ಡಾರ್ಲಿಂಗ್​ ಕೃಷ್ಣರ 'ಶುಗರ್​ ಫ್ಯಾಕ್ಟರಿ'ಗೆ ನಿಖಿಲ್​ ಕುಮಾರಸ್ವಾಮಿ ಸಾಥ್​

Sugar Factory trailer: ಡಾಲಿಂಗ್​ ಕೃಷ್ಣ ನಟನೆಯ 'ಶುಗರ್​ ಫ್ಯಾಕ್ಟರಿ' ಸಿನಿಮಾದ ಟ್ರೇಲರ್​ ಬಿಡುಗಡೆಯಾಗಿದೆ.

ಕನ್ನಡ ಚಿತ್ರರಂಗದಲ್ಲಿ ಈ ವರ್ಷದ ಬಹುನಿರೀಕ್ಷಿತ ಸಿನಿಮಾ 'ಶುಗರ್​ ಫ್ಯಾಕ್ಟರಿ'. ಶೀರ್ಷಿಕೆ ಮತ್ತು ಹಾಡುಗಳಿಂದಲೇ ಚಿತ್ರ ಸುದ್ದಿಯಾಗುತ್ತಿದೆ. 'ಕೌಸಲ್ಯ ಸುಪ್ರಜಾ ರಾಮ' ಸೂಪರ್​ ಹಿಟ್​ ಬಳಿಕ ಡಾರ್ಲಿಂಗ್​ ಕೃಷ್ಣ ನಟಿಸುತ್ತಿರುವ ಸಿನಿಮಾವಿದು. ದೀಪಕ್​ ಅರಸ್​ ನಿರ್ದೇಶನದ ಈ ಚಿತ್ರಕ್ಕೆ ಲವ್ಲೀ ಸ್ಟಾರ್​ ಪ್ರೇಮ್​ ಮತ್ತು ನಿಖಿಲ್​ ಕುಮಾರಸ್ವಾಮಿ ಬೆಂಬಲ​ ಸಿಕ್ಕಿದೆ. ಚಿತ್ರದ ಟ್ರೇಲರ್​ ಅನ್ನು ನಿಖಿಲ್​ ಬಿಡುಗಡೆಗೊಳಿಸಿ ಮೆಚ್ಚಿಕೊಂಡರು. ಸದ್ಯ ಆನಂದ್​ ಆಡಿಯೋ ಮೂಲಕ ಅನಾವರಣಗೊಂಡ ಟ್ರೇಲರ್‌ಗೆ​ ಪ್ರೇಕ್ಷಕರಿಂದ ಉತ್ತಮ ರೆಸ್ಪಾನ್ಸ್​ ಸಿಕ್ಕಿದೆ.

ನಿರ್ದೇಶಕ ದೀಪಕ್​ ಅರಸ್ ಮಾತನಾಡಿ​, "ಶುಗರ್​ ಫ್ಯಾಕ್ಟರಿ' ಎಂದರೆ ಒಂದು ಪಬ್​ನ ಹೆಸರು. ಚಿತ್ರದಲ್ಲಿ ಪಬ್​ ಕೂಡ ಒಂದು ಪಾತ್ರ. ಹಾಗಾಗಿ ನಮ್ಮ ಸಿನಿಮಾಗೆ 'ಶುಗರ್​ ಫ್ಯಾಕ್ಟರಿ' ಎಂದು ಹೆಸರಿಟ್ಟಿದ್ದೇವೆ. ಹಾಗಂತ ನಮ್ಮ ಚಿತ್ರದಲ್ಲಿ ಬರೀ ಹಾಡು, ಕುಣಿತ, ಕುಡಿತ ಅಷ್ಟೇ ಅಲ್ಲ. ಇದೊಂದು ಸುಮಧುರ ಪ್ರೇಮ ಕಾವ್ಯ. ಆ್ಯಕ್ಷನ್​ ಹಾಗೂ ಸೆಂಟಿಮೆಂಟ್​ ಸನ್ನಿವೇಶಗಳು ಜನರ ಮನಸ್ಸಿಗೆ ಹತ್ತಿರವಾಗುತ್ತದೆ. ಒಟ್ಟಿನಲ್ಲಿ ಈಗಿನ ಜನತೆ ಯಾವ ಮನರಂಜನೆ ಬಯಸುತ್ತಾರೋ, ಅದೆಲ್ಲವೂ ಚಿತ್ರದಲ್ಲಿದೆ" ಎಂದರು.

ಬಳಿಕ ಡಾರ್ಲಿಂಗ್​ ಕೃಷ್ಣ ಮಾತನಾಡುತ್ತಾ, "ಲವ್​ ಮಾಕ್ಟೇಲ್​' ಚಿತ್ರದ ನಂತರ ಕೇಳಿದ ಕಥೆ ಇದು. ನಾನು ಲವ್​ ಮಾಕ್ಟೇಲ್​ ಚಿತ್ರದ ಆಡಿಷನ್​ನಲ್ಲಿ ಯುವ ಜನತೆ ಈಗ ಯಾವ ರೀತಿ ಕಥೆ ಇಷ್ಟಪಡುತ್ತಾರೆ ಎಂದು ಕೇಳುತ್ತಿದೆ. ಅದೇ ತರಹದ ಕಥೆಯನ್ನು ದೀಪಕ್​ ಮಾಡಿದ್ದಾರೆ. ಚಿತ್ರ ಚೆನ್ನಾಗಿ ಬಂದಿದೆ" ಎಂದು ಹೇಳಿದರು.

