ಟಾಲಿವುಡ್ ನಟ ವೆಂಕಟೇಶ್ ಅವರಿಗೆ ಆಂಧ್ರ ಪ್ರದೇಶ, ತೆಲಂಗಾಣದಲ್ಲಿ ಮಾತ್ರವಲ್ಲ ಕರ್ನಾಟಕದಲ್ಲೂ ಸಾಕಷ್ಟು ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ನಟನೆಯಿಂದ ಸಾಕಷ್ಟು ಜನಪ್ರಿಯತೆ ಜೊತೆಗೆ ಪ್ರಶಸ್ತಿ ಪುರಸ್ಕಾರಗಳನ್ನೂ ಪಡೆದಿದ್ದಾರೆ. ಅಭಿನಯ ಮಾತ್ರವಲ್ಲ, ಫಿಟ್ನೆಸ್ ವಿಷಯವಾಗಿಯೂ ಇವರು ಸಖತ್ ಫೇಮಸ್. 62ರ ಹರೆಯದಲ್ಲೂ ಸದೃಢ ಮೈಕಟ್ಟು, ಯುವಕರೂ ನಾಚುವಂತಹ ನೋಟ ಹೊಂದಿದ್ದಾರೆ.
ದಕ್ಷಿಣ ಚಿತ್ರರಂಗದಲ್ಲಿ ಸುಮಾರು ನಾಲ್ಕು ದಶಕಗಳಿಂದ ಗುರುತಿಸಿಕೊಂಡಿರುವ ನಟ ವೆಂಕಟೇಶ್ ಅವರ ಪರಿಚಯ ಯಾರಿಗೆ ತಾನೆ ಇಲ್ಲ ಹೇಳಿ. ತೆಲುಗು ಜೊತೆಗೆ ಹಿಂದಿ ಚಲನಚಿತ್ರಗಳಲ್ಲಿಯೂ ಕೆಲಸ ಮಾಡಿದ್ದಾರೆ. ನಟ ವೆಂಕಟೇಶ್ ಅವರು ಪ್ರಸಿದ್ಧ ಚಲನಚಿತ್ರೊದ್ಯಮಿಗಳ ಕುಟುಂಬದಿಂದ ಬಂದವರು. ಸಿನಿಮಾ ಕ್ಷೇತ್ರದಲ್ಲಿ ಗುರುತಿಸಿಕೊಳ್ಳುವ ಯೋಚನೆಯಲ್ಲಿರದ ವೆಂಕಟೇಶ್ ಅವರ ವ್ಯಾಪಾರೋದ್ಯಮದ ಹಿನ್ನೆಡೆ ಬೇರೆಯೇ ದಾರಿಗೆ ಕೊಂಡೊಯ್ತು. ವ್ಯಾಪಾರೋದ್ಯಮದ ಕನಸು ಕಾರ್ಯರೂಪಕ್ಕೆ ಬಾರದ ಹಿನ್ನೆಲೆ, ಸಿನಿಮಾ ಲೋಕದಲ್ಲಿ ದಾರಿ ಸೃಷ್ಟಿಯಾಯಿತು.
ವೆಂಕಟೇಶ್ ಅವರು ತಮ್ಮ ಸಂಬಂಧಿ ರಾಣಾ ದಗ್ಗುಬಾಟಿಯವರನ್ನೂ ಒಳಗೊಂಡಿರುವ ರಾಣಾ ನಾಯ್ಡು (Rana Naidu) ಸೀರಿಸ್ನಲ್ಲಿ ನಟಿಸುತ್ತಿದ್ದಾರೆ. ಸರಣಿಯು ನೆಟ್‌ಫ್ಲಿಕ್ಸ್ನಲ್ಲಿ ಬಿಡುಗಡೆಗೆ ಸಜ್ಜಾಗಿದೆ. ಚಿಕ್ಕಪ್ಪ-ಸೋದರಳಿಯ ತಮ್ಮ ರಾಣಾ ನಾಯ್ಡು ಸರಣಿ ಬಗ್ಗೆ ವಿವಿಧ ವೇದಿಕೆಗಳಲ್ಲಿ ಪ್ರಚಾರ ಮಾಡುತ್ತಿದ್ದಾರೆ. ರಾಣಾ ನಾಯ್ಡು ಸೀರಿಸ್ ಪ್ರಚಾರದ ಸಂದರ್ಶನವೊಂದರಲ್ಲಿ, ವೆಂಕಟೇಶ್ ಅವರು ಹೇಗೆ ನಟರಾದರು, ಸಿನಿಮಾ ಕ್ಷೇತ್ರಕ್ಕೆ ಹೇಗೆ ಎಂಟ್ರಿ ಕೊಟ್ಟರು ಎಂಬುದನ್ನು ಬಹಿರಂಗಪಡಿಸಿದರು. ಹೀರೋ ಆಗಬೇಕೆಂಬುದು ವೆಂಕಟೇಶ್ ಅವರ ಮೂಲ ಯೋಜನೆ ಆಗಿರಲಿಲ್ಲ.