ಚುನಾವಣೆ ಶಾಯಿ ಬಗ್ಗೆ ಅನುಮಾನ ಬೇಡ, ಗುಣಮಟ್ಟದಲ್ಲಿ ರಾಜಿ ಇಲ್ಲ- ಎಚ್‌.ಎಸ್‌ ವೆಂಕಟೇಶ್‌

ಮೈಸೂರು ಪೇಂಟ್ಸ್ ಅಂಡ್ ವಾರ್ನಿಷ್ ಕಂಪನಿ ಚುನಾವಣೆಗಾಗಿ ತಯಾರು ಮಾಡುವ ಶಾಯಿಯ ಕುರಿತ ಊಹಾಪೋಹಗಳಿಗೆ ಕಂಪೆನಿಯ ಮಾಜಿ ಅಧ್ಯಕ್ಷ ಎಚ್.ಎಸ್. ವೆಂಕಟೇಶ್ ಸ್ಪಷ್ಟೀಕರಣ ಕೊಟ್ಟರು.

ಮೈಸೂರು:ಮತದಾನದ ಸಂದರ್ಭದಲ್ಲಿ ಎಡಗೈ ತೋರು ಬೆರಳಿಗೆ ಹಾಕಲಾಗುವಶಾಯಿಯ ಬಗ್ಗೆ ಎದ್ದಿರುವ ಊಹಾಪೋಹದ ಮಾತುಗಳನ್ನು ನಂಬಬೇಡಿ. ಮೈಸೂರು ಪೇಂಟ್ಸ್ ಅಂಡ್ ವಾರ್ನಿಷ್ ಕಂಪನಿ ಗುಣಮಟ್ಟದ ವಿಚಾರದಲ್ಲಿ ಎಲ್ಲಿಯೂ ಹೊಂದಾಣಿಕೆ ಮಾಡುವುದಿಲ್ಲ ಎಂದು ಮಾಜಿ ಅಧ್ಯಕ್ಷ ಎಚ್.ಎಸ್. ವೆಂಕಟೇಶ್ ತಿಳಿಸಿದರು.

ಪತ್ರಿಕಾ ಭವನದಲ್ಲಿ ಮಾತನಾಡಿದ ಅವರು, ಶಾಯಿಯ ಬಗ್ಗೆ ಎದ್ದಿರುವ ಅನುಮಾನಗಳ ಪ್ರಶ್ನೆಗಳಿಗೆ ಪ್ರತಿಕ್ರಿಯೆ ನೀಡಿದರು. ನಮ್ಮ ಕಂಪೆನಿ ದೇಶಕ್ಕೆ ಪ್ರಜಾಪ್ರಭುತ್ವ ಬಂದಾಗಿನಿಂದಲೂ ಚುನಾವಣಾಗಳಿಗೆ ಅಳಿಸಲಾಗದ ಶಾಯಿಯನ್ನು ಪೂರೈಸುತ್ತಿದೆ. ಇದಲ್ಲದೆ ವಿದೇಶಗಳಲ್ಲಿ ನಡೆಯುವ ಎಲೆಕ್ಷನ್‌ಗಳಿಗೂ ಉತ್ತಮ ಗುಣಮಟ್ಟದ ಶಾಯಿಯನ್ನೇ ಸರಬರಾಜು ಮಾಡುತ್ತಿದೆ ಎಂದರು.

ಇಲ್ಲಿಯವರೆಗೆ ಇಂಕ್‌ನ ಗುಣಮಟ್ಟದ ಬಗ್ಗೆ ಯಾವುದೇ ರೀತಿ ದೂರುಗಳು ಬಂದಿಲ್ಲ. ಈಗ ಏಕೆ ಆರೋಪಗಳು ಬರುತ್ತಿವೆ ಎಂಬುದನ್ನು ನಾವು ಯೋಚನೆ ಮಾಡಬೇಕು. ಅಂದಿನ ಮೈಸೂರಿನ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ದೂರದೃಷ್ಟಿಯಿಂದ ಈ ಕಂಪನಿಯನ್ನು ಆರಂಭ ಮಾಡಿದ್ದು, ಇವತ್ತಿಗೂ ಕೂಡ ಸರ್ಕಾರಿ ಸಂಸ್ಥೆ ನಷ್ಟವಿಲ್ಲದೆ ನಡೆಯುತ್ತಿದೆ ಎಂದರು.

ಶಾಯಿಯ ಗುಣಮಟ್ಟವನ್ನು ಪ್ರತಿಷ್ಠಿತ ಲ್ಯಾಬ್​ಗಳಲ್ಲಿ ಪರೀಕ್ಷಿಸಿ, ಅಳಿಸಲಾಗದು ಎಂದು ತಿಳಿದ ನಂತರವೇ ಉಪಯೋಗಿಸಲಾಗುತ್ತಿದೆ ಎಂದು ಇದೇ ವೇಳೆ ಅವರು ಹೇಳಿದರು.