ಬಾಲಿವುಡ್ ನಟ ಶಾರುಖ್ ಖಾನ್ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ 'ಡಂಕಿ' ಸಿನಿಮಾ ಡಿಸೆಂಬರ್ 21ರಂದು ತೆರೆ ಕಂಡಿದೆ. ಪಾಸಿಟಿವ್ ಟಾಕ್ ಪಡೆದಿರುವ ಸಿನಿಮಾ ಚಿತ್ರಮಂದಿರಗಳಲ್ಲಿ ಸದ್ದು ಮಾಡುತ್ತಿದೆ. ಆದರೆ ಟೈಟಲ್ ಘೋಷಣೆಯಾದಾಗಿನಿಂದ ಹೆಸರು ತುಂಬಾ ಹೊಸದು ಎಂದು ನೆಟ್ಟಿಗರು, ಅಭಿಮಾನಿಗಳು ಇದರ ಅರ್ಥ ಹುಡುಕುತ್ತಿದ್ದಾರೆ. ಇತ್ತೀಚೆಗೆ ಶಾರುಖ್ ಖಾನ್ ಸಂದರ್ಶನವೊಂದರಲ್ಲಿ 'ಡಂಕಿ' ಪದದ ಮೂಲ ಅರ್ಥವನ್ನು ಬಹಿರಂಗಪಡಿಸಿದ್ದರು.
"ಡಂಕಿ ಎಂದರೆ ಅಕ್ರಮ ಪ್ರಯಾಣ ಎಂದರ್ಥ. ದೇಶದ ಗಡಿಯನ್ನು ಅಕ್ರಮವಾಗಿ ಪ್ರಯಾಣಿಸುವುದಕ್ಕೆ ಡಂಕಿ ಪ್ರಯಾಣ ಎಂದು ಕರೆಯಲಾಗುತ್ತದೆ. ಪಂಜಾಬಿ ಗಾದೆಯಿಂದ ಈ ಹೆಸರು ಬಂದಿದೆ. ಹಾಗಾಗಿ ನಮ್ಮ ಸಿನಿಮಾ ಕೂಡ ಹೆಸರಿಗೆ ತಕ್ಕಂತೆ ತಾಯ್ನಾಡಾದ ಭಾರತಕ್ಕೆ ಮರಳಲು ಬಯಸುವ ಜನರ ಗುಂಪಿನ ಕುರಿತಾಗಿದೆ. ಸಿನಿಮಾ ಕಥೆಗೆ ಡಂಕಿ ಹೆಸರು ಸೂಕ್ತವಾಗಿರುವುದರಿಂದ ಅದೇ ಹೆಸರನ್ನು ಇಟ್ಟಿದ್ದೇವೆ" ಎಂದು ಅವರು ವಿವರಿಸಿದರು.
ಪ್ರಭಾಸ್ ಅಭಿಮಾನಿಗಳು 'ಸಲಾರ್' ಪದದ ಅರ್ಥಕ್ಕಾಗಿಯೂ ನೆಟ್ಟಿಗರು ಹುಡುಕಾಡುತ್ತಿದ್ದಾರೆ. ಇತ್ತೀಚೆಗೆ ನಿರ್ದೇಶಕ ಪ್ರಶಾಂತ್ ನೀಲ್ ಈ ಪದದ ಅರ್ಥವನ್ನು ಬಹಿರಂಗಪಡಿಸಿದರು. 'ಸಲಾರ್' ಎಂಬುದು ಉರ್ದು ಪದವಾಗಿದ್ದು, ಸಮರ್ಥ ನಾಯಕ, ರಾಜನ ಬಲಗೈ ಮತ್ತು ಅತ್ಯಂತ ವಿಶ್ವಾಸಾರ್ಹ ವ್ಯಕ್ತಿ ಎಂಬರ್ಥ ನೀಡುತ್ತದೆ. ಇದನ್ನು ಕೇಳಿದ ಅಭಿಮಾನಿಗಳು ಈ ಪಾತ್ರಕ್ಕೆ ಪ್ರಭಾಸ್ ಪರ್ಫೆಕ್ಟ್ ಎಂದು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.