ಟ್ರಯಾಂಗಲ್ ಲವ್‌ ಸ್ಟೋರಿ: 'ಶುಗರ್ ಫ್ಯಾಕ್ಟರಿ' ಟ್ರಯಾಂಗಲ್ ಲವ್‌ ಸ್ಟೋರಿ ಸುತ್ತ ಸುತ್ತುತ್ತದೆ. ಡಾರ್ಲಿಂಗ್​ ಕೃಷ್ಣ ಸೋನಾಲ್‌ ಮಾಂಟೆರೋ, ಅದ್ವಿತಿ‌ ಶೆಟ್ಟಿ ಮತ್ತು ರುಹಾನಿ ಶೆಟ್ಟಿ ಜೊತೆ ರೊಮ್ಯಾನ್ಸ್​ ಮಾಡಿದ್ದಾರೆ. ಸಿನಿಮಾ‌ದ ಚಿತ್ರೀಕರಣ ಮುಕ್ತಾಯವಾದ ಬೆನ್ನಲ್ಲೇ ರೀ ರೆಕಾರ್ಡಿಂಗ್ ಕೆಲಸಗಳು ಶುರುವಾಗಿವೆ. ರಂಗಾಯಣ ರಘು, ಗೋವಿಂದೇ ಗೌಡ, ಕಾಮಿಡಿ ಕಿಲಾಡಿಗಳು ಖ್ಯಾತಿಯ ಸೂರಜ್ ಸೇರಿದಂತೆ ಹಲವು ಕಲಾವಿದರಿದ್ದಾರೆ. ಗೋವಾ, ಬೆಂಗಳೂರು, ಮೈಸೂರು ಹಾಗೂ ಕಜಕಿಸ್ಥಾನದಲ್ಲಿ ‍55 ದಿನಗಳ ಚಿತ್ರೀಕರಣ ನಡೆದಿದೆ. ಅದ್ಧೂರಿ ಸೆಟ್​ಗಳು ಚಿತ್ರದ ಪ್ರಮುಖ ಆಕರ್ಷಣೆ. ಡಾರ್ಲಿಂಗ್ ಕೃಷ್ಣ ಈವರೆಗೂ ಅಭಿನಯಿಸಿರುವ ಚಿತ್ರಗಳಿಗೆ ಹೋಲಿಸಿದರೆ 'ಶುಗರ್ ಫ್ಯಾಕ್ಟರಿ' ಅಪಾರ ವೆಚ್ಚದಲ್ಲಿ ನಿರ್ಮಾಣವಾಗುತ್ತಿರುವ ಚಿತ್ರ ಎನ್ನಲಾಗುತ್ತಿದೆ.

'ಶುಗರ್​ ಫ್ಯಾಕ್ಟರಿ'

ಖ್ಯಾತ ಸಾಹಿತಿಗಳಾದ ಜಯಂತ್ ಕಾಯ್ಕಿಣಿ, ಯೋಗರಾಜ್ ಭಟ್, ಚೇತನ್ ಕುಮಾರ್, ಚಂದನ್ ಶೆಟ್ಟಿ, ಅರಸು ಅಂತಾರೆ, ರಾಘವೇಂದ್ರ ಕಾಮತ್, ಗೌಸ್ ಫಿರ್ ಚಿತ್ರದ ಹಾಡುಗಳನ್ನು ರಚಿಸಿದ್ದಾರೆ. ಯೋಗಾನಂದ್ ಹಾಗೂ ಚೇತನ್ ಕುಮಾರ್ ಸಂಭಾಷಣೆ ಬರೆದಿದ್ದಾರೆ. ಸಂತೋಷ್ ರೈ ಪಾತಾಜೆ ಛಾಯಾಗ್ರಹಣ, ಕೆ.ಎಂ.ಪ್ರಕಾಶ್ ಸಂಕಲನ, ಧನಂಜಯ್ ನೃತ್ಯ ನಿರ್ದೇಶನ ಹಾಗೂ ಅರ್ಜುನ್ ಅವರ ಸಾಹಸ ನಿರ್ದೇಶನವಿದೆ. ‌ಬಾಲಮಣಿ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ಗಿರೀಶ್ ಆರ್ ಬಂಡವಾಳ ಹಾಕಿದ್ದಾರೆ. ನವೆಂಬರ್​ 24ರಂದು ಚಿತ್ರ ತೆರೆ ಕಾಣಲಿದೆ.

ಇದನ್ನೂ ಓದಿ:'ಶುಗರ್​ ಫ್ಯಾಕ್ಟರಿ'ಗಾಗಿ ಕಝಾಕಿಸ್ತಾನ್​ನಲ್ಲಿ ಸೋನಾಲ್​ ಜೊತೆ ಡಾರ್ಲಿಂಗ್​ ಕೃಷ್ಣ ರೊಮ್ಯಾನ್ಸ್​