ವೀಕೆಂಡ್ ವಿತ್ ರಮೇಶ್ ಸೀಸನ್ 5 ಕಳೆದ ಮಾರ್ಚ್ 25ರಂದು ಆರಂಭಗೊಂಡಿದೆ. ಅಪಾರ ಸಂಖ್ಯೆ ವೀಕ್ಷಕರನ್ನು ಸಂಪಾದಿಸಿರುವ ಈ ಕನ್ನಡದ ಜನಪ್ರಿಯ ಕಾರ್ಯಕ್ರಮಕ್ಕೆ ಈಗಾಗಲೇ ನಾಲ್ಕು ಮಂದಿ ಸಾಧಕರು ಬಂದು ಹೋಗಿದ್ದಾರೆ. ಸಾಧಕರ ಸೀಟ್ನಲ್ಲಿ ಕುಳಿತು ತಮ್ಮ ಸಾಧನೆಯ ಕಥೆಯನ್ನು ಅನಾವರಣಗೊಳಿಸಿದ್ದಾರೆ. ಈ ಸಾಧನೆಯ ಕಥೆ ಅದೆಷ್ಟೋ ಮಂದಿಗೆ ಸ್ಫೂರ್ತಿ ಆಗಿದೆ.
ಕನ್ನಡದ ಜನಪ್ರಿಯ ಕಾರ್ಯಕ್ರಮ 'ವೀಕೆಂಡ್ ವಿತ್ ರಮೇಶ್' ಆರಂಭಗೊಂಡು ಮೂರು ವಾರಗಳು ಕಳೆದಿವೆ. ನಾಲ್ಕು ಅತಿಥಿಗಳು ಸಾಧಕರ ಸೀಟ್ಗೆ ಮೆರುಗು ತಂದುಕೊಟ್ಟಿದ್ದಾರೆ. ಸ್ಯಾಂಡಲ್ವುಡ್ ಮೋಹಕ ತಾರೆ ಈ ಜನಪ್ರಿಯ ಕಾರ್ಯಕ್ರಮದ ಮೊದಲ ಅತಿಥಿಯಾಗಿ ಆಗಮಿಸಿದ್ದರು. ಎರಡನೇ ವಾರದಲ್ಲಿ ನಟ, ನೃತ್ಯ ನಿರ್ದೇಶಕ ಪ್ರಭುದೇವ ಉಪಸ್ಥಿತರಿದ್ದರು. ಅದಾದ ಬಳಿಕ ಜಯದೇವ ಸಂಸ್ಥೆಯ ನಿರ್ದೇಶಕ ಡಾ. ಮಂಜುನಾಥ್, ಹಿರಿಯ ಕಲಾವಿದ ದತ್ತಣ್ಣ ಆಗಮಿಸಿದ್ದರು. ಮೂರನೇ ವಾರ ಇಬ್ಬರು ಅತಿಥಿಗಳಿಂದ ಕಾರ್ಯಕ್ರಮ ಮುಕ್ತಾಯಗೊಂಡಿತು.
ಸಾಧಕರ ಸೀಟ್ನಲ್ಲಿ ನಟರಾಕ್ಷಸ:ಇದೀಗ ನಾಲ್ಕನೇ ಅತಿಥಿಯಾಗಿ ಕನ್ನಡ ಚಿತ್ರರಂಗದ ಬಹುಬೇಡಿಕೆ ನಟ ಡಾಲಿ ಧನಂಜಯ್ ಆಗಮಿಸಲಿದ್ದಾರೆ. ಸಿನಿ ಜಗತ್ತಿನ ಒಂದೊಂದೆ ಮೆಟ್ಟಿಲುಗಳನ್ನೇರಿ ಸಾಧನೆಗೈದಿರುವ ಪ್ರತಿಭಾವಂತ ಕಲಾವಿದ. ನಟರಾಕ್ಷಸ ಖ್ಯಾತಿಯ ಡಾಲಿ ಧನಂಜಯ್ ವೀಕೆಂಡ್ ವಿತ್ ರಮೇಶ್ ಸೀಸನ್ 5ಗೆ ಮೆರುಗು ತರಲಿದ್ದು, ಜೀ ವಾಹಿನಿ ಈ ಎಪಿಸೋಡ್ನ ಪ್ರೋಮೋ ರಿಲೀಸ್ ಮಾಡಿದೆ. ನೆನಪುಗಳ ಜಾತ್ರೆಯಲ್ಲಿ ಅದ್ಧೂರಿಯಾಗಿ ಸಂಭ್ರಮಿಸಿದ ನಟರಾಕ್ಷಸ ಡಾಲಿ ಧನಂಜಯ! ಎಂಬ ಕ್ಯಾಪ್ಷನ್ ಕೊಟ್ಟು ಪ್ರೋಮೋ ಬಿಡುಗಡೆಗೊಂಡಿದ್ದು, ಅಭಿಮಾನಿಗಳು ತಮ್ಮ ಪ್ರತಿಕ್ರಿಯೆ ವ್ಯಕ್ತಪಡಿಸುತ್ತಿದ್ದಾರೆ.
ಡಾಲಿ ಧನಂಜಯ್ ಅವರ ವೈಯಕ್ತಿಕ ಜೀವನದ ಪ್ರಮುಖ ವ್ಯಕ್ತಗಳು ಕಾರ್ಯಕ್ರಮಕ್ಕೆ ಅತಿಥಿಗಳಾಗಿ ಆಗಮಿಸಲಿದ್ದಾರೆ. ವೇದಿಕೆಯಲ್ಲಿ ಡೊಳ್ಳು ಹಿಡಿದು ಕುಣಿದು ಕುಪ್ಪಳಿಸಲಿದ್ದಾರೆ. ಜೊತೆಗೆ ವೇದಿಕೆಯಲ್ಲೇ ಡಾಲಿ ಧನಂಜಯ್ ಕಣ್ಣೀರಿಡಲಿದ್ದಾರೆ. ಈ ಎಪಿಸೋಡ್ನ ಸಣ್ಣ ತುಣುಕು ಪ್ರೋಮೋ ಮೂಲಕ ಅನಾವರಣಗೊಂಡಿದ್ದು, ವೀಕ್ಷಕರ ಕುತೂಹಲ ಹೆಚ್ಚಿದೆ.