ಭಾರತ ಚಿತ್ರರಂಗದ ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ ಮುಂದಿನ ಬಹುನಿರೀಕ್ಷಿತ ಸಿನಿಮಾ 'ಜೈಲರ್'. ಈ ಸಿನಿಮಾದ ಆಡಿಯೋ ಲಾಂಚ್ಗೆ ಕ್ಷಣಗಣನೆ ಆರಂಭವಾಗಿದೆ. ಇನ್ನು ಕೆಲವೇ ಗಂಟೆಗಳಲ್ಲಿ ಚೆನ್ನೈನಲ್ಲಿ ನಡೆಯಲಿರುವ ಅದ್ಧೂರಿ ಸಮಾರಂಭದಲ್ಲಿ ಜೈಲರ್ ಆಡಿಯೋ ಲಾಂಚ್ ಆಗಲಿದೆ. ಅದಕ್ಕೂ ಮುನ್ನ ಚಿತ್ರ ನಿರ್ಮಾಪಕರು ಪೋಸ್ಟರ್ ಒಂದನ್ನು ಅನಾವರಣಗೊಳಿಸುವ ಮೂಲಕ ಅಭಿಮಾನಿಗಳ ಕುತೂಹಲವನ್ನು ದುಪ್ಪಟ್ಟುಗೊಳಿಸಿದ್ದಾರೆ. ಹೌದು, ಇಂದು ಸನ್ ಪಿಕ್ಚರ್ಸ್, ಜೈಲರ್ ಚಿತ್ರದ ಕುತೂಹಲಕಾರಿ ಪೋಸ್ಟರ್ ಅನಾವರಣಗೊಳಿಸಿದೆ.
ಇಂದು ಸಂಜೆ ಅದ್ಧೂರಿ ಜೈಲರ್ ಆಡಿಯೋ ಲಾಂಚ್ ಈವೆಂಟ್ ಅನ್ನು ಆಯೋಜಿಸಲಾಗಿದೆ. ಆಡಿಯೋ ಲಾಂಚ್ ನೆನಪಿಸುವ ಸಲುವಾಗಿ, ಅಭಿಮಾನಿಗಳ ಕುತೂಹಲ ಹೆಚ್ಚಿಸುವ ನಿಟ್ಟಿನಲ್ಲಿ, ಸಿನಿಮಾ ಪ್ರಚಾರದ ಭಾಗವಾಗಿ ಚಿತ್ರ ತಯಾರಕರು 'ಜೈಲರ್'ನ ಹೊಸ ಪೋಸ್ಟರ್ ಅನ್ನು ಹಂಚಿಕೊಂಡಿದ್ದಾರೆ. ಪೋಸ್ಟರ್ ಶೇರ್ ಮಾಡಿದ ಸನ್ ಪಿಕ್ಚರ್ಸ್ ಬ್ಯಾನರ್ "ನೀವು ಸಿದ್ಧರಿದ್ದೀರಾ?, ಜೈಲರ್ ಆಡಿಯೋ ಲಾಂಚ್ ಎಂದು ಬರೆದುಕೊಂಡಿದೆ". ಜೈಲರ್ ಸಿನಿಮಾದ ಹೊಸ ಪೋಸ್ಟರ್‌ನಲ್ಲಿ ರಜನಿಕಾಂತ್, ಮೋಹನ್ ಲಾಲ್, ಶಿವ ರಾಜ್ಕುಮಾರ್ ಮತ್ತು ಜಾಕಿ ಶ್ರಾಫ್ ಕಾಣಿಸಿಕೊಂಡಿದ್ದಾರೆ.
ಮೊದಲೇ ತಿಳಿಸಿದಂತೆ, ಇಂದು ಸಂಜೆ ನಡೆಯಲಿರುವ ಜೈಲರ್ ಆಡಿಯೋ ಲಾಂಚ್ ಸಮಾರಂಭಕ್ಕೆ ಜನಸಾಗರವನನ್ನು ನಿರೀಕ್ಷಿಸಲಾಗಿದೆ. ತಲೈವಾ ಅವರ ಅಭಿಮಾನಿಗಳಿಗೆ ಅವಕಾಶ ಕಲ್ಪಿಸುವ ನಿಟ್ಟಿನಲ್ಲಿ ಚಿತ್ರ ತಯಾರಕರು ಚೆನ್ನೈನ ನೆಹರು ಒಳಾಂಗಣ ಕ್ರೀಡಾಂಗಣದಲ್ಲಿ ಕಾರ್ಯಕ್ರಮ ಆಯೋಜಿಸಿದ್ದಾರೆ. ಸಂಜೆ 4 ರಿಂದ ಈವೆಂಟ್ ಪ್ರಾರಂಭವಾಗಲಿದೆ. ಆಡಿಯೋ ಲಾಂಚ್ ಕಾರ್ಯಕ್ರಮಕ್ಕೆ ಆಗಮಿಸಲು 1,000 ಪಾಸ್‌ಗಳನ್ನು ಅಭಿಮಾನಿಗಳಿಗೆ ಜೈಲರ್ ತಂಡ ನೀಡಿದೆ. ತಮಿಳು ಚಿತ್ರರಂಗದ ಬಹು ಬೇಡಿಕೆಯ ಸಂಗೀತ ಸಂಯೋಜಕ ಅನಿರುಧ್ ರವಿಚಂದರ್ ಜೈಲರ್‌ಗೆ ಸಂಗೀತ ನೀಡಿದ್ದಾರೆ. ಸಂಜೆ ಸಿನಿಮಾದ ಸಂಗೀತ ಅನಾವರಣಗೊಳ್ಳಲಿದೆ.