'ಹೊಸ ದ್ವೇಷಿಗರು ಬೇಕಾಗಿದ್ದಾರೆ, ಹಳೇಬರು ನನ್ನನ್ನು ಇಷ್ಟಪಡುತ್ತಿದ್ದಾರೆ' - ಉದ್ಯಮಿ ರಾಜ್ ಕುಂದ್ರಾ ಟ್ವೀಟ್

"ನನಗೆ ಹೊಸ ದ್ವೇಷಿಗಳು ಬೇಕು, ಏಕೆಂದರೆ ಹಳೆಯವರು ನನ್ನನ್ನು ಇಷ್ಟಪಡಲು ಪ್ರಾರಂಭಿಸಿದ್ದಾರೆ" ಎಂದು ಉದ್ಯಮಿ ರಾಜ್ ಕುಂದ್ರಾ ಟ್ವೀಟ್ ಮಾಡಿ ಮತ್ತಷ್ಟು ದ್ವೇಷಿಗಳನ್ನು ಆಹ್ವಾನಿಸಿದ್ದಾರೆ.

ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಅವರ ಪತಿ, ಉದ್ಯಮಿ ರಾಜ್ ಕುಂದ್ರಾ ಅವರು ಸೆಪ್ಟೆಂಬರ್ 9 ರಂದು 47ನೇ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದಾರೆ. ಜನ್ಮದಿನದಂದು ರಾಜ್ ಸಾಮಾಜಿಕ ಮಾಧ್ಯಮದಲ್ಲಿ, ತಮ್ಮ ದ್ವೇಷಿಗಳಿಗೆ​ ಒನ್​ ಲೈನ್​ ಕ್ಯಾಪ್ಷನ್​ ಇರುವ ಪೋಸ್ಟ್ ಮೂಲಕ ತಿರುಗೇಟು ನೀಡಿದ್ದಾರೆ.

ಶುಕ್ರವಾರ ರಾಜ್ ಕುಂದ್ರಾ ಟ್ವೀಟ್ ಮಾಡಿದ್ದಾರೆ. ಡೆನಿಮ್, ಕಪ್ಪು ಜಾಕೆಟ್, ಸಂಪೂರ್ಣ ಮುಖ ಮುಚ್ಚುವ ಮಾಸ್ಕ್​ ಧರಿಸಿರುವ ಫೋಟೋದೊಂದಿಗೆ, ತಮ್ಮ ದ್ವೇಷಿಗಳಿಗೆ ಸಂದೇಶವೊಂದನ್ನು ರವಾನಿಸಿದ್ದಾರೆ. "ನನಗೆ ಹೊಸ ದ್ವೇಷಿಗಳು ಬೇಕು, ಏಕೆಂದರೆ ಹಳೆಯವರು ನನ್ನನ್ನು ಇಷ್ಟಪಡಲು ಪ್ರಾರಂಭಿಸಿದ್ದಾರೆ" ಎಂದು ಟ್ವೀಟ್ ಮಾಡುವ ಮೂಲಕ ಮತ್ತಷ್ಟು ದ್ವೇಷಿಗಳನ್ನು ಆಹ್ವಾನಿಸಿದ್ದಾರೆ.

ಇದಕ್ಕೆ ಟ್ವಿಟರ್​ ಬಳಕೆದಾರರು ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. ರಾಜ್ ದ್ವೇಷಿಗಳನ್ನು ತೊಡೆದುಹಾಕಲು ಬಯಸಿದರೆ "ಗ್ರಹವನ್ನು ಬದಲಿಸಿ" ಎಂದು ಸಲಹೆ ನೀಡುತ್ತಿದ್ದಾರೆ. ಕೆಲವರು ಬಿಗ್ ಬಾಸ್ 16 ಮನೆಗೆ ಪ್ರವೇಶಿಸದಂತೆ ಎಚ್ಚರಿಕೆ ನೀಡುತ್ತಿದ್ದಾರೆ.

ಉದ್ಯಮಿ ರಾಜ್ ಕುಂದ್ರಾ - ನಟಿ ಶಿಲ್ಪಾ ಶೆಟ್ಟಿ

ವರದಿಗಳ ಪ್ರಕಾರ, ಜನಪ್ರಿಯ ರಿಯಾಲಿಟಿ ಶೋ ಬಿಗ್ ಬಾಸ್‌ನ ಹೊಸ ಸೀಸನ್‌ಗಾಗಿ ಕುಂದ್ರಾ ಅವರನ್ನು ಸಂಪರ್ಕಿಸಲಾಗಿದೆ. ರಾಜ್ ಮತ್ತು ಕಾರ್ಯಕ್ರಮದ ತಯಾರಕರ ನಡುವೆ ಚರ್ಚೆಗಳು ನಡೆಯುತ್ತಿವೆ ಎನ್ನಲಾಗಿದೆ.

ಇದನ್ನೂ ಓದಿ:ಕನ್ನಡ ಸಿನಿಮಾ ಇಂಡಸ್ಟ್ರಿ ಚಿಕ್ಕದಲ್ಲ, ಕೆಜಿಎಫ್​​ ಎಲ್ಲೆಡೆ ಸದ್ದು ಮಾಡಿದೆ: ನಟ ಅರ್ಜುನ್ ಸರ್ಜಾ

ಅಶ್ಲೀಲ ವಿಡಿಯೋಗಳನ್ನು ನಿರ್ಮಿಸಿದ ಆರೋಪದ ಮೇಲೆ 2021ರ ಜುಲೈನಲ್ಲಿ ರಾಜ್ ಕುಂದ್ರಾ ಅವರನ್ನು ಬಂಧಿಸಲಾಯಿತು. ಸೆಪ್ಟೆಂಬರ್‌ನಲ್ಲಿ ಜಾಮೀನು ನೀಡಲಾಯಿತು. ಈ ಸಂಬಂಧ ಅವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಅಂದಿನಿಂದ ಅವರು ಸಂಪೂರ್ಣ ಮುಖ ಮುಚ್ಚುವ ಮಾಸ್ಕ್​​ ಧರಿಸಿ ಓಡಾಡುತ್ತಿದ್ದಾರೆ. ಮಾಧ್ಯಮಗಳ ಕಣ್ಣು ತಪ್ಪಿಸುತ್ತಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯರಾಗಿಲ್ಲ.