ಸೂಪರ್‌ಸ್ಟಾರ್ ಶಾರುಖ್ ಖಾನ್ ಅವರ ಆ್ಯಕ್ಷನ್ ಥ್ರಿಲ್ಲರ್ ಪಠಾಣ್ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಊಹೆಗೂ ಮೀರಿ ಅಬ್ಬರಿಸುತ್ತಿದೆ. ಸಿನಿಮಾಗೆ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಸೋಶಿಯಲ್ ಮೀಡಿಯಾದಲ್ಲಿ ಸಿನಿಮಾ ಮತ್ತು ಶಾರುಖ್ ಅಭಿನಯಕ್ಕೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಇತ್ತೀಚೆಗೆ ನೆಟ್ಟಿಗರೋರ್ವರು ಸಾಮಾಜಿಕ ಮಾಧ್ಯಮದಲ್ಲಿ ಪಠಾಣ್ ಚಿತ್ರದ ಬಗ್ಗೆ ಟೀಕೆ ವ್ಯಕ್ತಪಡಿಸಿ, ಆಯುಷ್ಮಾನ್ ಖುರಾನ ಅವರ ಸಿನಿಮಾ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಪಠಾಣ್ ಅನ್ನು ಕೀಳಾಗಿ ಕಂಡಿರುವ ಮತ್ತು ತಮ್ಮ ಚಲನಚಿತ್ರವನ್ನು ಹೊಗಳಿರುವ ಅಭಿಮಾನಿಯ ಟ್ವೀಟ್ ಅನ್ನು ಆಯುಷ್ಮಾನ್ ಖುರಾನ ಗಮನಿಸಿದ್ದು, ಅದಕ್ಕೆ ಸೌಜನ್ಯದಿಂದಲೇ ಪ್ರತಿಕ್ರಿಯಿಸಿದ್ದಾರೆ.
ಮುಬಿನಾ ಕಪಾಸಿ ಎಂಬ ಹೆಸರಿನ ಟ್ವಿಟರ್ ಬಳಕೆದಾರರು, ಪಠಾಣ್ಗೆ ಮೆಚ್ಚುಗೆ ವ್ಯಕ್ತಪಡಿಸದೇ ನಟ ಆಯುಷ್ಮಾನ್ ಖುರಾನ ಅವರ ಸಿನಿಮಾಗಳನ್ನು ನೋಡಿ ಎಂದು ಬರೆದುಕೊಂಡಿದ್ದಾರೆ. 'screw pathaan, ಆ್ಯಕ್ಷನ್ ಹೀರೋ ಸಿನಿಮಾ ನೋಡಿ' ಎಂದು ಹೇಳಿದ್ದಾರೆ. An Action Hero ಆಯುಷ್ಮಾನ್ ನಟನೆಯ ಸಿನಿಮಾ. ಅಭಿಮಾನಿಯ ಈ ಟ್ವೀಟ್ ಅನ್ನು ಆಯುಷ್ಮಾನ್ ಖುರಾನ ಗಮನಿಸಿದ್ದಾರೆ. ಅಭಿಮಾನಿಯ ಮೆಚ್ಚುಗೆಗೆ ನಮ್ರತೆಯಿಂದಲೇ ಉತ್ತರಿಸಿದ್ದಾರೆ. ಇದು ನಟನಿಗೆ ಅಭಿಮಾನಿಗಳ ಹೃದಯವನ್ನು ಗೆಲ್ಲಲು ಸಹಾಯ ಮಾಡಿತು. ಆ್ಯಕ್ಷನ್ ಹೀರೋನನ್ನು ಪ್ರೀತಿಸಿದ್ದಕ್ಕಾಗಿ ಧನ್ಯವಾದಗಳು. ಆದರೆ ಮೊದಲ ಸಾಲನ್ನು (ಪಠಾಣ್ ಬಗೆಗಿನ ಟೀಕೆ) ತಪ್ಪಿಸಬಹುದಿತ್ತು ಎಂದು ಹೇಳಿದ್ದಾರೆ.
ತಮ್ಮ ಅಭಿಮಾನಿಯ ಪೋಸ್ಟ್‌ಗೆ ಆಯುಷ್ಮಾನ್ ಖುರಾನ ನಮ್ರತೆಯಿಂದ ಪ್ರತಿಕ್ರಿಯಿಸಿದ ಕೂಡಲೇ ಅಭಿಮಾನಿಗಳು ನಟನಿಗೆ ಮೆಚ್ಚುಗೆ ವ್ಯಕ್ತಪಡಿಸಿದರು. "ನಿಮ್ಮ ನಮ್ರತೆಗಾಗಿ ನಿಮ್ಮನ್ನು ಪ್ರೀತಿಸುತ್ತೇನೆ" ಎಂದು ಬಳಕೆದಾರರು ಬರೆದಿದ್ದಾರೆ. ಮತ್ತೊರ್ವ ಬಳಕೆದಾರರು, "ಏಕ್ ಹಿ ತೋ ದಿಲ್ ಹೈ ಕಿತ್ನಿ ಬಾರ್ ಜೀತೋಗೆ'' (ಒಂದೇ ಹೃದಯ ಇರೋದು, ಎಷ್ಟು ಬಾರಿ ಗೆಲ್ಲುತ್ತೀರಾ) ಆಯುಷ್ಮಾನ್ ಖುರಾನ ಅವರೇ ಎಂದು ಕಾಮೆಂಟ್ ಮಾಡಿದ್ದಾರೆ. "ಉತ್ತಮ ಆಯುಷ್ಮಾನ್ ಖುರಾನ, ನೀವು ಕೂಡ ನಮ್ಮಂತೆಯೇ ಶಾರುಖ್ ಅವರನ್ನು ಪ್ರೀತಿಸುತ್ತೀರ'' ಎಂದು ಅಭಿಮಾನಿಯೊಬ್ಬರು ಬರೆದಿದ್ದಾರೆ.