ಕಿಚ್ಚ ಸುದೀಪ್ ಫಿಟ್ನೆಸ್ ಸೀಕ್ರೆಟ್ ಏನ್ ಗೊತ್ತಾ? ಅವರೇ ಹೇಳಿದ್ದಾರೆ ನೋಡಿ.. ಭಾರತೀಯ ಸಿನಿಮಾ ರಂಗದಲ್ಲಿ ಅಭಿನಯದ ಮೂಲಕ ತನ್ನದೇ ಸ್ಟಾರ್‌ಡಮ್ ಹೊಂದಿರುವ ಆರಡಿ ಕಟೌಟ್ ಅಂದ್ರೆ ಕಿಚ್ಚ ಸುದೀಪ್. ಅಭಿನಯ ಚಕ್ರವರ್ತಿ, ಹೆಬ್ಬುಲಿ, ಪೈಲ್ವಾನ್ ಹೀಗೆ ಸಾಕಷ್ಟು ಉಪನಾಮಗಳಿಂದ ಕರೆಸಿಕೊಂಡಿರುವ ಸ್ಟಾರ್‌ಗೆ ಅಪಾರ ಸಂಖ್ಯೆಯ ಅಭಿಮಾನಿಗಳಿದ್ದಾರೆ. ಇವರಲ್ಲಿ ಕಿಚ್ಚನ ಲೈಫ್ ಸ್ಟೈಲ್ ಹಾಗೂ ಫಿಟ್ನೆಸ್ಗೆ ಬೋಲ್ಡ್ ಆದವರೇ ಹೆಚ್ಚು. 51ರ ವಯಸ್ಸಿನಲ್ಲಿಯೂ ಮೋಸ್ಟ್ ಹ್ಯಾಂಡ್ಸಮ್ ಆಗಿ ಕಾಣಿಸುತ್ತಾರೆ. ಇವರ ಫಿಟ್ನೆಸ್ ಸೀಕ್ರೆಟ್ ತಿಳಿದುಕೊಳ್ಳಲು ಅನೇಕರಿಗೆ ಕುತೂಹಲವಿತ್ತು. ಇದೀಗ ಸುದೀಪ್ ಆ ಬಗ್ಗೆಯೇ ಮಾತನಾಡಿದ್ದಾರೆ.
ಸಿನಿಮಾಗಳಲ್ಲದೇ ಕಿಚ್ಚ ಸುದೀಪ್ ಸಖತ್ ಹ್ಯಾಂಡ್ಸಮ್ ಹಾಗೂ ಸ್ಟೈಲಿಶ್ ಆಗಿ ಕಾಣಿಸಿಕೊಳ್ಳೋದು ಬಿಗ್ ಬಾಸ್ ರಿಯಾಲಿಟಿ ಶೋನಲ್ಲಿ. ವಾರದಲ್ಲಿ ಎರಡು ದಿನ ಪ್ರೇಕ್ಷಕರ ಮುಂದೆ ಬರುವ ಕಿಚ್ಚನ ಕಾಸ್ಟ್ಯೂಮ್ನಿಂದ ಹಿಡಿದು ಅವರ ಪರ್ಸಾನಿಲಿಟಿ, ಫಿಟ್ನೆಸ್ ನೋಡುಗರನ್ನು ಆಕರ್ಷಿಸುತ್ತದೆ. ಸದಾ ಎವರ್ಗ್ರೀನ್ ಲುಕ್ನಲ್ಲೇ ಕಾಣುವ ನಟನ ಫಿಟ್ನೆಸ್ ಸೀಕ್ರೆಟ್ ಏನಪ್ಪಾ ಅನ್ನೋದು ಅವರನ್ನು ಪ್ರೀತಿಸುವ ಅಭಿಮಾನಿಗಳ ಪ್ರಶ್ನೆಯಾಗಿತ್ತು. ಈ ಬಗ್ಗೆ ಬಿಗ್ ಬಾಸ್ ಸೀಸನ್ 10ರ ಸಲುವಾಗಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಸುದೀಪ್ ಅವರೇ ಸ್ವತಃ ಮಾಹಿತಿ ಹಂಚಿಕೊಂಡಿದ್ದಾರೆ.
