ಆಂಧ್ರ ಪೊಲೀಸರ ಕಾರ್ಯಾಚರಣೆ; 6 ಮಂದಿ ನಕ್ಸಲರ ಹತ್ಯೆ

ಆಂಧ್ರಪ್ರದೇಶದ ವಿಶಾಖಪಟ್ಟಣಂನ ಟೆಗಲೆಮೆಟ್ಟಾ ಅರಣ್ಯ ಪ್ರದೇಶದಲ್ಲಿ ಪೊಲೀಸರು ನಡೆಸಿದ ಎನ್‌ಕೌಂಟರ್‌ನಲ್ಲಿ ಆರು ಮಂದಿ ನಕ್ಸಲರು ಹತರಾಗಿದ್ದಾರೆ. ಇನ್ನೂ ಹಲವು ನಕ್ಸಲರು ಇರುವ ಶಂಕೆ ಇದ್ದು, ಕೂಂಬಿಂಗ್‌ ಮುಂದುವರಿದಿದೆ..

ವಿಶಾಖಪಟ್ಟಣಂ(ಆಂಧ್ರಪ್ರದೇಶ): ನಕ್ಸಲ ನಿಗ್ರಹ ಪಡೆ ಹಾಗೂ ಮಾವೋವಾದಿಗಳ ನಡುವೆ ನಡೆದ ಗುಂಡಿನ ಕಾಳಗದ ವೇಳೆ ಆರು ಮಂದಿ ಕೆಂಪು ಉಗ್ರರು ಹತರಾಗಿದ್ದಾರೆ. ಆಂಧ್ರಪ್ರದೇಶದ ವಿಶಾಖಪಟ್ಟಣಂದ ಟೆಗಲೆಮೆಟ್ಟಾ ಅರಣ್ಯ ಪ್ರದೇಶದಲ್ಲಿ ಈ ಘಟನೆ ನಡೆದಿದೆ.

ಓರ್ವ ಹಿರಿಯ ಮಾವೋವಾದಿ ಹಾಗೂ ಮಹಿಳೆ ಸೇರಿದಂತೆ ಆರು ಮಂದಿಯ ಮೃತದೇಹಗಳನ್ನು ಈಗಾಗಲೇ ವಶಕ್ಕೆ ಪಡೆದುಕೊಳ್ಳಲಾಗಿದೆ ಎಂದು ಡಿಜಿಪಿ ಮಾಹಿತಿ ನೀಡಿದ್ದಾರೆ. ಇಂದು ಬೆಳಗ್ಗೆ ಈ ಎನ್​ಕೌಂಟರ್​ ನಡೆದಿದೆ.

ಹತರಾದ ಎಲ್ಲ ಮಾವೋವಾದಿಗಳು ಸಿಪಿಐ ಸಂಘಟನೆಗೆ ಸೇರಿದವರು ಎಂದು ತಿಳಿದು ಬಂದಿದೆ. ಗ್ರೇಹೌಂಡ್ಸ್​ ನಕ್ಸಲ ನಿಗ್ರಹಾ ಪಡೆ ಈ ಕಾರ್ಯಾಚರಣೆಯಲ್ಲಿ ಭಾಗಿಯಾಗಿತ್ತು ಎಂದು ತಿಳಿದು ಬಂದಿದೆ. ಘಟನಾ ಸ್ಥಳದಿಂದ ಎಕೆ-47, ಎಸ್​ಎಲ್​ಆರ್​, ಕಾರ್ಬೈನ್​, ಮೂರು 303 ರೈಫಲ್ಸ್ ಹಾಗೂ ಕಂಟ್ರಿ ಪಿಸ್ತೂಲ್​ ವಶ ಪಡಿಸಿಕೊಳ್ಳಲಾಗಿದೆ. ಸ್ಥಳದಲ್ಲಿ ಹಚ್ಚಿನ ನಕ್ಸಲರು ಇರುವ ಶಂಕೆ ಹಿನ್ನೆಲೆಯಲ್ಲಿ ಹೆಚ್ಚಿನ ಸಿಬ್ಬಂದಿ ನಿಯೋಜನೆ ಮಾಡಲಾಗಿದೆ.