ಸಲಾರ್ vs ಡಂಕಿ:'ಡಂಕಿ' ನಿನ್ನೆ ತೆರೆ ಕಂಡರೆ, 'ಸಲಾರ್' ಇಂದು ಬಿಡುಗಡೆಯಾಗಿದೆ. 'ಡಂಕಿ' ಗುರುವಾರ ಎಲ್ಲಾ ಭಾಷೆಗಳಲ್ಲಿ 30 ಕೋಟಿ ರೂ. ಸಂಗ್ರಹಿಸಿದೆ. ಕಾಮಿಡಿ ಡ್ರಾಮಾ ಚಲನಚಿತ್ರವು ಒಟ್ಟಾರೆ 25.71% ಆಕ್ಯುಪೆನ್ಸಿಯನ್ನು ಹೊಂದಿದೆ. ಮತ್ತೊಂದೆಡೆ 'ಸಲಾರ್' ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಇಂದೇ 100 ಕೋಟಿ ರೂಪಾಯಿ ಕಲೆಕ್ಷನ್ ಮಾಡುವ ನಿರೀಕ್ಷೆಯಿದೆ. 'ಸಲಾರ್' ಫೀವರ್ 'ಡಂಕಿ' ಕಲೆಕ್ಷನ್ಗೆ ಅಡ್ಡಿಯಾಗುವ ಎಲ್ಲಾ ಲಕ್ಷಣಗಳು ಕಾಣಿಸುತ್ತಿವೆ. ಎರಡೂ ಮಾಸ್ ಚಿತ್ರಗಳು ಇಂದಿನಿಂದ ಬಾಕ್ಸ್ ಆಫೀಸ್ ಘರ್ಷಣೆಯನ್ನು ಎದುರಿಸಲಿವೆ.
ಡಂಕಿ ಚಿತ್ರತಂಡ: ನಿರ್ದೇಶಕ ರಾಜ್‌ಕುಮಾರ್ ಹಿರಾನಿ ಮತ್ತು ಶಾರುಖ್ ಖಾನ್ ಜೋಡಿಯ ಈ ಚಿತ್ರವು ತಮ್ಮ ತಾಯ್ನಾಡಾದ ಭಾರತಕ್ಕೆ ಮರಳಲು ಬಯಸುವ ಜನರ ಗುಂಪಿನ ಕುರಿತಾಗಿದೆ. ಜಿಯೋಸ್ಟುಡಿಯೋಸ್, ರೆಡ್ ಚಿಲ್ಲೀಸ್ ಎಂಟರ್‌ಟೈನ್‌ಮೆಂಟ್ ಮತ್ತು ರಾಜ್‌ಕುಮಾರ್ ಹಿರಾನಿ ಫಿಲ್ಮ್ಸ್ ನಿಂದ ಡಂಕಿ ಸಿನಿಮಾ ನಿರ್ಮಾಣಗೊಂಡಿದೆ. ಚಿತ್ರದಲ್ಲಿ ಶಾರುಖ್ ಖಾನ್ ಜೊತೆಗೆ ತಾಪ್ಸಿ ಪನ್ನು, ವಿಕ್ಕಿ ಕೌಶಲ್ ಮತ್ತು ಬೊಮನ್ ಇರಾನಿ ಅವರಂತಹ ಸ್ಟಾರ್ ನಟರೂ ಕೂಡ ಇದ್ದಾರೆ.
ಸಲಾರ್ ರೂವಾರಿಗಳು: ಕೆಜಿಎಫ್, ಕಾಂತಾರ ಮುಂತಾದ ಬ್ಲಾಕ್ಬಸ್ಟರ್ ಸಿನಿಮಾಗಳಿಗೆ ಬಂಡವಾಳ ಹೂಡಿರುವ ಖ್ಯಾತ ನಿರ್ಮಾಣ ಸಂಸ್ಥೆ ಹೊಂಬಾಳೆ ಫಿಲ್ಮ್ಸ್ 'ಸಲಾರ್' ಸಿನಿಮಾ ನಿರ್ಮಿಸಿದೆ. ಪ್ರಶಾಂತ್ ನೀಲ್ ನಿರ್ದೇಶಿಸಿದ್ದಾರೆ. ಚಿತ್ರದಲ್ಲಿ ಪ್ರಭಾಸ್ ಜೊತೆಗೆ ಶ್ರುತಿ ಹಾಸನ್, ಪೃಥ್ವಿರಾಜ್ ಸುಕುಮಾರನ್, ಮೀನಾಕ್ಷಿ ಚೌಧರಿ, ಈಶ್ವರಿ ರಾವ್, ಶರಣ್ ಶಕ್ತಿ ಮುಂತಾದವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. 'ಕೆಜಿಎಫ್' ಚಿತ್ರತಂಡವೇ ಈ ಸಿನಿಮಾಗೂ ಕೆಲಸ ಮಾಡಿದೆ.
ಇದನ್ನೂ ಓದಿ:ಬಾಕ್ಸ್ ಆಫೀಸ್ ಕೊಳ್ಳೆ ಹೊಡೆಯುವುದೇ 'ಸಲಾರ್'? ಮೊದಲ ದಿನ ₹100 ಕೋಟಿ ನಿರೀಕ್ಷೆ
