ಅಪಾರ ಸಂಖ್ಯೆಯ ಅಭಿಮಾನಿಗಳ ಕಾಯುವಿಕೆ ಪೂರ್ಣಗೊಂಡಿದೆ. ಬಾಲಿವುಡ್ ಕಿಂಗ್ ಖಾನ್ ಶಾರುಖ್ ಅವರ ಬಹುನಿರೀಕ್ಷಿತ ಸಿನಿಮಾ ಡಂಕಿ ತೆರೆಗಪ್ಪಳಿಸಿದೆ. ರಾಜ್ಕುಮಾರ್ ಹಿರಾನಿ ನಿರ್ದೇಶನದ ಈ ಸಿನಿಮಾ ಮಿಶ್ರ ಪ್ರತಿಕ್ರಿಯೆಗಳನ್ನು ಸ್ವೀಕರಿಸಿದೆ. ಸಿನಿಮಾ ವೀಕ್ಷಿಸಿದವರು ಸೋಷಿಯಲ್ ಮೀಡಿಯಾಗಳಲ್ಲಿ ತಮ್ಮ ಅನಿಸಿಕೆ ಹಂಚಿಕೊಳ್ಳುತ್ತಿದ್ದಾರೆ.
ಅಭಿಮಾನಿಗಳ ಹರ್ಷೋದ್ಗಾರದ ನಡುವೆ ಡಂಕಿ ಚಿತ್ರಮಂದಿರ ಪ್ರವೇಶಿಸಿದೆ. ಎಸ್ಆರ್ಕೆ ಅಭಿಮಾನಿಗಳು ಮುಂಜಾನೆಯ 5:55 ಶೋಗಳಿಗೆ ದೌಡಾಯಿಸಿದ್ದರು. ಕಿಂಗ್ ಖಾನ್ ಮುಖ್ಯಭೂಮಿಕೆಯ ಈ ಚಿತ್ರವನ್ನು ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳು ಅದ್ಧೂರಿಯಾಗಿ ಸ್ವಾಗತಿಸಿದ್ದಾರೆ. ವರ್ಷಾರಂಭದಲ್ಲಿ ಪಠಾಣ್, ಸೆಪ್ಟೆಂಬರ್‌ನಲ್ಲಿ ಜವಾನ್ ತೆರೆಕಂಡು ಬ್ಲಾಕ್ಬಸ್ಟರ್ ಹಿಟ್ ಆಗಿವೆ. 2023ರಲ್ಲಿ ತೆರೆಕಂಡ ಶಾರುಖ್ ಖಾನ್ ಅವರ ಮೂರನೇ ಚಿತ್ರ ಇದಾಗಿದ್ದು, ಬಹುತೇಕ ಸೂಪರ್ ಹಿಟ್ ಆಗುವ ಸೂಚನೆ ಕೊಟ್ಟಿದೆ.
ಮುಂಬೈನ ಗೈಟಿ ಥಿಯೇಟರ್‌ನ ಹೊರಗೆ ಹಬ್ಬದ ವಾತಾವರಣ ಸೃಷ್ಟಿಯಾಗಿತ್ತು. ಎಸ್ಆರ್ಕೆ ಅಭಿಮಾನಿಗಳು ಡಂಕಿ ಬಿಡುಗಡೆಯ ಕ್ಷಣವನ್ನು ಹಬ್ಬದಂತೆ ಅದ್ಧೂರಿಯಾಗಿ ಆಚರಿಸಿದ್ದಾರೆ. ವರ್ಣರಂಜಿತ ಕಟೌಟ್ಗಳು, ಅದ್ಧೂರಿ ಡೋಲು ಪ್ರದರ್ಶನಗಳು, ಪಟಾಕಿ ಸಿಡಿಸುವಿಕೆ ಎಲ್ಲವೂ ನಟನ ಮೇಲಿನ ಅಭಿಮಾನವನ್ನು ಸಾಬೀತುಪಡಿಸಿವೆ. ಎಸ್ಆರ್ಕೆ ಅಭಿಮಾನಿಗಳ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದು, ಸಖತ್ ಸದ್ದು ಮಾಡುತ್ತಿದೆ.
ಎಸ್ಆರ್ಕೆ ಫ್ಯಾನ್ಸ್ ಕ್ಲಬ್ಗಳು ಸೋಷಿಯಲ್ ಮೀಡಿಯಾಗಳಲ್ಲಿ ಡಂಕಿಗೆ ಸಂಬಂಧಿಸಿದಂತೆ ವಿಡಿಯೋಗಳನ್ನು ಹಂಚಿಕೊಂಡಿದೆ. ಸಿನಿಮಾಗೆ ಅಭಿಮಾನಿಗಳು ತೋರುತ್ತಿರುವ ಪ್ರೀತಿ, ಉತ್ಸಾಹಕ್ಕೆ ಎಸ್ಆರ್ಕೆ ತಮ್ಮ ಕೃತಜ್ಞತೆ ವ್ಯಕ್ತಪಡಿಸಿದ್ದಾರೆ. ಎಕ್ಸ್ ಪೋಸ್ಟ್ ಶೇರ್ ಮಾಡಿದ ನಟ, "ಹುಡುಗರೇ ಮತ್ತು ಹುಡುಗಿಯರೇ ಧನ್ಯವಾದಗಳು. ಉತ್ತಮ ಪ್ರದರ್ಶನಕ್ಕೆ ಸಾಕ್ಷಿಯಾಗಿ. ಡಂಕಿ ನಿಮಗೆ ಮನರಂಜನೆ ನೀಡಲಿದೆ ಎಂದು ಭಾವಿಸುತ್ತೇವೆ" ಎಂದು ಬರೆದಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ನೆಟ್ಟಿಗರಿಂದ ವಿಮರ್ಶೆಗಳು ಹರಿದು ಬಂದಿವೆ. ಅನೇಕ ಸಾಮಾಜಿಕ ಮಾಧ್ಯಮ ಬಳಕೆದಾರರು ಡಂಕಿಯನ್ನು ಒಂದು 'ಮಾಸ್ಟರ್ ಪೀಸ್' ಎಂದು ಶ್ಲಾಘಿಸಿದರೆ, ಹಲವರು ತಮ್ಮ ನಿರಾಶೆ ವ್ಯಕ್ತಪಡಿಸಿದ್ದಾರೆ. ಒಟ್ಟಾರೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ರಾಜ್ಕುಮಾರ್ ಹಿರಾನಿ ಅವರ ಅತ್ಯಂತ ಶಕ್ತಿಶಾಲಿ ಪ್ರೊಜೆಕ್ಟ್ ಎಂದು ಹಲವರು ವರ್ಣಿಸಿದ್ದಾರೆ. ಔಟ್ ಸ್ಟ್ಯಾಂಡಿಂಗ್, ಮಾಸ್ಟರ್‌ಪೀಸ್, ಅತ್ಯುತ್ತಮ, ಈ ವರ್ಷದ ಮೂರನೇ ಬ್ಲಾಕ್ಬಸ್ಟರ್ ಎಂದೆಲ್ಲ ಪಾಸಿಟಿವ್ ಕಾಮೆಂಟ್ಸ್ಗಳು ಹರಿದು ಬರುತ್ತಿದೆ.