದಲು ಕೇಳಿಬಂದಿದ್ದವು. ಇದೀಗ ತಯಾರಕರು ಶುಕ್ರವಾರ ಸಂಜೆ ಖಚಿತಪಡಿಸಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ಮಾಹಿತಿ ಹಂಚಿಕೊಂಡಿರುವ ಲೈಕಾ ಪ್ರೊಡಕ್ಷನ್ಸ್, "ತಾಂತ್ರಿಕ ವಿಳಂಬದಿಂದಾಗಿ ಚಂದ್ರಮುಖಿ 2 ಬಿಡುಗಡೆ ದಿನಾಂಕವನ್ನು ಸೆಪ್ಟಂಬರ್ 28ಕ್ಕೆ ಮುಂದೂಡಲಾಗಿದೆ. ವೆಟ್ಟೈಯನ್ ಮತ್ತು ಚಂದ್ರಮುಖಿ ಮತ್ತಷ್ಟು ಮನರಂಜನೆಯೊಂದಿಗೆ ಹಿಂತಿರುಗಲಿದ್ದಾರೆ. ಹೆಚ್ಚುವರಿ ವಿಶೇಷತೆಯೊಂದಿಗೆ ಥಿಯೇಟರ್ಗಳಲ್ಲಿ ನಿಮ್ಮನ್ನು ಭೇಟಿ ಮಾಡುತ್ತೇವೆ" ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ:Chandramukhi 2 trailer: ಸ್ಟೈಲಿಶ್ ಸೀರೆಯುಟ್ಟು ಮನಮೋಹಕ ನೋಟ ಬೀರಿದ 'ಚಂದ್ರಮುಖಿ' ತಾರೆ ಕಂಗನಾ ರಣಾವತ್