ಕಿಚ್ಚ ತಮ್ಮ ಮೊದಲ 'ಸ್ಪರ್ಶ' ಸಿನಿಮಾದಲ್ಲಿ ಇದ್ದಂತೆಯೇ ಈಗಲೂ ಇದ್ದಾರೆ. ಕೊಂಚ ಮೀಸೆ ಗಡ್ಡ ಬಿಟ್ಟಿದ್ದಾರೆ ಅನ್ನೋದಷ್ಟೇ ವ್ಯತ್ಯಾಸ. ಇತ್ತೀಚೆಗಿನ 'ಪೈಲ್ವಾನ್' ಚಿತ್ರದ ನಂತರ ಜಿಮ್ನಲ್ಲಿ ವರ್ಕೌಟ್ ಶುರು ಮಾಡಿರೋ ಕಾರಣ ಈ ವಯಸ್ಸಿನಲ್ಲೂ ಸಖತ್ ಫಿಟ್ ಆಗಿ ಕಾಣುತ್ತಾರೆ. ಅವರ ಅರೋಗ್ಯದ ಗುಟ್ಟು ಅರೋಗ್ಯಕರ ದಿನಚರಿ.
ಸಾಮಾನ್ಯವಾಗಿ ಸ್ಟಾರ್ ನಟರು ಸಖತ್ ಬ್ಯುಸಿಯಾಗಿರುತ್ತಾರೆ. ಪಾರ್ಟಿ, ಪ್ರೋಗ್ರಾಂ ಅಂತ ಲೇಟ್ ನೈಟ್ ಮನೆ ತಲುಪುತ್ತಾರೆ. ಯಾವಾಗ ಟೈಮ್ ಸಿಗುತ್ತೋ ಆಗ ಜಿಮ್, ಗ್ಯಾಪ್ನಲ್ಲಿ ಊಟ ತಿಂಡಿ ಮಾಡ್ತಾರೆ ಅಂತ ಜನ ಅಂದುಕೊಂಡಿದ್ದಾರೆ. ಯಾಕಂದ್ರೆ, ಕೆಲ ನಟರ ಲೈಫ್ ಸ್ಟೈಲ್ ಕೂಡ ಅದೇ ರೀತಿ ಇರುತ್ತದೆ. ಆದರೆ ಕಿಚ್ಚ ಸುದೀಪ್ ಇದಕ್ಕೆಲ್ಲಾ ತದ್ವಿರುದ್ಧ.
ಇದೇ ನೋಡಿ ಫಿಟ್ನೆಸ್ ಸೀಕ್ರೆಟ್: ಕಿಚ್ಚ ಅವರೇ ಹೇಳುವಂತೆ, ಬೆಳಗ್ಗೆ 5 ಗಂಟೆಗೆ ಎದ್ದು ಆ್ಯಕ್ಟೀವ್ ಆಗಿ 6 ಗಂಟೆ ವೇಳೆಗೆ ಬೆಳಗ್ಗಿನ ಉಪಹಾರ ಮುಗಿಸಿಬಿಡುತ್ತಾರೆ. ಅದಾದ ನಂತರ ಕೊಂಚ ರಿಲ್ಯಾಕ್ಸ್. ಬಳಿಕ ಸಿನಿಮಾ ಕೆಲಸದಲ್ಲಿ ಬ್ಯುಸಿ. 11 ಗಂಟೆ ವೇಳೆಗೆ ಊಟ ಮುಗಿಸಿ ಮತ್ತೆ ಸಿನಿಮಾ ಕೆಲಸ. ಇದರ ನಡುವೆ ಕ್ರಿಕೆಟ್, ಜಿಮ್. ಮಧ್ಯಾಹ್ನದ ವೇಳೆ ನಿದ್ದೆ ಮಾಡೋದು ತೀರಾ ಕಮ್ಮಿಯಂತೆ.
