ಬಾಲಿವುಡ್ ಲೋಕದ ಬಹುಬೇಡಿಕೆಯ ನಟಿ ದೀಪಿಕಾ ಪಡುಕೋಣೆ. ಅವರ ಹೆಸರು ಕೇಳಿದರೆ ಸಾಕು, ಅಭಿಮಾನಿಗಳ ಹೃದಯ ಜುಮ್ಮೆನ್ನುತ್ತದೆ. ಸೂಪರ್ಸ್ಟಾರ್ ಶಾರುಖ್ ಖಾನ್ ನಟನೆಯ 'ಜವಾನ್' ಚಿತ್ರದಲ್ಲಿ ತಮ್ಮ ಅದ್ಭುತ ನಟನೆಯಿಂದ ಮೋಡಿ ಮಾಡಿದ್ದ ತಾರೆ ಮತ್ತೊಮ್ಮೆ ದೊಡ್ಡ ಪರದೆಯ ಮೇಲೆ ಮಿಂಚಲು ಸಜ್ಜಾಗಿದ್ದಾರೆ. ಇವರು ಅತೀ ಶೀಘ್ರದಲ್ಲಿ ನಟ ಹೃತಿಕ್ ರೋಷನ್ ಮತ್ತು ಅನಿಲ್ ಕಪೂರ್ ನಟನೆಯ ಫುಲ್ ಆ್ಯಕ್ಷನ್ ಸಿನಿಮಾ 'ಫೈಟರ್'ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಈ ಮಧ್ಯೆ ಚಿತ್ರದ ಶೂಟಿಂಗ್ನಿಂದ ನಟಿಯ ಫೋಟೋಗಳು ವೈರಲ್ ಆಗುತ್ತಿದೆ. ಫೈಟರ್ ಚಿತ್ರೀಕರಣ ಸದ್ಯ ಇಟಲಿಯಲ್ಲಿ ನಡೆಯುತ್ತಿದೆ. ಇಟಲಿಯ ಫೀ ಬೀಚ್ನ ಸಿಇಒ ಮತ್ತು ಸಂಸ್ಥಾಪಕರೊಂದಿಗೆ ದೀಪಿಕಾ ಪಡುಕೋಣೆ ತೆಗೆದ ಸೆಲ್ಫಿ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ. ಫುಲ್ ಆ್ಯ ಕ್ಷನ್ ಚಿತ್ರದಲ್ಲಿ ದೀಪಿಕಾ ವಿಭಿನ್ನ ಲುಕ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇಟಲಿಯಲ್ಲಿ ಫೈಟರ್ ಹಾಡಿನ ಚಿತ್ರೀಕರಣದಿಂದ ಫೋಟೋ ವೈರಲ್ ಆಗಿದೆ.
ಮೋಷನ್ ಪೋಸ್ಟರ್ ಅನಾವರಣ:ಈ ವರ್ಷ ಸ್ವಾತಂತ್ರ್ಯೋತ್ಸವದಂದು 'ಫೈಟರ್' ಮೋಷನ್ ಪೋಸ್ಟರ್ ಅನ್ನು ಬಿಡುಗಡೆ ಮಾಡಲಾಗಿತ್ತು. ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟರ್ ಹಂಚಿಕೊಂಡಿದ್ದ ಹೃತಿಕ್ ರೋಷನ್, "ಸ್ಪಿರಿಟ್ ಆಫ್ ಫೈಟರ್, ವಂದೇ ಮಾತರಂ, ಮುಂದಿನ ಗಣರಾಜ್ಯೋತ್ಸವ ಸಂದರ್ಭ ನಿಮ್ಮನ್ನು ಚಿತ್ರಮಂದಿರದಲ್ಲಿ ಭೇಟಿಯಾಗುತ್ತೇನೆ. 2024 ರ ಜನವರಿ 15 ರಂದು ವಿಶ್ವಾದ್ಯಂತ ಚಿತ್ರಮಂದಿರಗಳಲ್ಲಿ ಫೈಟರ್ ಸಿನಿಮಾ ತೆರೆಕಾಣಲಿದೆ'' ಎಂದು ಬರೆದುಕೊಂಡಿದ್ದರು.