2023ರ ಬಹುನಿರೀಕ್ಷಿತ ಚಿತ್ರಗಳಲ್ಲೊಂದಾದ 'ಚಂದ್ರಮುಖಿ 2'ಸಿನಿಮಾ ನಿನ್ನೆ ಚಿತ್ರಮಂದಿರಗಳಲ್ಲಿ ತೆರೆಕಂಡು ಉತ್ತಮ ಪ್ರದರ್ಶನ ಮುಂದುವರಿಸಿದೆ. ನಟ, ನಿರ್ದೇಶಕ, ಕೊರಿಯೋಗ್ರಾಫರ್ ರಾಘವ ಲಾರೆನ್ಸ್ ಹಾಗೂ ಬಾಲಿವುಡ್ ಕ್ವೀನ್ ಖ್ಯಾತಿಯ ಕಂಗನಾ ರಣಾವತ್ ಅಭಿನಯದ ಚಂದ್ರಮುಖಿ 2 ಬಾಕ್ಸ್ ಆಫೀಸ್ನಲ್ಲಿ ಯೋಗ್ಯ ಅಂಕಿ ಅಂಶ ಹೊಂದಿದೆ.
2005ರಲ್ಲಿ ತೆರೆಕಂಡ ಚಂದ್ರಮುಖಿಯ ಸೀಕ್ವೆಲ್: ದಕ್ಷಿಣ ಚಿತ್ರರಂಗದ ಖ್ಯಾತ ನಿರ್ದೇಶಕ ಪಿ. ವಾಸು ನಿರ್ದೇಶನದ ಈ ಸಿನಿಮಾ ಸೂಪರ್ ಸ್ಟಾರ್ ರಜನಿಕಾಂತ್ ಹಾಗೂ ಬಹುಬೇಡಿಕೆ ನಟಿ ಜ್ಯೋತಿಕಾ ಮುಖ್ಯಭೂಮಿಕೆಯ ಚಂದ್ರಮುಖಿಯ ಸೀಕ್ವೆಲ್. 2005ರಲ್ಲಿ ತೆರೆಕಂಡ ಮೊದಲ ಭಾಗ ಕೂಡ ಯಶಸ್ವಿ ಆಗಿತ್ತು. ಚಂದ್ರಮುಖಿ 2 ಅದರ ಮುಂದುವರಿದ ಭಾಗ. ಬಿಡುಗಡೆ ದಿನಾಂಕ ಮುಂದೂಡಿದ್ದ ಈ ಚಿತ್ರ ಅಂತಿಮವಾಗಿ ಗುರುವಾರದಂದು ಪ್ರೇಕ್ಷಕರಿಗೆ ದರ್ಶನ ಕೊಟ್ಟಿದೆ. ನಿನ್ನೆ ಬಹುಭಾಷೆಗಳಲ್ಲಿ ಹಲವು ಸಿನಿಮಾಗಳು ತೆರೆಕಂಡಿದ್ದು, ಚಂದ್ರಮುಖಿ 2 ಕೂಡ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಯಶ ಕಂಡಿದೆ. ಚಂದ್ರಮುಖಿ 2 ಪ್ಯಾನ್ ಇಂಡಿಯಾ ಸಿನಿಮಾ.
ಚಂದ್ರಮುಖಿ 2 ಕಲೆಕ್ಷನ್:ಚಂದ್ರಮುಖಿ 2 ಚಿತ್ರ ತೆರೆಕಂಡ ಮೊದಲ ದಿನ 7.5 ಕೋಟಿ ರೂ. ಕಲೆಕ್ಷನ್ ಮಾಡಿದೆ. ರಾಘವ ಲಾರೆನ್ಸ್, ಕಂಗನಾ ರಣಾವತ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿರುವ ಹಾರರ್ ಕಾಮಿಡಿ ಸಿನಿಮಾ ಎಲ್ಲಾ ಭಾಷೆಗಳಲ್ಲಿಯೂ ಉತ್ತಮವಾಗಿ ಪ್ರದರ್ಶನ ಕಾಣುತ್ತಿದೆ ಎಂದು ಸಿನಿ ಇಂಡಸ್ಟ್ರಿ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ತಿಳಿಸಿದ್ದಾರೆ.
ತಮಿಳು ಚಿತ್ರಮಂದಿರಗಳಲ್ಲಿ ಚಂದ್ರಮುಖಿ 2 ಸಿನಿಮಾ ಶೇ.51.90 ರಷ್ಟು ಆಕ್ಯುಪೆನ್ಸಿ ದರ (ಥಿಯೇಟರ್ಗಳಲ್ಲಿ ಆಸನ ಭರ್ತಿ/ಪ್ರೇಕ್ಷಕರ ಪ್ರಮಾಣ) ಹೊಂದಿತ್ತು. ತೆಲುಗು ಮತ್ತು ಹಿಂದಿ ಶೋಗಳು ಕ್ರಮವಾಗಿ ಶೇ. 42.65 ಮತ್ತು ಶೇ 12.77 ರಷ್ಟು ಆಸನಗಳು ಭರ್ತಿ ಆಗಿದ್ದವು.