ಸಿನಿಮಾ ಜೊತೆ ಜೊತೆಗೆ ಸದಾ ಒಂದಿಲ್ಲೊಂದು ಹೇಳಿಕೆ ಮೂಲಕ ಹೆಚ್ಚು ಸುದ್ದಿಯಲ್ಲಿರುವ ಬಾಲಿವುಡ್ ನಟಿ ಕಂಗನಾ ರಣಾವತ್ ಅವರು ಇದೀಗ ಚಿತ್ರ ನಿರ್ಮಾಪಕ ಕರಣ್ ಜೋಹರ್ ಅವರನ್ನು ಗುರಿಯಾಗಿಸಿಕೊಂಡು ಆರೋಪಗಳ ಸುರಿಮಳೆ ಸುರಿಸಿದ್ದಾರೆ. ಮಂಗಳವಾರ ಚಿತ್ರ ಸಾಮಾಜಿಕ ಜಾಲತಾಣದಲ್ಲಿ ನಿರ್ಮಾಪಕ ಕರಣ್ ಜೋಹರ್ ವಿರುದ್ಧ ಆರೋಪ ಮಾಡಿದ್ದು, ನಟಿ ಪ್ರಿಯಾಂಕಾ ಚೋಪ್ರಾ ಅವರನ್ನು "ಬ್ಯಾನ್ ಮಾಡಲಾಗಿದೆ" ಎಂದು ಹೇಳಿದ್ದಾರೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ ಜಾಗತಿಕ ತಾರೆ ಪ್ರಿಯಾಂಕಾ ಚೋಪ್ರಾ, ಹಿಂದಿ ಚಲನಚಿತ್ರೋದ್ಯಮದಿಂದ ವಿರಾಮ ತೆಗೆದುಕೊಂಡ ಬಗ್ಗೆ ಕಾರಣ ಬಹಿರಂಗಪಡಿಸಿದ್ದರು. ನನ್ನನ್ನು ಮೂಲೆಗೆ ತಳ್ಳಲು ಯತ್ನಿಸಿದ್ದರು, ಸಿನಿಮಾ ರಂಗದ ರಾಜಕೀಯ ಹಿನ್ನೆಲೆ ಬೇಸತ್ತು ಕೊಂಚ ವಿರಾಮ ತೆಗೆದುಕೊಳ್ಳಲು ನಿರ್ಧರಿಸಿದ್ದಾಗಿ ತಿಳಿಸಿದ್ದರು. ಇದಾದ ಬಳಿಕ ಕಂಗನಾ ಅವರು ಕರಣ್ರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.
ಕಂಗನಾ ಟ್ವಿಟ್ಟರ್ನಲ್ಲಿ ಪ್ರಿಯಾಂಕಾ ಚೋಪ್ರಾ ಅವರ ಸುದ್ದಿಯೊಂದನ್ನು ಹಂಚಿಕೊಂಡು, "ಒಂದು ಮೂಲೆಗೆ ತಳ್ಳಲಾಯಿತು, ರಾಜಕೀಯದಿಂದ ಬೇಸತ್ತು" ಎಂದು ಬರೆದುಕೊಂಡಿದ್ದಾರೆ. "ಬಾಲಿವುಡ್ ಬಗ್ಗೆ ಪ್ರಿಯಾಂಕಾ ಚೋಪ್ರಾ ಹೇಳುವುದು ಇದನ್ನೇ, ಜನರು ಗುಂಪುಗೂಡಿದರು, ಅವರನ್ನು ಬೆದರಿಸಿದರು, ಚಿತ್ರರಂಗದಿಂದ ಹೊರಹಾಕಿದರು''. ಭಾರತವನ್ನು ತೊರೆಯುವಂತೆ ಮಾಡಲಾಯಿತು. ಕರಣ್ ಜೋಹರ್ ಅವರು ಪ್ರಿಯಾಂಕಾರನ್ನು ನಿಷೇಧಿಸಿದ್ದರು ಎಂದು ಎಲ್ಲರಿಗೂ ತಿಳಿದಿದೆ ಎಂದು ಕಂಗನಾ ಟ್ವೀಟ್ ಮಾಡಿದ್ದಾರೆ. ಪ್ರಿಯಾಂಕಾ ಅವರಿಗೆ ಕರಣ್ "ಕಿರುಕುಳ" ನೀಡಿದ್ದಾರೆ. ಹಾಗಾಗಿ ಅವರು ದೇಶ ತೊರೆಯಲು ಕಾರಣವಾಯಿತು ಎಂದು ಸಹ ಬಾಲಿವುಡ್ ಕ್ವೀನ್ ಕಂಗನಾ ಆರೋಪಿಸಿದ್ದಾರೆ.
