2020ರಲ್ಲಿ ಶಿವ 143 ಎಂಬ ಚಿತ್ರದಿಂದ ಕನ್ನಡ ಸಿನಿಮಾರಂಗಕ್ಕೆ ಪಾದಾರ್ಪಣೆ ಮಾಡಿದ್ದ ದೊಡ್ಮನೆ ಕುಡಿ ಧೀರೇನ್ ರಾಮ್‌ಕುಮಾರ್ ಬಾಡಿ ಬಿಲ್ಡ್ ಮಾಡಿರುವ ಫೋಟೊಗಳು ಇದೀಗ ಚಿತ್ರರಂಗದಲ್ಲಿ ಸುದ್ದಿಯಾಗುತ್ತಿದೆ. ಹೆಸರಿಡದ ಎರಡನೇ ಸಿನಿಮಾಗೆ ಭರ್ಜರಿಯಾಗಿ ತಯಾರಾಗಿದ್ದಾರೆ.
ಇವರ ಮೊದಲ ಸಿನಿಮಾವನ್ನು ಅನಿಲ್ ಕುಮಾರ್ ನಿರ್ದೇಶಿಸಿದ್ದರು. ಜಯಣ್ಣ ಭೋಗೆಂದ್ರ ಪ್ರೊಡಕ್ಷನ್ಸ್ ಸಂಸ್ಥೆ ನಿರ್ಮಾಣ ಮಾಡಿತ್ತು. ಈ ಚಿತ್ರದಲ್ಲಿ ಧೀರೇನ್ ರಾಮ್ ಚೆನ್ನಾಗಿ ಅಭಿನಯಿಸಿದರೂ ಕೂಡ ಯಾಕೋ ಕನ್ನಡ ಸಿನಿಪ್ರೇಮಿಗಳು ಧೀರೇನ್ ರಾಮ್ ಕುಮಾರ್ ಅವರನ್ನು ಅಷ್ಟೊಂದು ಒಪ್ಪಿಕೊಂಡಿರಲಿಲ್ಲ.
ಈ ಚಿತ್ರದ ನಂತರ ಧೀರೇನ್ ರಾಮ್ ಒಳ್ಳೆ ಕಥೆ ಜತೆಗೆ ತಮ್ಮನ್ನು ತಾವು ಇನ್ನೂ ಮೇಕ್ ಓವರ್ ಮಾಡಿಕೊಳ್ಳುವುದರಲ್ಲಿ ಬ್ಯುಸಿಯಾಗಿದ್ದರು. ಈಗ ಬಹಳ ದಿನಗಳ ನಂತರ ಧೀರೇನ್ ರಾಮ್ ವಾಹ್ ಅನಿಸುವಂತೆ ಬಾಡಿ ಬಿಲ್ಡ್ ಮಾಡಿಕೊಂಡು ಪ್ರೇಕ್ಷಕರ ಮುಂದೆ ಬರಲು ರೆಡಿಯಾಗಿದ್ದಾರೆ. ಧೀರೇನ್ ರಾಮ್ ಹೆಸರಿಡದ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ಭರ್ಜರಿ, ಬಹದ್ದೂರ್ ಮತ್ತು ಜೇಮ್ಸ್‌ನಂತಹ ಚಿತ್ರಗಳಿಂದ ತನ್ನದೇ ಬೇಡಿಕೆ ಹೊಂದಿರುವ ಚೇತನ್ ಕುಮಾರ್ ಪವರ್ ಸ್ಟಾರ್ ಬಳಿಕ ದೊಡ್ಮನೆಯ ಕುಡಿಗೆ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ.