ಬಿಡುಗಡೆಯಾಗಿ ಕೇವಲ ಆರು ವಾರಗಳನ್ನು ಪೂರೈಸಿರುವ ಪ್ರಶಸ್ತಿ ವಿಜೇತ ಹಾಲಿವುಡ್ ಸಿನಿಮಾ ನಿರ್ದೇಶಕ ಜೇಮ್ಸ್ ಕ್ಯಾಮರಾನ್ ಅವರ ಬ್ಲಾಕ್‌ಬಸ್ಟರ್ ಸೀಕ್ವೆಲ್ ಅವತಾರ್: ದಿ ವೇ ಆಫ್ ವಾಟರ್ ಬಾಕ್ಸ್ ಆಫೀಸ್ನಲ್ಲಿ ದಾಖಲೆಗಳನ್ನು ನಿರ್ಮಿಸುತ್ತಿದೆ. ಇದೀಗ ಜಾಗತಿಕ ಟಿಕೆಟ್ ಮಾರಾಟದಲ್ಲಿ $2 ಬಿಲಿಯನ್ ದಾಟಿದ್ದು, ಈ ದಾಖಲೆಯನ್ನು ನಿರ್ಮಿಸಿರುವ ಚಿತ್ರಗಳ ಇತಿಹಾಸದಲ್ಲಿಯೇ ಅವತಾರ್ 2 ಆರನೇ ಸಿನಿಮಾ ಎಂಬ ಹೆಗ್ಗಳಿಕೆ ಪಡೆದಿದೆ. ಈ ಗಡಿ ದಾಟಿರುವ ಕೋವಿಡ್ ಸಾಂಕ್ರಾಮಿಕ ಕಾಲಘಟ್ಟದ ಮೊದಲ ಸಿನಿಮಾ ಎನ್ನುವ ಹಿರಿಮೆಯೂ ಇದರದ್ದು.
ಅವತಾರ್, ಅವೆಂಜರ್ಸ್: ಎಂಡ್‌ಗೇಮ್, ಟೈಟಾನಿಕ್, ಸ್ಟಾರ್ ವಾರ್ಸ್: ದಿ ಫೋರ್ಸ್ ಅವೇಕನ್ಸ್ ಮತ್ತು ಅವೆಂಜರ್ಸ್: ಇನ್ಫಿನಿಟಿ ವಾರ್ ಸಿನಿಮಾಗಳು ಈಗಾಗಲೇ ಸೇರಿರುವ ವಿಶೇಷ ಕ್ಲಬ್‌ಗೆ ಸೇರಿಕೊಳ್ಳುವ ಮೂಲಕ ಮೈಲಿಗಲ್ಲನ್ನು ಸೃಷ್ಟಿಸಿದೆ ಅವತಾರ್: ದಿ ವೇ ಆಫ್ ವಾಟರ್. ಈ ಮೂಲಕ ಸಾರ್ವಕಾಲಿಕ ಅತೀ ಹೆಚ್ಚು ಗಳಿಕೆಯ ಆರು ಸಿನಿಮಾಗಳಲ್ಲಿ ಮೂರು ಸಿನಿಮಾಗಳ ಸರದಾರರಾಗಿ ಜೇಮ್ಸ್ ಕ್ಯಾಮರಾನ್ ಹೊರಹೊಮ್ಮಿದ್ದಾರೆ. ಜೇಮ್ಸ್ ಕ್ಯಾಮರಾನ್ ಅವರು $2 ಬಿಲಿಯನ್ ದಾಟಿದ ಮೂರು ಸಿನಿಮಾಗಳ ಏಕೈಕ ನಿರ್ದೇಶಕರು ಕೂಡಾ ಹೌದು.
