ಸಿನಿಮಾ ಈವೆಂಟ್ಗಳಲ್ಲಿ ವಿಚಿತ್ರ ವರ್ತನೆ ಮೂಲಕ ಸುದ್ದಿಯಾಗುವ ತಮಿಳು ನಟ ಕೂಲ್ ಸುರೇಶ್ (Cool Suresh) ಮತ್ತೊಮ್ಮೆ ವಿವಾದವನ್ನು ಮೈಮೇಲೆ ಎಳೆದುಕೊಂಡಿದ್ದಾರೆ. ತಮಿಳು ನಟನ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದು, ತೀವ್ರ ಖಂಡನೆ ವ್ಯಕ್ತವಾಗಿದೆ.
ನಿರೂಪಕಿಗೆ ಬಲವಂತವಾಗಿ ಹೂವಿನ ಹಾರ ಹಾಕಿದ ನಟ:ಇತ್ತೀಚೆಗೆ ಸರಕ್ಕು ಸಿನಿಮಾದ ಆಡಿಯೋ ಲಾಂಚ್ ಈವೆಂಟ್ನಲ್ಲಿ ತಮಿಳು ನಟ ಕೂಲ್ ಸುರೇಶ್ ಭಾಗಿಯಾಗಿದ್ದರು. ಕಾರ್ಯಕ್ರಮದಲ್ಲಿ ನಟ ಮಾತನಾಡುತ್ತಿದ್ದ ವೇಳೆ ವೇದಿಕೆಯಲ್ಲಿದ್ದ ನಿರೂಪಕಿಗೆ ಬಲವಂತವಾಗಿ ಹೂವಿನ ಹಾರ ಹಾಕಿ ವಿವಾದದ ಕೇಂದ್ರಬಿಂದುವಾಗಿದ್ದಾರೆ. ಈ ಬಗ್ಗೆ ನೆಟ್ಟಿಗರಿಂದ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.
ವೈರಲ್ ವಿಡಿಯೋದಲ್ಲೇನಿದೆ?ಸರಕ್ಕು ಸಿನಿಮಾದ ಆಡಿಯೋ ಲಾಂಚ್ ಈವೆಂಟ್ನಲ್ಲಿ ಮಾತನಾಡುತ್ತಿದ್ದ ವೇಳೆ, ಕೂಲ್ ಸುರೇಶ್ ಅವರು ಪಕ್ಕದಲ್ಲೇ ನಿಂತಿದ್ದ ನಿರೂಪಕಿಗೆ ಹಾರ ಹಾಕಿ ಎಲ್ಲರನ್ನೂ ಅಚ್ಚರಿಗೊಳಿಸಿದರು. ಇದನ್ನು ತಮ್ಮ ಮೆಚ್ಚುಗೆ ಎಂದು ನಟ ಸಮಜಾಯಿಷಿ ಕೊಟ್ಟರು. ಆದ್ರೆ ಅನಿರೀಕ್ಷಿತ ಘಟನೆಯಿಂದ ನಿರೂಪಕಿ ಅಸಮಧಾನಗೊಂಡಿದ್ದಾರೆಂಬುದು ವಿಡಿಯೋದಲ್ಲಿ ಸ್ಪಷ್ಟವಾಗಿ ಕಾಣುತ್ತದೆ.
ಸಹನಟ ಮನ್ಸೂರ್ ಅಲಿ ಖಾನ್ ಕ್ಷಮೆಯಾಚನೆ:ನಂತರ ಸಹನಟ ಮನ್ಸೂರ್ ಅಲಿ ಖಾನ್ ವೇದಿಕೆಗೆ ಆಗಮಿಸಿ, ನಟ ಕೂಲ್ ಸುರೇಶ್ ಅವರ ವರ್ತನೆಗೆ ಕ್ಷಮೆಯಾಚಿಸಿದ್ದಾರೆ. ಕೂಲ್ ಸುರೇಶ್ ಮಾಡಿದ್ದು ತಪ್ಪು ಎಂದು ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆಯಾಗಿ, ಕೂಲ್ ಸುರೇಶ್ ಕೂಡ ತಮ್ಮ ವರ್ತನೆಗೆ ಕ್ಷಮೆಯಾಚಿಸಿದ್ದಾರೆ. ಅದಾಗ್ಯೂ ಘಟನೆ ಆನ್ಲೈನ್ನಲ್ಲಿ ಚರ್ಚೆಯ ವಿಷಯವಾಗಿದೆ. ನಟ ಕೂಲ್ ಸುರೇಶ್ ಅವರನ್ನು ಟೀಕಿಸಲಾಗಿದೆ. ಹಲವರು ಈ ಘಟನೆಯನ್ನು ಕಿರುಕುಳ ಎಂದು ಕರೆದಿದ್ದಾರೆ.