ದುಬೈನಲ್ಲಿ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ಬಾಲಿವುಡ್ ಸೂಪರ್ಸ್ಟಾರ್ ಶಾರುಖ್ ಖಾನ್ ಅವರಿಗೆ ಮಹಿಳಾ ಅಭಿಮಾನಿಯೊಬ್ಬರು ಕಿಸ್ ಮಾಡಿರುವ ಘಟನೆ ನಡೆದಿದ್ದು, ಆ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ಮಂಗಳವಾರ ದುಬೈನಲ್ಲಿ ತಮ್ಮ ಸ್ನೇಹಿತರೊಬ್ಬರ ಒಡೆತನದ ರಿಯಲ್ ಎಸ್ಟೇಟ್ ಬ್ರಾಂಡ್‌ನ ಪ್ರಚಾರ ಕಾರ್ಯಕ್ರಮವೊಂದರಲ್ಲಿ ಬಾಲಿವುಡ್ ಬಾದ್ಶಾ ಶಾರುಖ್ ಖಾನ್ ಭಾಗವಹಿದ್ದರು. ಅಲ್ಲಿ ಕೆಲವು ಅತಿಥಿಗಳು ಸೇರಿದಂತೆ ಶಾರುಖ್ ಖಾನ್ ಅಭಿಮಾನಿಗಳು ಕೂಡ ಸೇರಿದ್ದರು.
ಅಭಿಮಾನಿಗಳ ಜೊತೆ ಮಾತುಕತೆ, ಸೆಲ್ಫಿ ವೇಳೆಯಲ್ಲಿ ಅನಿರೀಕ್ಷಿತವಾಗಿ ಮಹಿಳಾ ಅಭಿಮಾನಿಯೊಬ್ಬರು, ಅತಿಯಾದ ಖುಷಿಯಿಂದ ನಟ ಶಾರುಖ್ ಖಾನ್ ಅವರ ಕೆನ್ನೆಗೆ ಮುತ್ತು ಕೊಟ್ಟಿದ್ದಾರೆ. ಈ ಘಟನೆ ನಟ ಶಾರುಖ್ ಖಾನ್ ಅವರಿಗೆ ಇರಿಸುಮುರುಸಾಗಿದೆ. ರೆಡ್ಡಿಟ್ ತಾಣದಲ್ಲಿ ಈವೆಂಟ್ ಆಯೋಜಕರು ಅಪ್ಲೋಡ್ ಮಾಡಿದ್ದು, ಆ ವಿಡಿಯೋದಲ್ಲಿ ನಟ ಶಾರುಖ್ ಅವರು ತಮ್ಮ ಮ್ಯಾನೇಜರ್ ಪೂಜಾ ದದ್ಲಾನಿ ಹಾಗೂ ಭದ್ರತಾ ಸಿಬ್ಬಂದಿ ಜೊತೆ ಬ್ಯಾಕ್ ಸ್ಟೇಜ್ ಗೆ ಹೋಗುತ್ತಿರುವುದನ್ನು ನೋಡಬಹುದು.
ಅದಲ್ಲದೆ ಒಬ್ಬ ವ್ಯಕ್ತಿ ಶಾರುಖ್ ಖಾನ್ ಅವರನ್ನು ಹಿಂಬಾಲಿಸುತ್ತ ಹೋಗಿ, ನಟನ ಕೈ ಕುಲುಕಿ, ಕೈಗೆ ಮುತ್ತಿಟ್ಟು ನಂತರ ತಬ್ಬಿಕೊಳ್ಳುತ್ತಾನೆ. ಆಗ ಕಪ್ಪು ವಸ್ತ್ರ ಧರಿಸಿದ ಮಹಿಳೆಯೊಬ್ಬರು ಕಿಂಗ್ ಖಾನ್ ಬಳಿ ಬಂದು, ನಾನು ನಿಮಗೆ ಮುತ್ತು ಕೊಡಬಹುದೇ? ಎಂದು ಪ್ರಶ್ನಿಸುತ್ತಾರೆ. ಆದರೆ ಶಾರುಖ್ ಆಪ್ರಶ್ನೆಗೆ ಪ್ರತಿಕ್ರಿಯೆ ನೀಡುವ ಮೊದಲೇ ಆ ಮಹಿಳೆ ಶಾರುಖ್ ಕೆನ್ನೆಗೆ ಮುತ್ತು ಕೊಟ್ಟಿರುವುದು ವಿಡಿಯೋದಲ್ಲಿದೆ. ವಿಡಿಯೋದಲ್ಲಿ ಮಹಿಳೆ ಮುತ್ತು ಕೊಡುತ್ತಿರುವಾಗ ಶಾರುಖ್ ಖಾನ್ ಅವರು ಕಣ್ಣು ಮುಚ್ಚಿ ನಗುತ್ತಿರುವುದನ್ನು ಕಾಣಬಹುದು. ನಂತರ ಆ ಮಹಿಳೆ ತಾನು ಮಾಡಿದರ ಬಗ್ಗೆ ಮೆಲುಕು ಹಾಕುತ್ತಾ ಸಂತೋಷದಿಂದ ನಗುತ್ತಾ ಹೊರಟು ಹೋಗುತ್ತಾರೆ.