ನಟ ಸನ್ನಿ ಡಿಯೋಲ್ ಮತ್ತು ನಟಿ ಅಮಿಷಾ ಪಟೇಲ್ ಮುಖ್ಯಭೂಮಿಕೆಯಲ್ಲಿ ಮೂಡಿ ಬಂದ ಸೂಪರ್ ಹಿಟ್ ಗದರ್ ಏಕ್ ಪ್ರೇಮ್ ಕಥಾ ಚಿತ್ರದ ಸೀಕ್ವೆಲ್ ತೆರೆಕಾಣಲು ಸಿದ್ಧತೆ ನಡೆಯುತ್ತಿದೆ. 2001ರಲ್ಲಿ ನಿರ್ದೇಶಕ ಅನಿಲ್ ಶರ್ಮಾ ಆ್ಯಕ್ಷನ್ ಕಟ್ ಹೇಳಿರುವ ಈ ಚಿತ್ರವು ರೊಮ್ಯಾಂಟಿಕ್ ಆ್ಯಂಡ್ ಆ್ಯಕ್ಷನ್ ಚಿತ್ರವಾದ್ದು, ಗದರ್ 2 ಕೂಡ ಅನಿಲ್ ಶರ್ಮಾ ನಿರ್ದೇಶನದಲ್ಲಿ ತಯಾರಾಗಿದೆ.
ಗದರ್ 2 ಪೋಸ್ಟರ್ ರಿಲೀಸ್:ಬಾಲಿವುಡ್ ನಟ ಸನ್ನಿ ಡಿಯೋಲ್ ಅವರ 'ಗದರ್' ಚಿತ್ರ 22 ವರ್ಷಗಳ ಹಿಂದೆ ಬಾಕ್ಸ್ ಆಫೀಸ್ ದಾಖಲೆಗಳನ್ನು ಮುರಿದಿತ್ತು. 'ಗದರ್' ಮುಂದುವರಿದ ಭಾಗದೊಂದಿಗೆ ತೆರೆಮೇಲೆ ಮರಳುತ್ತಿದೆ. 'ಗದರ್ 2' ಚಿತ್ರದ ಮೊದಲ ಪೋಸ್ಟರ್ ಇಂದು ಅನಾವರಣಗೊಂಡಿದೆ. ನಟ ಸನ್ನಿ ಡಿಯೋಲ್ ಆ್ಯಕ್ಷನ್ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಗದರ್ 2 ಬಿಡುಗಡೆ ದಿನಾಂಕ: ಈ ಸಾಲಿನ ಆಗಸ್ಟ್ 11ರಂದು ಚಿತ್ರ ಬಿಡುಗಡೆ ಆಗಲಿದೆ. 2001ರಲ್ಲಿ ಚಿತ್ರದ ಮೊದಲ ಭಾಗ ಬಿಡುಗಡೆ ಆದಾಗ ಬಾಲಿವುಡ್‌ನಲ್ಲಿ ಸಂಚಲನವನ್ನು ಸೃಷ್ಟಿಸಿತು. ಅಲ್ಲದೇ ಅಮೀರ್ ಖಾನ್ ಅವರ ಆಸ್ಕರ್ ನಾಮನಿರ್ದೇಶಿತ 'ಲಗಾನ್' ಚಿತ್ರಕ್ಕೆ ಪೈಪೋಟಿ ಕೊಟ್ಟು ದೊಡ್ಡ ಹೆಸರು ಮಾಡಿತ್ತು.
ನಟ ಸನ್ನಿ ಡಿಯೋಲ್ ಹೇಳಿದ್ದೇನು?: ಗದರ್ - ಏಕ್ ಪ್ರೇಮ್ ಕಥಾ ಸಿನಿಮಾ ನನ್ನ ಜೀವನದಲ್ಲಿ ವೈಯಕ್ತಿಕವಾಗಿ ಮತ್ತು ವೃತ್ತಿಪರವಾಗಿ ಒಂದು ಪ್ರಮುಖ ಭಾಗವಾಗಿದೆ. 22 ವರ್ಷಗಳ ನಂತರ ತಂಡದೊಂದಿಗೆ ಮತ್ತೆ ಸೇರಿರುವುದು ಸೃಜನಾತ್ಮಕವಾಗಿ ಶ್ರೀಮಂತ ಅನುಭವ ನೀಡಿದೆ ಎಂದು ನಟ ಸನ್ನಿ ಡಿಯೋಲ್ ತಿಳಿಸಿದ್ದಾರೆ. ಆ್ಯಕ್ಷನ್ ಅವತಾರದಲ್ಲಿ ನಟ ಸನ್ನಿ ಡಿಯೋಲ್ ಅನ್ನು ಪರಿಚಯಿಸಿರುವುದನ್ನು ನೋಡಿದರೆ ಗದರ್ 2 ಮೈಲಿಗಲ್ಲನ್ನು ಸೃಷ್ಟಿಸಲಿದೆ ಎಂಬ ಸುಳಿವು ನೀಡಿದಂತಿದೆ.