ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ ''ಮುಂಗಾರು ಮಳೆ'' ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪ್ರವೇಶಿಸಿ, ಇದೀಗ ಕರ್ನಾಟಕದ ಮನೆ ಮಗಳಾಗಿರುವ ನಟಿ ಪೂಜಾ ಗಾಂಧಿ. ಮೂಲತಃ ಬೆಂಗಾಲಿ ಕುಟುಂಬದವರಾದ ಪೂಜಾ ಗಾಂಧಿ ಅವರಿಗೆ ಕಂಕಣ ಭಾಗ್ಯ ಕೂಡಿ ಬಂದಿದೆ. ಹೌದು, ತಾವು ಪ್ರೀತಿಸಿದವರೊಂದಿಗೆ ಹಸೆಮಣೆ ಏರಲು ಸಜ್ಜಾಗಿದ್ದಾರೆ.
ಮುಂಗಾರು ಮಳೆ, ಕೃಷ್ಣ, ಮಿಲನ, ಗೋಕುಲ, ಬುದ್ಧಿವಂತ, ಅಭಿನೇತ್ರಿ, ಟಾಟಾ ಬಿರ್ಲಾ ಹೀಗೆ ಸಾಕಷ್ಟು ಕನ್ನಡ ಸಿನಿಮಾಗಳಲ್ಲಿ ನಟಿಸಿ ಕನ್ನಡಿಗರ ಮನಗೆದ್ದಿರುವ ನಟಿ ಪೂಜಾ ಗಾಂಧಿ ಕನ್ನಡ ಕಲಿತು ಕನ್ನಡಿಗರ ಪ್ರೀತಿಗೆ ಪಾತ್ರರಾಗಿದ್ದಾರೆ. ನಟಿಯಾಗಿದ್ದ ಸಂದರ್ಭ ಪೂಜಾ ಗಾಂಧಿ ರಾಜಕೀಯಕ್ಕೂ ಎಂಟ್ರಿ ಕೊಟ್ಟಿದ್ದರು. ಇದೀಗ ಕನ್ನಡಿಗನ ಕೈ ಹಿಡಿದು ಕರ್ನಾಟಕದ ಸೊಸೆ ಆಗಲು ಉತ್ತರ ಭಾರತದ ಬೆಡಗಿ ರೆಡಿ ಆಗಿದ್ದಾರೆ.
ಪೂಜಾ ಗಾಂಧಿ ಕೈ ಹಿಡಿಯಲಿರುವ ವರ ಬೆಂಗಳೂರಿನ ಲಾಜೆಸ್ಟಿಕ್ ಕಂಪನಿ ಓನರ್ ವಿಜಯ್ ಎಂಬ ಮಾಹಿತಿ ಇದೆ. ನವೆಂಬರ್ 29 ಅಂದರೆ ನಾಳೆ ಬೆಂಗಳೂರಿನ ಯಲಹಂಕದಲ್ಲಿ ಮಂತ್ರಮಾಂಗಲ್ಯ ಪದ್ಧತಿಯಂತೆ ಮದುವೆ ನಡೆಯಲಿದೆ. ವಿಜಯ್ ಅವರೇ ನಟಿ ಪೂಜಾ ಗಾಂಧಿಯವರಿಗೆ ಕನ್ನಡ ಕಲಿಸಿದ್ದು ಎಂಬ ಮಾಹಿತಿಯೂ ಇದೆ. ಉತ್ತರ ಭಾರತದಿಂದ ಬಂದು ಕನ್ನಡದಲ್ಲಿ ಹಲವಾರು ಸಿನಿಮಾಗಳಲ್ಲಿ ನಟಿಸಿ ಕನ್ನಡಿಗರ ಮನಗೆದ್ದಿರುವ ನಟಿ ಪೂಜಾ ಗಾಂಧಿ, ಕನ್ನಡವನ್ನು ಬಹಳ ಚೆನ್ನಾಗೇ ಮಾತನಾಡುತ್ತಾರೆ.