ಕೋವಿಡ್ ಲಾಕ್ ಡೌನ್ ನಂತರ ಚೇತರಿಕೆ ಕಾಣುತ್ತಿರುವ ಪ್ರವಾಸಿ ತಾಣಗಳು

ಲಾಕ್ ಡೌನ್​ನಿಂದಾಗಿ ಜಗತ್ತು ಸ್ತಬ್ಧವಾಗಿತ್ತು. ಇದರಿಂದ ಪ್ರವಾಸಿ ತಾಣಗಳು ತೀವ್ರ ಸಂಕಷ್ಟಕ್ಕೆ ಒಳಗಾಗಿದ್ದವು. ಕೋವಿಡ್ ಲಾಕ್ ಡೌನ್ ನಂತರದಲ್ಲಿ ಪ್ರವಾಸಿ ತಾಣಗಳ ಸ್ವಲ್ಟಮಟ್ಟಿಗೆ ಉಸಿರಾಡ ತೊಡಗಿವೆ ಎಂದರೆ ತಪ್ಪಾಗಲಾರದು. ಈಗ ಪ್ರವಾಸಿ ತಾಣಗಳು ಪ್ರವಾಸಿಗರಿಂದ ಮತ್ತೆ ಚೇತರಿಕೆ ಕಾಣುತ್ತಿವೆ.

ಶಿವಮೊಗ್ಗ:ಕೋವಿಡ್​ನಿಂದಾಗಿ ಪ್ರವಾಸೋದ್ಯಮ ಭಾರಿ ಕುಸಿತ ಕಂಡಿತ್ತು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ನೆರೆಯ ರಾಷ್ಟ್ರಗಳಾದ ಶ್ರೀಲಂಕಾ ಮತ್ತು ನೇಪಾಳ ಆರ್ಥಿಕ ಸಮಸ್ಯೆ ಎದುರಿಸಿದ್ದನ್ನೇ ನಾವು ಕಾಣಬಹುದಾಗಿದೆ. ಪ್ರವಾಸೋದ್ಯಮದಲ್ಲಿ ಇತ್ತಿಚಿನ ದಿನಗಳಲ್ಲಿ ಚೇತರಿಕೆ ಕಂಡು ಬರುತ್ತಿದೆ. ಕೋವಿಡ್​ನ ಕೆಲವು ನಿಯಮಗಳನ್ನು ಪಾಲಿಸಿಕೊಂಡು ಪ್ರವಾಸಿ ತಾಣಗಳನ್ನು ತೆರೆಯಲಾಗಿದೆ.

ಇದರಿಂದ ಪ್ರವಾಸಿ ತಾಣಗಳತ್ತ ಜನರು ಮುಖ ಮಾಡಿದ್ದಾರೆ. ನವೆಂಬರ್​ನಿಂದ ಜನವರಿವರೆಗೆ ಪ್ರವಾಸಕ್ಕೆ ಸೂಕ್ತ ಕಾಲವಾಗಿದ್ದು, ಈ ಸಮಯದಲ್ಲಿ ಪ್ರವಾಸಿಗರ ಸಂಖ್ಯೆಯಲ್ಲಿ ಕೊಂಚ ಏರಿಕೆ ಕಂಡು ಬಂದಿದೆ. ಆದರೆ, ಕೋವಿಡ್​ ಪೂರ್ವಕ್ಕೆ ಹೋಲಿಸಿದರೆ ಶೇಕಡಾ 30 ರಷ್ಟು ಕಡಿಮೆ ಇದೆ ಎಂದು ಪ್ರವಾಸೋದ್ಯಮ ಇಲಾಖೆ ಹೇಳುತ್ತದೆ.

ಕವಿ ಮನೆ, ಜಲಪಾತ, ಬೆಟ್ಟ ಗುಡ್ಡಗಳ ಟ್ರಕ್ಕಿಂಗ್​, ರಿವರ್​ ರ್ಯಾಪ್ಟಿಂಗ್​, ಪಕ್ಷಿಧಾಮ ಮತ್ತು ಪ್ರಾಣಿಧಾಮಗಳಂತಹ 52ಕ್ಕೂ ಹೆಚ್ಚಿನ ಪ್ರವಾಸಿ ತಾಣಗಳನ್ನು ಒಳಗೊಂಡಿರುವ ಶಿವಮೊಗ್ಗದ ಪ್ರವಾಸೋದ್ಯಮದಲ್ಲಿ ಚೇತರಿಕೆ ಕಂಡಿದೆ. ಜೋಗ, ಸಿಗಂದೂರು, ಹುಲಿ- ಸಿಂಹಧಾಮ, ಸಕ್ರೆಬೈಲು ಆನೆ ಬಿಡಾರ. ಶಿವಪ್ಪ ನಾಯಕ ಅರಮನೆ, ಕೆಳದಿ ದೇವಾಲಯ, ಚಂದ್ರಗುತ್ತಿ ದೇವಾಲಯ, ಗುಡವಿ ಪಕ್ಷಿಧಾಮ, ಕುಪ್ಪಳ್ಳಿ ವಸ್ತು ಸಂಗ್ರಹಾಲಯ ಒಳಗೊಂಡಿವೆ. ಈ ಮೇಲಿನ‌ ಎಲ್ಲ ಪ್ರವಾಸಿತಾಣಗಳಿಗೆ ಅತಿ ಹೆಚ್ಚು ಪ್ರವಾಸಿಗರು ಆಗಮಿಸುತ್ತಿದ್ದಾರೆ.

