ಸಿದ್ದರಾಮಯ್ಯ ಫೋಟೋಗಳು 10 ವರ್ಷಗಳಿಂದ ಸೇಲ್​ ಆಗ್ತಿಲ್ಲ: ಕಟೀಲ್​ ವ್ಯಂಗ್ಯ

ದೆಹಲಿಯ ಅಂಗಡಿಯೊಂದರಲ್ಲಿ ಯಡಿಯೂರಪ್ಪ ಅವರ ಫೋಟೋ ಬೇಗ ಖಾಲಿ ಆಗುತ್ತೆ, ಸಿದ್ದರಾಮಯ್ಯ ಅವರ 10 ವರ್ಷವಾದರೂ ಕೇಳುವವರೇ ಇರುವುದಿಲ್ಲ ಎಂದು ಅಂಗಡಿಯವರು ಹೇಳುತ್ತಾರೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ನಳೀನ್ ಕುಮಾರ್ ಕಟೀಲು ವ್ಯಂಗ್ಯವಾಡಿದರು.

ಶಿವಮೊಗ್ಗ:ಸಾವರ್ಕರ್ ಕುರಿತು ಮಾತನಾಡುವ ಕಾಂಗ್ರೆಸ್​​ ನಾಯಕರು ದೇಶದ್ರೋಹಿಗಳು ಎಂದು ಸಂಸದ ರಾಹುಲ್ ಗಾಂಧಿ ವಿರುದ್ಧ ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಕಿಡಿಕಾರಿದರು.

ಜಿಲ್ಲಾ ಬಿಜೆಪಿ ವಿಶೇಷ ಸಭೆಯಲ್ಲಿ ಅಭಿನಂದನೆ ಸ್ವೀಕರಿಸಿ ಮಾತನಾಡಿದ ಅವರು, ಸಾರ್ವಕರ್ ದೇಶಕ್ಕಾಗಿ ಪ್ರಾಣ ಕೊಟ್ಟರು. ಅಂತಹ ವೀರರ ವಿರುದ್ಧ ಮಾತನಾಡುವುದು ಸರಿಯಲ್ಲ. ಈ ಮೂಲಕ ಕಾಂಗ್ರೆಸ್ ದೇಶದಲ್ಲಿ ಭಯೋತ್ಪಾದನೆಗೆ ಪ್ರಚೋದನೆ ನೀಡುತ್ತಿದೆ ಎಂದು ಹರಿಹಾಯ್ದರು.

ಪೌರತ್ವ ತಿದ್ದುಪಡಿ ಕಾಯಿದೆ ಜಾರಿಯಿಂದ ಭಾರತದ ಮುಸಲ್ಮಾನರಿಗೆ ಅನ್ಯಾಯವಾಗುವುದಿಲ್ಲ. ಬದಲಾವಣೆ ಮತ್ತು ಪರಿವರ್ತನೆ ಬಿಜೆಪಿಯಲ್ಲಿ ಮಾತ್ರ ಸಾಧ್ಯ.‌ ಆದರೆ ಕಾಂಗ್ರೆಸ್​​ನಲ್ಲಿ ವಂಶಾವಳಿ ಆಡಳಿತ ಇದೆ ಎಂದು ಟೀಕಿಸಿದರು.

ಉಪಚುನಾವಣೆಯಲ್ಲಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರ ಪರಿಶ್ರಮದಿಂದಾಗಿಯೇ ಬಿಜೆಪಿ ಗೆಲುವು ಸಾಧಿಸಿದೆ ಎಂದು ನಳಿನ್​ ಕುಮಾರ್​ ಕಟೀಲ್​ ಬಣ್ಣಿಸಿದರು.

ಐದು ನಿಮಿಷದಲ್ಲಿ ಬಿಎಸ್​​ವೈ ಫೋಟೋ ಖಾಲಿ ಆಗುತ್ತೆ: ವ್ಯಂಗ್ಯ

ಸಂಸದನಾದ ಬಳಿಕ ದೆಹಲಿಯಲ್ಲಿ ನೀಡಲಾಗಿರುವ ಮನೆಯಲ್ಲಿ ಗೃಹಪ್ರವೇಶಕ್ಕೆ ಪ್ರಧಾನಿ ಮೋದಿ, ಗೃಹ ಸಚಿವ ಅಮಿತ್​ ಶಾ ಫೋಟೋಗಳಿವೆ. ಯಡಿಯೂರಪ್ಪ ಅವರ ಹಳೆಯ ಫೋಟೋ ಇದೆ. ಆದರೆ, ಹೊಸದು ಬೇಕಾಗಿದೆ ಎಂದು ಆಯನೂರು ಮಂಜುನಾಥ್ ಅವರಿಗೆ ಹೇಳಿದ್ದೆ.

ಫೋಟೋ ಖರೀದಿಸಲು ಮಾರುಕಟ್ಟೆಯಲ್ಲಿ ದೆಹಲಿಯ ಫೋಟೋ ಮಳಿಗೆಯಲ್ಲಿ ಬಿಎಸ್​​​ವೈ ಫೋಟೊ ಕೇಳಿದ್ದೆವು. ಹೀಗೆ 2-3 ಮಳಿಗೆಗಳಲ್ಲಿ ಕೇಳಿದರೂ ಸಿಗಲಿಲ್ಲ. ಮತ್ತೊಂದು ಅಂಗಡಿಯಲ್ಲಿ ಬಿಎಸ್​​​ವೈ ಅವರ ಬದಲಿಗೆ ಸಿದ್ದರಾಮಯ್ಯ ಫೋಟೋ ಕೊಟ್ಟರು.

ನಾವು ಕೇಳಿದ್ದು ಯಾರದು, ನೀವು ಕೊಟ್ಟಿದ್ದು ಯಾರದು ಎಂದು ಪ್ರಶ್ನಿಸಿದಾಗ ಅಂಗಡಿಯವ ಬಿಎಸ್​ವೈ ಫೋಟೋ ಇಲ್ಲ ಸ್ವಾಮಿ. ತಪ್ಪು ತಿಳಿದುಕೊಳ್ಳಬೇಡಿ. ಯಡಿಯೂರಪ್ಪ ಅವರ ಪೋಟೋಗಳು ಅಂಗಡಿಗೆ ಬಂದ ಐದು ನಿಮಿಷದಲ್ಲಿ ಖಾಲಿ ಆಗುತ್ತವೆ. ಆದ್ರೆ, ಸಿದ್ದರಾಮಯ್ಯ ಅವರ ಪೋಟೊಗಳು 10 ವರ್ಷದಿಂದ ಯಾರೂ ಕೇಳುತ್ತಿಲ್ಲ ಎಂದು ಅಂಗಡಿ ಮಾಲೀಕ ಹೇಳಿದರು ಎಂದು ಕಟೀಲ್​ ವ್ಯಂಗ್ಯವಾಡಿದರು.