ಅದಲ್ಲದೇ, ಅವತಾರ್ ಸರಣಿಯಲ್ಲಿ ನೆಯ್ಟಿರಿ ಪಾತ್ರದಲ್ಲಿ ನಟಿಸಿರುವ ಜೊಯ್ ಸಲ್ಡಾನಾ ಅವರದೂ ಒಂದು ದಾಖಲೆ ಇದೆ. $2 ಬಿಲಿಯನ್ ದಾಟಿರುವ ಆರು ಚಿತ್ರಗಳ ಪೈಕಿ ನಾಲ್ಕು ಚಿತ್ರಗಳಲ್ಲಿ ಜೊಯ್ ಸಲ್ಡಾನಾ ಅಭಿನಯಿಸಿದ್ದು, ಹೊಸ ದಾಖಲೆ ಅವರ ಹೆಸರಿಗೆ ಸೇರಿಕೊಂಡಿದೆ. ಅವರು ಅವತಾರ್ ಸಿರೀಸ್ ಮಾತ್ರವಲ್ಲ, ಅವೆಂಜರ್ಸ್: ಎಂಡ್‌ಗೇಮ್ ಮತ್ತು ಅವೆಂಜರ್ಸ್: ಇನ್ಫಿನಿಟಿ ವಾರ್ ಎರಡರಲ್ಲೂ ಕಾಣಿಸಿಕೊಂಡಿದ್ದಾರೆ. ಗಮೋರಾ ಅವರ ಗಾರ್ಡಿಯನ್ಸ್ ಆಫ್ ದಿ ಗ್ಯಾಲಕ್ಸಿ ಪಾತ್ರದಲ್ಲಿ ನಟಿಸಿದ್ದರು.
ಗುರಿ ದಾಟಿ ಮುನ್ನುಗ್ಗಿದ ಸಿನಿಮಾ: ಇನ್ನೊಂದು ಗಮನಾರ್ಹ ವಿಷಯವೆಂದರೆ, ಅವತಾರ್ 2 ಸಿನಿಮಾ ಬಿಡುಗಡೆಗೂ ಮುನ್ನ ನಿರ್ದೇಶಕ ಜೇಮ್ಸ್ ಕ್ಯಾಮರಾನ್ ಅವರು ಗಳಿಕೆಯ ಬಗ್ಗೆ ಹೊಂದಿದ್ದ ಗುರಿ ಮೀರಿ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಗಳಿಸುತ್ತಿದೆಯಂತೆ. ಸಿನಿಮಾದ ಸೀಕ್ವೆಲ್ ಬಿಡುಗಡೆಗೂ ಮುನ್ನ ನಿರ್ದೇಶಕ ಕ್ಯಾಮೆರಾನ್ ಮ್ಯಾಗಜೀನ್ ಒಂದಕ್ಕೆ ನೀಡಿದ್ದ ಸಂದರ್ಶನದಲ್ಲಿ, ಅವತಾರ್ 2 ಸಿನಿಮಾ ಚಲನಚಿತ್ರ ಇತಿಹಾಸದಲ್ಲಿ ಕೆಟ್ಟ ವ್ಯವಹಾರ ಪ್ರಕರಣವನ್ನು ಪ್ರತಿನಿಧಿಸುತ್ತದೆ. ಯಾಕೆಂದರೆ ದಾಖಲೆ ಮುರಿಯಬೇಕಾದರೆ ಈ ಸಿನಿಮಾ ಸಾರ್ವಕಾಲಿಕ ಮೂರು ಅಥವಾ ನಾಲ್ಕು ಅತಿ ಹೆಚ್ಚು ಗಳಿಕೆಯ ಚಲನಚಿತ್ರಗಳಲ್ಲಿ ಒಂದಾಗಬೇಕು. ಆದರೆ ಮುಂಬರುವ ದಿನಗಳಲ್ಲಿ ಆ ಸಾಧನೆಯನ್ನು ಸಾಧಿಸಲು ಇದು ಅತೀ ಹೆಚ್ಚು ಗಳಿಕೆಯ ನಾಲ್ಕನೇ ಮತ್ತು ಐದನೇ ಸಿನಿಮಾಗಳಾದ ಬಾಕ್ಸ್ ಆಫೀಸ್ನಲ್ಲಿ $2.07 ಬಿಲಿಯನ್ ಗಳಿಸಿರುವ ಸ್ಟಾರ್ ವಾರ್: ದ ಫೋರ್ಸ್ ಅವೇಕನ್ಸ್ ಮತ್ತು $2.04 ಬಿಲಿಯನ್ ಗಳಿಸಿರುವ ಅವೇಂಜರ್ಸ್: ಇನ್ಫಿನಿಟಿ ವಾರ್ ಸಿನಿಮಾಗಳನ್ನು ಹಿಂದಿಕ್ಕುತ್ತದೆ ಎಂದು ಹೇಳಿದ್ದರು.