ಹುಲಿ ಮತ್ತು ಸಿಂಹಧಾಮ ಕೋವಿಡ್ ನಂತರದಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚಿದೆ. ಪ್ರತಿ ತಿಂಗಳು ಸರಾಸರಿ 40 ರಿಂದ 50 ಸಾವಿರ ತನಕ ಪ್ರವಾಸಿಗರು ಆಗಮಿಸುತ್ತಿದ್ದಾರೆ. ಈ ವರ್ಷ ನವೆಂಬರ್​ನಲ್ಲಿ 1,81,323, ಡಿಸೆಂಬರ್​ನಲ್ಲಿ 26,228, ಜನವರಿಯಲ್ಲಿ 2,07,551 ಪ್ರವಾಸಿಗರು ಆಗಮಿಸಿದ್ದಾರೆ.

ಜೋಗ ಫಾಲ್ಸ್​ಗೆ ನವೆಂಬರ್​ನಲ್ಲಿ 4,70,712, ಡಿಸೆಂಬರ್​ನಲ್ಲಿ 46,274 ಜನವರಿಯಲ್ಲಿ 5,16,936 ಪ್ರವಾಸಿಗರು ಆಗಮಿಸಿದ್ದಾರೆ‌. ಕೆಳದಿ ದೇವಾಲಯಕ್ಕೆ ನವೆಂಬರ್​ನಲ್ಲಿ 27,568 ಪ್ರವಾಸಿಗರು, ಡಿಸೆಂಬರ್​ನಲ್ಲಿ 3,800 ಹಾಗೂ ಜನವರಿಯಲ್ಲಿ 31,368 ಜನ ಪ್ರವಾಸಿಗರು ಆಗಮಿಸಿದ್ದಾರೆ.

ಪ್ರವಾಸಿಗರನ್ನು ಆಕರ್ಷಿಸಲು ಯೋಜನೆ: ಸದ್ಯ ಶಿವಮೊಗ್ಗ ಜಿಲ್ಲೆಯ ಪ್ರವಾಸಿತಾಣಗಳು ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿವೆ. ಆದರೆ, ಲಾಕ್ ಡೌನ್​ಕ್ಕಿಂತ ಮುಂಚೆ ಇದ್ದ ಪ್ರವಾಸಿಗರಿಗಿಂತ ಶೇ 30 ಪ್ರವಾಸಿಗರ ಕೊರತೆ ಕಂಡು ಬಂದಿದೆ. ಮುಂದಿನ ದಿನಗಳಲ್ಲಿ ಪ್ರವಾಸಿಗರನ್ನು ಹೆಚ್ಷು ಆಕರ್ಷಿಸುವಂತೆ ಮಾಡುತ್ತೇವೆ ಎಂದು ಪ್ರವಾಸೋದ್ಯಮ ಇಲಾಖೆಯ ಜಿಲ್ಲಾ ನಿರ್ದೇಶಕ ಪಾಂಡುರಂಗ ಹೇಳಿದರು.

ಹುಲಿ - ಸಿಂಹಧಾಮಕ್ಕೆ ಹಾಲಿ‌ 3 ಲಕ್ಷ ಪ್ರವಾಸಿಗರು ಆಗಮಿಸುತ್ತಿದ್ದಾರೆ. ಕಾಮಗಾರಿಯೂ ನಡೆಯುತ್ತಿದೆ. ಮುಂದಿನ ದಿನಗಳಲ್ಲಿ ವರ್ಷಕ್ಕೆ 4 ಲಕ್ಷ ಜನ ಆಗಮಿಸುವಂತೆ ಮಾಡಲಾಗುವುದು ಎಂದು ಹುಲಿ- ಸಿಂಹಧಾಮದ ಮುಖ್ಯಾಧಿಕಾರಿ ಮುಕುಂದ್ ಚಂದ್ ತಿಳಿಸಿದ್ದಾರೆ.

ಇದನ್ನೂ ಓದಿ:ಕೊನೆಗೂ ಆ್ಯಸಿಡ್​ ನಾಗನ ಬಂಧನ.. ಖಾವಿ ಧರಿಸಿ ಧ್ಯಾನ ಮಾಡುತ್ತಿದ್ದಾಗಲೇ ಪೊಲೀಸ್ ಬಲೆಗೆ!