ನಟ ಹೃತಿಕ್ ರೋಷನ್ ಮತ್ತು ನಟಿ ಕಂಗನಾ ರಣಾವತ್ ಕೆಲ ಕಾಲ ಡೇಟಿಂಗ್ನಲ್ಲಿದ್ದರು ಎಂಬ ಸುದ್ದಿ ಬಾಲಿವುಡ್ ಅಂಗಳದಲ್ಲಿ ಈಗಲೂ ಕೇಳಿಬರುತ್ತಿದೆ. 'ಮದುವೆಯಾಗುವುದಾಗಿ ನಂಬಿಸಿ ನನಗೆ ಹೃತಿಕ್ ರೋಷನ್ ಮೋಸ ಮಾಡಿದ್ದಾರೆ' ಎಂದು ಕಂಗನಾ ಈ ಹಿಂದೆ ನೇರವಾಗಿಯೇ ಮಾಧ್ಯಮದ ಮುಂದೆ ಹೇಳಿಕೊಂಡಿದ್ದರು. ಅದಾದ ಬಳಿಕ ಹೃತಿಕ್ ಮತ್ತು ಕಂಗನಾ ಜೊತೆಯಾಗಿ ಎಲ್ಲೂ ಕಾಣಿಸಿಕೊಂಡಿಲ್ಲ. ಆದರೆ ಇದೀಗ ಇವರಿಬ್ಬರ ಬಾರ್ಬಿ ಮತ್ತು ಕೆನ್ ವಿಡಿಯೋವೊಂದು ಟ್ರೆಂಡಿಂಗ್ನಲ್ಲಿದೆ.
'ದಿ ಇಂಡಿಯನ್ ಡೀಪ್‌ಫೇಕರ್' ಎಂದು ಕರೆಯಲ್ಪಡುವ ಡೀಪ್ಫೇಕ್ (ನಕಲು) ಕಲಾವಿದರು ಇತ್ತೀಚೆಗೆ ಒಂದು ವಿಡಿಯೋವನ್ನು ತಯಾರಿಸಿದ್ದಾರೆ. ಇದರಲ್ಲಿ ಕಂಗನಾ ರಣಾವತ್ ಮತ್ತು ಹೃತಿಕ್ ರೋಷನ್ ಅವರನ್ನು ಬಾರ್ಬಿ ಮತ್ತು ಕೆನ್ ಪಾತ್ರಗಳಲ್ಲಿ ಚಿತ್ರಿಸಲಾಗಿದೆ. ಇತ್ತೀಚೆಗೆ ಹಾಲಿವುಡ್ ನಿರ್ದೇಶಕಿ ಗ್ರೆಟಾ ಗೆರ್ವಿಗ್ ನಿರ್ದೇಶನದ 'ಬಾರ್ಬಿ' ಚಿತ್ರ ಬಿಡುಗಡೆಯಾಗಿದೆ. ಇದರಲ್ಲಿ ಬಾರ್ಬಿ ಮತ್ತು ಕೆನ್ ಪಾತ್ರಗಳಲ್ಲಿ ರಯಾನ್ ಗೊಸ್ಲಿಂಗ್ ಮತ್ತು ಮಾರ್ಗಾಟ್ ರಾಬಿ ನಟಿಸಿದ್ದಾರೆ. ಇದರ ಪ್ರಕಾರದಂತೆ ಡೀಪ್ಫೇಕ್ ಕಲಾವಿದರು ತಯಾರಿಸಿರುವ ವಿಡಿಯೋದಲ್ಲಿ ಬಾರ್ಬಿ ಮತ್ತು ಕೆನ್ ಆಗಿ ಕಂಗನಾ ಮತ್ತು ಹೃತಿಕ್ರನ್ನು ತೋರಿಸಲಾಗಿದೆ.
ವಿಡಿಯೋದಲ್ಲೇನಿದೆ?:ಡೀಪ್ಫೇಕ್ ಕಲಾವಿದರು ಮಾಡಿರುವ ವಿಡಿಯೋದಲ್ಲಿ ಕಂಗನಾ ರಣಾವತ್ ಅವರು ಮಾರ್ಗಾಟ್ ರಾಬಿ ಅಂತೆಯೇ ಕಾಣುತ್ತಾರೆ. ತಮ್ಮ ಕೌಶಲ್ಯದಿಂದ ಕಂಗನಾಗೆ ಹೊಂಬಣ್ಣದ ಕೂದಲಿನ ಜೊತೆ ಗುಲಾಬಿ ಬಣ್ಣದ ದಿರಿಸಿನಲ್ಲಿ ಅದ್ಭುತವಾಗಿ ಕಾಣುವಂತೆ ಮಾಡಿದ್ದಾರೆ. ಬಿಳುಪಾಗಿಸಿದ ಹೊಂಬಣ್ಣದ ಕೂದಲಿನಿಂದ ಕೆನ್ ಪಾತ್ರಕ್ಕೆ ಹೃತಿಕ್ ರೋಷನ್ ಸೂಕ್ತವಾದ ಆಯ್ಕೆಯಾಗಿದೆ. ಕಂಗನಾ ಮತ್ತು ಹೃತಿಕ್ ರೋಷನ್ ಅವರ ಈ ಮೋಡಿ ಮಾಡುವ ವಿಡಿಯೋ ಅನೇಕರ ಮನಸ್ಸನ್ನು ಗೆದ್ದಿದೆ.
ಏನಿದು ಡೀಪ್ಫೇಕ್?: 'ಡೀಪ್ಫೇಕ್' ಅನ್ನೋದು ಒಂದು ತಂತ್ರಜ್ಞಾನ. ಇದರ ಮೂಲಕ ಒಂದು ಚಿತ್ರಕ್ಕೆ ಮತ್ತೊಬ್ಬರನ್ನು ಎಡಿಟ್ ಮಾಡಬಹುದು. ಧ್ವನಿ ಬದಲಾಯಿಸಬಹುದು. ಒಬ್ಬ ವ್ಯಕ್ತಿಯನ್ನು ಯಾವ ರೀತಿಯಲ್ಲಿ ಬೇಕಾದರೂ ತೋರಿಸಬಹುದು.