ಖ್ಯಾತ ನಿರ್ದೇಶಕ ಅಟ್ಲೀ ಅವರು ಎರಡು ದಿನಗಳ ಹಿಂದೆ ಅಂದರೆ ಸೆಪ್ಟೆಂಬರ್ 21ರಂದು 36ನೇ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದು, ಅಭಿಮಾನಿಗಳು ಸೇರಿದಂತೆ ಚಿತ್ರರಂಗದವರು ಶುಭಾಶಯ ಕೋರಿದ್ದಾರೆ. ಬಾಲಿವುಡ್‌ ಸೂಪರ್‌ಸ್ಟಾರ್‌, ಕಿಂಗ್ಖಾನ್ ಶಾರುಖ್ ಖಾನ್ ಹಾಗೂ ತಮಿಳು ಸಿನಿಮಾರಂಗದ ಸೂಪರ್‌ಸ್ಟಾರ್‌ ವಿಜಯ್ ಅವರೊಂದಿಗೆ ತಮ್ಮ ಬರ್ತ್ಡೇ ಸೆಲೆಬ್ರೇಟ್ ಮಾಡಿದ್ದು, ಅವರೊಂದಿಗೆ ಕ್ಲಿಕ್ಕಿಸಿಕೊಂಡ ಫೋಟೋ ಶೇರ್ ಮಾಡಿದ್ದಾರೆ..
ನಿರ್ದೇಶಕ ಅಟ್ಲೀ (ಅರುಣ್ಕುಮಾರ್/ಅಟ್ಲಿಕುಮಾರ್) ಶಾರುಖ್ ಮತ್ತು ವಿಜಯ್ ಜೊತೆ ಇರುವ ಚಿತ್ರವನ್ನು ಗುರುವಾರ ರಾತ್ರಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. 'ಇದಕ್ಕಿಂತ ಇನ್ನೇನು ಕೇಳಲಿ. ನನ್ನ ಆಧಾರ ಸ್ಥಂಭಗಳಾದ ಶಾರುಖ್ ಖಾನ್ ಸರ್‌ ಹಾಗೂ ನನ್ನ ಅಣ್ಣ, ನನ್ನ ದಳಪತಿ ವಿಜಯ್ ಅವರೊಂದಿಗೆ ಇದುವರೆಗಿನ ಅತ್ಯುತ್ತಮ ಜನ್ಮದಿನ ಆಚರಿಸಿಕೊಂಡಿದ್ದೇನೆ' ಎಂದು ಟ್ವೀಟ್ ಮಾಡಿದ್ದಾರೆ.
ಅಟ್ಲೀ - ವಿಜಯ್ ಕಾಂಬೋದಲ್ಲಿ ಬಂದ ಥೇರಿ, ಮೆರ್ಸಲ್‌ ಮತ್ತು ಬಿಗಿಲ್‌ ಸಿನಿಮಾಗಳು ಭಾರೀ ಯಶಸ್ಸು ಕಂಡಿವೆ. ಇದೀಗ 'ಜವಾನ್' ಸಿನಿಮಾದಲ್ಲಿ ಶಾರುಖ್ ಖಾನ್ ಅವರಿಗೆ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ಅಟ್ಲೀ, ಬಾಲಿವುಡ್‌ಗೆ ಪದಾರ್ಪಣೆ ಮಾಡಲು ಸಿದ್ಧರಾಗಿದ್ದಾರೆ.
ಇನ್ನೂ ಜನ್ಮದಿನದ ಪ್ರಯುಕ್ತ ಅಟ್ಲೀ ಅವರಿಗೆ ಅಭಿಮಾನಿಗಳು ಸೋಷಿಯಲ್ ಮೀಡಿಯಾದಲ್ಲಿ ಶುಭಾಶಯಗಳನ್ನು ತಿಳಿಸಿ ಪ್ರೀತಿ ವ್ಯಕ್ತಪಡಿಸಿದ್ದರು. ಈ ಹಿನ್ನೆಲೆ, ಅಭಿಮಾನಿಗಳನ್ನು ಉದ್ದೇಶಿಸಿ ಗುರುವಾರ ಸಂಜೆ ಟ್ವೀಟ್ ಮಾಡಿದ್ದ ಅವರು, 'ನನಗೆ ಹಾರೈಸಲು ಸಮಯ ಮೀಸಲಿಟ್ಟ ಅಭಿಮಾನಿಗಳು, ಸ್ನೇಹಿತರು ಮತ್ತು ಕುಟುಂಬದವರಿಗೆ ಧನ್ಯವಾದಗಳು. ನನ್ನ ಜನ್ಮದಿನವನ್ನು ಸ್ಮರಣೀಯವಾಗಿಸಿದ ಪ್ರತಿಯೊಬ್ಬರಿಗೂ ನಮನಗಳು' ಎಂದು ತಿಳಿಸಿದ್ದರು.