ಇದನ್ನೂ ಓದಿ:ರಾಮ್ ಚರಣ್ ಗ್ರ್ಯಾಂಡ್ ಬರ್ತ್ ಡೇಯಲ್ಲಿ ಗಣ್ಯರ ಸಮಾಗಮ: ಉಪಾಸನಾ ಬೇಬಿ ಬಂಪ್ ಫೋಟೋ ವೈರಲ್
ನಟಿ ಪ್ರಿಯಾಂಕಾ ಚೋಪ್ರಾ ಸದ್ಯ ಹಾಲಿವುಡ್ ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ. ಸಿಟಾಡೆಲ್ ಸೀರಿಸ್ ಮೂಲಕ ಸದ್ಯ ಸಖತ್ ಸದ್ದು ಮಾಡುತ್ತಿದ್ದಾರೆ. ಈಗಾಗಲೇ ತೆರೆ ಕಂಡಿರುವ ಫಸ್ಟ್ ಲುಕ್, ಪೋಸ್ಟರ್ಗಳು, ಟ್ರೇಲರ್ಗಳ ಪ್ರೇಕ್ಷಕರ ಕುತೂಹಲ ಹೆಚ್ಚಿಸಿದೆ. ಈ ಆ್ಯಕ್ಷನ್ ಸೀರಿಸ್ ಪ್ರೈಮ್ ವಿಡಿಯೋದಲ್ಲಿ ಏಪ್ರಿಲ್ 28 ರಿಂದ ಮೇ 26 ರವರೆಗೆ ಪ್ರತೀ ಶುಕ್ರವಾರ ಪ್ರಸಾರವಾಗಲಿದೆ. ರಹಸ್ಯ ಸಂಸ್ಥೆ ಸಿಟಾಡೆಲ್‌ನ ಇಬ್ಬರು ಗಣ್ಯ ಏಜೆಂಟ್‌ಗಳಾದ ಮೇಸನ್ ಕೇನ್ (ರಿಚರ್ಡ್ ಮ್ಯಾಡೆನ್) ಮತ್ತು ನಾಡಿಯಾ ಸಿನ್ಹ್ (ಪ್ರಿಯಾಂಕಾ) ಸುತ್ತ ಹೆಣೆಯಲಾದ ಕಥೆ ಇದು. ಹಾಲಿವುಡ್ ಸಿನಿಮಾ ಜೊತೆಗೆ ಇಂಡಿಯನ್ ಚಿತ್ರಕ್ಕೂ ಸಹಿ ಹಾಕಿದ್ದಾರೆ. ಫರ್ಹಾನ್ ಅಖ್ತರ್ ಅವರ ಜೀ ಲೇ ಜರಾ ಚಿತ್ರದಲ್ಲಿಯೂ ಪ್ರಿಯಾಂಕಾ ಚೋಪ್ರಾ ನಟಿಸಲಿದ್ದಾರೆ.
ಇದನ್ನೂ ಓದಿ:ಮೇಕಪ್ ಬ್ರಷ್‌ ಹಿಡಿದು ಮಗಳೊಂದಿಗೆ ಆಟವಾಡಿದ ಗ್ಲೋಬಲ್ ಐಕಾನ್ ಪ್ರಿಯಾಂಕಾ ಚೋಪ್ರಾ
ನಟಿ ಕಂಗನಾ ರಣೌವತ್ ತಮ್ಮ ಎಮರ್ಜೆನ್ಸಿ ಸಿನಿಮಾ ಪೂರ್ಣಗೊಳಿಸಿದ್ದು, ಬಿಡುಗಡೆಗೆ ಸಿದ್ಧತೆ ನಡೆಯುತ್ತಿದೆ. ಅಕ್ಟೋಬರ್ 20ರಂದು ಈ ಸಿನಿಮಾ ಬಿಡುಗಡೆ ಆಗಲಿದೆ. ಉಳಿದಂತೆ ಮಣಿಕರ್ಣಿಕಾ ರಿಟರ್ನ್ಸ್: ದಿ ಲೆಜೆಂಡ್ ಆಫ್ ದಿಡ್ಡಾ, ದಿ ಇನ್ಕಾರ್ನೇಶನ್: ಸೀತಾ, ದಕ್ಷಿಣದ ಚಂದ್ರಮುಖಿ 2 ಸಿನಿಮಾಗಳಲ್ಲಿ ಕಂಗನಾ ಕಾಣಿಸಿಕೊಳ್ಳಲಿದ್ದಾರೆ. ನಿರ್ಮಾಪಕಿಯಾಗಿ ಅವರ ಕೆಲಸ ನೋಡುವುದಾದರೆ, ನವಾಜುದ್ದೀನ್ ಸಿದ್ದಿಕಿ ಮತ್ತು ಅವನೀತ್ ಕೌರ್ ನಟಿಸಿರುವ ಟಿಕು ವೆಡ್ಸ್ ಶೇರು ಅಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಸ್ಟ್ರೀಮ್ ಆಗಲಿದೆ.
