'ಕೆಜಿಎಫ್' ಖ್ಯಾತಿಯ ನಿರ್ದೇಶಕ ಪ್ರಶಾಂತ್ ನೀಲ್ ಆ್ಯಕ್ಷನ್ ಕಟ್ ಹೇಳಿರುವ 'ಸಲಾರ್' ಇತ್ತೀಚೆಗೆ ತೆರೆಗೆ ಬಂದಿತ್ತು. ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ಅಭಿನಯದ ಸಿನಿಮಾಗೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಬಾಕ್ಸ್ ಆಫೀಸ್ ಅಂಕಿಅಂಶಗಳಿಂದಲೂ ಸಿನಿಮಾ ಎಲ್ಲರ ಹುಬ್ಬೇರಿಸಿದೆ. ಇದೀಗ ಚಿತ್ರತಂಡ ಎಕ್ಸ್‌ಕ್ಲೂಸಿವ್ ಚಿಟ್ ಚಾಟ್ ವಿಡಿಯೋ ಹಂಚಿಕೊಂಡಿದೆ.
ಸಲಾರ್ ಟೀಮ್ ಚಿಟ್ ಚಾಟ್: ದಕ್ಷಿಣ ಚಿತ್ರರಂಗದ ಬಹುಬೇಡಿಕೆಯ ತಾರೆಯರಾದ ಪೃಥ್ವಿರಾಜ್ ಸುಕುಮಾರನ್, ಶ್ರುತಿ ಹಾಸನ್ ಅಮೋಘ ಅಭಿನಯದಿಂದ ಪ್ರೇಕ್ಷಕರನ್ನು ರಂಜಿಸಿದ್ದಾರೆ. ಇತ್ತೀಚೆಗೆ ಈ ಸಿನಿಮಾದ ಸಕ್ಸಸ್ ಸೆಲೆಬ್ರೇಶನ್ ಕೂಡ ನಡೆದಿತ್ತು. ಈ ಹಿನ್ನೆಲೆಯಲ್ಲಿ ನಟಿ ಶ್ರುತಿ ಹಾಸನ್ ತಮ್ಮ ಸಹನಟರಾದ ಪ್ರಭಾಸ್ ಮತ್ತು ಪೃಥ್ವಿರಾಜ್ ಸುಕುಮಾರನ್ ಅವರನ್ನು ಸಂದರ್ಶಿಸಿದ್ದಾರೆ.
"ಹೌದು, ಎಲ್ಲರೂ ನಿಮ್ಮನ್ನು ರೆಬೆಲ್ ಸ್ಟಾರ್ ಎಂದು ಏಕೆ ಕರೆಯುತ್ತಾರೆ" ಎಂದು ಶ್ರುತಿ ಪ್ರಶ್ನಿಸಿದಾಗ, ನಕ್ಕ ಪ್ರಭಾಸ್, "ನನ್ನ ಅಂಕಲ್ ರೆಬೆಲ್ ಸ್ಟಾರ್. ಹಾಗಾಗಿ ನನ್ನನ್ನು ರೆಬೆಲ್ ಸ್ಟಾರ್ ಎಂದು ಕರೆಯುತ್ತಾರೆ" ಎಂದರು. ನಂತರ, "ಈ ಸಿನಿಮಾದಲ್ಲಿ ನನಗೆ ಪೃಥ್ವಿರಾಜ್ ಜೊತೆ ಯಾವುದೇ ಸೀನ್ ಇಲ್ಲ. ನಿಮ್ಮ ಜೊತೆ ಕೆಲವು ಸೀನ್ಗಳಿವೆ. ನಿಮ್ಮಿಬ್ಬರ (ಪ್ರಭಾಸ್-ಪೃಥ್ವಿರಾಜ್) ನಡುವೆ ಹಲವು ಸೀನ್ಗಳಿವೆ" ಎಂದಾಗ, ಪ್ರಭಾಸ್ ಕೂಡಲೇ ಕೌಂಟರ್ ಕೊಟ್ಟರು. "ಹೌದು, ನಿಮಗಿಂತ ಪೃಥ್ವಿರಾಜ್ ಜೊತೆ ಹೆಚ್ಚು ದೃಶ್ಯಗಳಿವೆ" ಎಂದು ಹೇಳಿ ನಕ್ಕರು. ಇದಕ್ಕೆ ಶ್ರುತಿ ಹಾಸನ್ ಚಿತ್ರದಲ್ಲಿ "ರೊಮ್ಯಾನ್ಸ್ಗಿಂತ ಬ್ರೋಮ್ಯಾನ್ಸ್" ಇದೆ ಎಂದು ಕಾಲೆಳೆದರು.