'ಸರ್ವಿಸ್‌ ತಡವಾಗಿದ್ದಕ್ಕೆ ದರ್ಶನ್‌ ಕೋಪಗೊಂಡಿದ್ದರು, ಆದ್ರೆ ಯಾರ ಮೇಲೂ ಹಲ್ಲೆ ಮಾಡಿಲ್ಲ'

ಮೊದಲಾಗಿ ನಾನು ದಲಿತನಲ್ಲ, ಕೇರಳದ ನಾಯರ್ ಜನಾಂಗಕ್ಕೆ ಸೇರಿದವನಾಗಿದ್ದು ಘಟನೆ ನಡೆದ ದಿನ ಸೇವೆ ಒದಗಿಸುವಾಗ ತಡವಾಗಿದೆ ಎಂದು ದರ್ಶನ್ ಕೋಪಗೊಂಡರು ಅಷ್ಟೇ. ಆದರೆ ಈ ಸಂದರ್ಭದಲ್ಲಿ ಯಾರ ಮೇಲೂ ಹಲ್ಲೆ ಮಾಡಿಲ್ಲ ಎಂದು ದಿ ಸಂದೇಶ್ ಪ್ರಿನ್ಸ್ ಹೋಟೆಲ್​ನ ಸಪ್ಲೈಯರ್​ ಗಂಗಾಧರ್ ಹೇಳಿದ್ದಾರೆ.

ಮೈಸೂರು:ನನ್ನ ಮೇಲೆ ನಟ ದರ್ಶನ್ ಹಲ್ಲೆ ಮಾಡಿಲ್ಲ. ಸರ್ವಿಸ್​ನಲ್ಲಿ ತಡ ಆಗಿದ್ದಕ್ಕೆ ಬೈದರು ಅಷ್ಟೇ ಎಂದು ಹಲ್ಲೆ ಆರೋಪಕ್ಕೆ ಹೋಟೆಲ್​ ಸಪ್ಲೈಯರ್​ ಗಂಗಾಧರ್ ಹೇಳಿಕೆ ನೀಡಿದರು.

ನಟ ದರ್ಶನ್ ದಿ ಸಂದೇಶ್ ಪ್ರಿನ್ಸ್ ಹೋಟೆಲ್​ನಲ್ಲಿ ಗಂಗಾಧರ್ ಎಂಬ ಸರ್ವಿಸ್ ಮಾಡುವ ವ್ಯಕ್ತಿಯ ಮೇಲೆ ದೃಷ್ಟಿ ಹೋಗುವ ರೀತಿ ಹೊಡೆದಿದ್ದಾರೆ ಎಂದು ಇಂದ್ರಜಿತ್ ಲಂಕೇಶ್ ಇತ್ತೀಚೆಗೆ ಆರೋಪಿಸಿದ್ದರು. ಈ ಹಿನ್ನೆಲೆಯಲ್ಲಿ ಇಂದು ಹೋಟೆಲ್​ಗೆ ಆಗಮಿಸಿದ ಎಸಿಪಿ ಶಶಿಧರ್ ನೇತೃತ್ವದ ತಂಡ ಗಂಗಾಧರ್ ಎಂಬ ವ್ಯಕ್ತಿಯಿಂದ ಮಾಹಿತಿ ಪಡೆದರು.

ಈ ವಿಚಾರವಾಗಿ ಗಂಗಾಧರ್ ಮಾಧ್ಯಮಗಳ ಜೊತೆ ಮಾತನಾಡಿ, ಮೊದಲಾಗಿ ನಾನು ದಲಿತನಲ್ಲ. ಕೇರಳದ ನಾಯರ್ ಜನಾಂಗಕ್ಕೆ ಸೇರಿದವನಾಗಿದ್ದೇನೆ. ಘಟನೆ ನಡೆದ ದಿನ ಸರ್ವಿಸ್​ನಲ್ಲಿ ತಡವಾಗಿದೆ ಎಂದು ದರ್ಶನ್ ಕೋಪಗೊಂಡರು, ಆದರೆ ಯಾರ ಮೇಲೂ ಹಲ್ಲೆ ಮಾಡಿಲ್ಲ ಎಂದರು.

ಇದೇ ವೇಳೆ ಅವರು, ನನ್ನ ಎರಡೂ ಕಣ್ಣುಗಳು ಸರಿಯಿದೆ ನೋಡಿ ಎಂದು ತೋರಿಸಿದರು. ನನಗೆ ಮದುವೆಯಾಗಿಲ್ಲ. ನಾನು ಬ್ಯಾಚುಲರ್​. ಯಾರು ಪೊರಕೆ ಹಿಡಿದುಕೊಂಡು ಬಂದರೋ ಗೊತ್ತಿಲ್ಲ. ಮೈಸೂರಿನಲ್ಲೇ ಹುಟ್ಟಿ ಬೆಳೆದವನು. ಹುಟ್ಟಿದ್ದು ಮಾತ್ರ ಕೇರಳ ಎಂದು ಅಂದಿನ ಘಟ‌ನೆಯನ್ನು ವಿವರಿಸಿದರು.