ವರುಣನ ಆರ್ಭಟಕ್ಕೆ ನವುಲೇ ಕ್ರಿಕೆಟ್ ಸ್ಟೇಡಿಯಂ ಸಂಪೂರ್ಣ ಜಲಾವೃತ..

ನಿನ್ನೆ ರಾತ್ರಿ ಸುರಿದ ಭಾರಿ ಮಳೆಯಿಂದಾಗಿ ಶಿವಮೊಗ್ಗದಲ್ಲಿ ನವುಲೇ ಕ್ರೀಡಾಂಗಣ ಎಂದು ಕರೆಯುವ ಕೆಎಸ್​ಸಿಎ ಸ್ಟೇಡಿಯಂ ಸಂಪೂರ್ಣ ಜಲಾವೃತಗೊಂಡಿದೆ.

ಶಿವಮೊಗ್ಗ:ನಿನ್ನೆ ರಾತ್ರಿ ಸುರಿದ ಭಾರಿ ಮಳೆಯಿಂದಾಗಿ ನಗರದ ಹೊರ ವಲದಲ್ಲಿರುವ ಕೆಎಸ್​ಸಿಎ ಕ್ರಿಕೆಟ್ ಸ್ಟೇಡಿಯಂ ಸಂಪೂರ್ಣ ಜಲಾವೃತಗೊಂಡಿದೆ.

26 ಎಕರೆ ವಿಸ್ತೀರ್ಣದಲ್ಲಿರುವ ನವುಲೇ ಕ್ರೀಡಾಂಗಣ ಎಂದು ಕರೆಯುವ ಕೆಎಸ್​ಸಿಎ ಸ್ಟೇಡಿಯಂನಲ್ಲಿ ಅನೇಕ ರಣಜಿ ಪಂದ್ಯಗಳು ಸಹ ನಡೆದಿವೆ. ಆದರೆ, ಇದೀಗ ಭಾರಿ ಮಳೆಯಿಂದಾಗಿ ಸ್ಟೇಡಿಯಂ ಮೈದಾನ ಸಂಪೂರ್ಣ ಜಲಾವೃತಗೊಂಡು ಕೆರೆಯಂತೆ ಕಾಣುತ್ತಿದೆ.

ಈ ಹಿಂದೆ 47 ಎಕರೆ ವಿಸ್ತೀರ್ಣದಲ್ಲಿ ನವುಲೇ ಕೆರೆ ಇತ್ತು. ಆ ಕೆರೆಯ 27 ಎಕರೆ ಭೂಮಿಯನ್ನು ಕೆಎಸ್​ಸಿಎಗೆ ಮಾರಾಟ ಮಾಡಲಾಗಿದೆ. ಉಳಿದ ಕೆರೆ ಜಾಗದ ಮಧ್ಯದಲ್ಲಿ ಶಿವಮೊಗ್ಗದಿಂದ ಹಾನಗಲ್ ಹೋಗುವ ಹೆದ್ದಾರಿ ರಸ್ತೆ ಸಹ ಹಾದು ಹೋಗಿದೆ. ಹಾಗಾಗಿ ಕೆರೆ ಒತ್ತುವರಿಯಾಗಿರುವ ಕಾರಣ ಕೆರೆಗೆ ಬರುವ ನೀರೆಲ್ಲ ಮೈದಾನಕ್ಕೆ ನುಗ್ಗಿ ಕ್ರೀಡಾಂಗಣ ಸಂಪೂರ್ಣ ಜಲಾವೃತಗೊಂಡಿದೆ.