ಸಂಜೆ ವೇಳೆಗೆ ಫ್ಯಾಮಿಲಿ ಇಲ್ಲ, ಸ್ನೇಹಿತರ ಜೊತೆ ಉತ್ತಮ ಸಮಯ ಕಳೆಯುತ್ತಾರೆ. ಕೆಲವೊಮ್ಮೆ ಪಾರ್ಟಿ ಕೂಡ ಮಾಡ್ತಾರೆ. ಆದರೆ ಕಿಚ್ಚನ ಪಾರ್ಟಿ ಸಂಜೆ 6 ರಿಂದ 7 ಗಂಟೆ ಒಳಗೆ ಮುಗಿದುಬಿಡುತ್ತದೆ. ರಾತ್ರಿಯ ಊಟ ಮುಗಿಸಿ ಅರ್ಧ ಗಂಟೆ ಗ್ಯಾಪ್ ಕೊಟ್ಟು ನಿದ್ರೆಗೆ ಜಾರುವ ಕಿಚ್ಚ ಮತ್ತೆ ಮರುದಿನ ಬೆಳಗ್ಗೆ 5 ಗಂಟೆಗೆ ಎದ್ದು ಬಿಡುತ್ತಾರೆ. ದಿನಕ್ಕೆ ಎರಡು ಗಂಟೆ ಜಿಮ್ನಲ್ಲಿ ವರ್ಕೌಟ್ ಮಾಡುತ್ತಾರೆ.
ಸುದೀಪ್ ಅವರು ಹೋಟೆಲ್, ಫಾಸ್ಟ್ ಫುಡ್ಗಳಿಂದ ಕೊಂಚ ದೂರ. ಮನೆಯಲ್ಲಿಯೇ ಮಾಡಿದ ಅಡುಗೆಯನ್ನು ಇಷ್ಟಪಡುತ್ತಾರೆ. ಇಲ್ಲವಾದರೆ ತಮಗೆ ಬೇಕಾದ ಅಡುಗೆಯನ್ನು ತಾವೇ ರೆಡಿ ಮಾಡಿಕೊಳ್ಳುತ್ತಾರೆ. ನಾನ್ವೆಜ್ ಪ್ರಿಯರಾಗಿರುವ ಸುದೀಪ್, ಸುಮಾರು 40ಕ್ಕೂ ಹೆಚ್ಚು ವೆರೈಟಿ ಡಿಶ್‌ಗಳನ್ನು ಮಾಡುತ್ತಾರೆ ಅನ್ನೋದು ಇಂಟ್ರಸ್ಟಿಂಗ್ ವಿಚಾರ.
"ನನಗೆ ಇಲ್ಲಿಯವರೆಗೆ ಸುದೀಪ್ ಎಂಬ ಹೆಸರಿಗಾಗಿ ಸಿನಿಮಾ ಅರಸಿ ಬಂದಿಲ್ಲ. ನಾನು ಫಿಟ್ ಆ್ಯಂಡ್ ಹ್ಯಾಂಡ್ಸಮ್ ಆಗಿರುವುದಕ್ಕೆ ನನಗೆ ಸಿನಿಮಾಗಳ ಅವಕಾಶ ಸಿಗುತ್ತಿದೆ. ಇಲ್ಲದಿದ್ದರೆ, ಬೇರೆ ನಟರು ಫಿಟ್ನೆಸ್ಗೆ ಹೆಚ್ಚು ಒತ್ತು ಕೊಡುತ್ತಾರೆ. ಯಾಕೆ ನಮ್ಮ ನಟರು ಕೊಡಲ್ಲ ಅಂತಾ ನೀವೇ ನನ್ನ ಬಗ್ಗೆ ಸ್ಟೋರಿ ಮಾಡುತ್ತೀರಾ. ನಾನು ಚೆನ್ನಾಗಿ ಕಾಣಲಿಲ್ಲ ಅಂದ್ರೆ ಶೂಟಿಂಗ್ ಟೈಮಲ್ಲಿ ಹೀರೋಯಿನ್ ನನ್ನನ್ನು ನೋಡೋದು ಬಿಟ್ಟು ಪಕ್ಕದಲ್ಲಿರುವ ಫಿಟ್ ಆಗಿರುವ ಬೇರೆಯವರನ್ನು ನೋಡುತ್ತಾರೆ" ಎಂದು ಹಾಸ್ಯಚಟಾಕಿ ಹಾರಿಸಿದರು.
ಇದನ್ನೂ ಓದಿ:ಅ. 8ರಿಂದ ಬಿಗ್ ಬಾಸ್ ಆಟ ಶುರು; 'ಚಾರ್ಲಿ' ಜೊತೆ 17 ಸ್ವರ್ಧಿಗಳು ದೊಡ್ಮನೆಗೆ ಎಂಟ್ರಿ
