2023ರ ಬಹುನಿರೀಕ್ಷಿತ ಚಿತ್ರ 'ಚಂದ್ರಮುಖಿ 2' ಇಂದು ತೆರೆ ಕಂಡಿದೆ. ಖ್ಯಾತ ನಿರ್ದೇಶಕ, ನಟ ಹಾಗೂ ಸ್ಟಾರ್ ಕೊರಿಯೋಗ್ರಾಫರ್ ರಾಘವ ಲಾರೆನ್ಸ್ ಮತ್ತು ಬಾಲಿವುಡ್ ನಟಿ ಕಂಗನಾ ರಣಾವತ್ ನಟನೆಗೆ ಪ್ರೇಕ್ಷಕರು ಫುಲ್ ಮಾರ್ಕ್ಸ್ ಕೊಟ್ಟಿದ್ದಾರೆ. ಹಿರಿಯ ನಿರ್ದೇಶಕ ಪಿ. ವಾಸು ನಿರ್ದೇಶನದಲ್ಲಿ ಮೂಡಿಬಂದ ಈ ಹಾರರ್ ಕಾಮಿಡಿ ಸಿನಿಮಾಗೆ ಉತ್ತಮ ಬೆಂಬಲಸಿಕ್ಕಿದೆ. ಈಗಾಗಲೇ ಚಿತ್ರ ವೀಕ್ಷಿಸಿದ ಪ್ರೇಕ್ಷಕರು ಸೋಷಿಯಲ್ ಮೀಡಿಯಾದಲ್ಲಿ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.
ಪ್ರೇಕ್ಷಕರು ಹೇಳಿದ್ದೇನು?:ಫಸ್ಟ್ ಶೋ ನೋಡಿದ ಕೆಲವರು ಸಿನಿಮಾ ಡೀಸೆಂಟ್ ಆಗಿದೆ ಎಂದಿದ್ದಾರೆ. ಹಾರರ್ ದೃಶ್ಯಗಳು ಹಾಗೂ ದ್ವಿತಿಯಾರ್ಧ ತುಂಬಾ ಚೆನ್ನಾಗಿದೆ. ಅದರಲ್ಲೂ ನಟಿ ಕಂಗನಾ ರಣಾವತ್ ಅಭಿನಯ ಅದ್ಭುತವಾಗಿದೆ ಎಂದು ನೆಟ್ಟಿಗರು ಎಕ್ಸ್ನಲ್ಲಿ ಬರೆದುಕೊಂಡಿದ್ದಾರೆ. ಸಿನಿಮಾ ನೋಡಿದ ಮತ್ತೊಬ್ಬರು ಮೊದಲಾರ್ಧ ತುಂಬಾ ಮನರಂಜನೆಯಿಂದ ಕೂಡಿತ್ತು. ಹಾಸ್ಯ ನಟ ವಡಿವೇಲು ಅವರ ಹಾಸ್ಯ ನಗು ತರಿಸಿತು ಎಂದಿದ್ದಾರೆ.
ಅದರಲ್ಲೂ ಚಿತ್ರದಲ್ಲಿ ರಾಘವ ಲಾರೆನ್ಸ್ ಪಾತ್ರಕ್ಕಿಂತ ಹೆಚ್ಚಾಗಿ ಬಾಲಿವುಡ್ ಬೆಡಗಿ ಕಂಗನಾ ರಣಾವತ್ ಬಗ್ಗೆಯೇ ಹೆಚ್ಚು ಚರ್ಚೆಯಾಗುತ್ತಿದೆ. ಅವರ ಸ್ಕ್ರೀನ್ ಪ್ರೆಸೆನ್ಸ್ ತುಂಬಾ ಚೆನ್ನಾಗಿದೆ. ಅವರ ನಟನೆ ಸಿನಿಮಾಗೆ ಪ್ಲಸ್ ಪಾಯಿಂಟ್ ಎನ್ನಲಾಗಿದೆ. ಅದೂ ಅಲ್ಲದೇ ಈ ಸಿನಿಮಾ ಮೂಲಕ ಕಂಗನಾ ಸೌತ್ ಇಂಡಸ್ಟ್ರಿಗೆ ಗ್ರ್ಯಾಂಡ್ ರೀ ಎಂಟ್ರಿ ಕೊಟ್ಟಿದ್ದಾರೆ ಎಂಬುದು ಪ್ರೇಕ್ಷಕರ ಅಭಿಪ್ರಾಯ.
ಚಂದ್ರಮುಖಿ 2 ಕಥೆಯೇನು?: ಚಂದ್ರಮುಖಿ 2 ವರ್ತಮಾನ ಮತ್ತು ಭೂತಕಾಲದ ಸನ್ನಿವೇಶಗಳ ಕಥಾ ಹಂದರ ಹೊಂದಿದೆ. ಕುಟುಂಬವೊಂದು ಅರಮನೆಯೊಳಗೆ ಪ್ರವೇಶಿಸುತ್ತದೆ. ಅಲ್ಲಿ ಚಂದ್ರಮುಖಿಯ ಆತ್ಮ ನೆಲೆಸಿದೆ. ಚಂದ್ರಮುಖಿ ರಾಜ ವೆಟ್ಟಿಯಾನ್‌ನ ಮೆಚ್ಚಿನ ನರ್ತಕಿ. ಸಿನಿಮಾಗೂ ಮುಂಚೆ ಬಿಡುಗಡೆಯಾಗಿರುವ ಟ್ರೇಲರ್ನಲ್ಲಿ ಇಂಥ ಕುತೂಹಲಕಾರಿ ಅಂಶಗಳನ್ನು ನೀವು ಕಾಣಬಹುದು.