ಮಂಗಳೂರು: ಕ್ಯಾಂಪ್ಕೋಗೆ ವಿದೇಶದಿಂದ ಕೊಕೊ ಬೀನ್ಸ್ ಕಳುಹಿಸುವ ಸಂದರ್ಭ ಸುಮಾರು ರೂ 9.71 ಕೋಟಿ ರೂ. ವಂಚನೆ ಮಾಡಿ ವಿದೇಶದಲ್ಲಿ ತಲೆಮರೆಸಿಕೊಂಡಿದ್ದ ಆರೋಪಿಯನ್ನು ಮುಂಬಯಿ ವಿಮಾನ ನಿಲ್ದಾಣದಲ್ಲಿ ಬಂಧಿಸಲಾಗಿದೆ.
ವಿನ್ಸಿ ಪಿಂಟೋ ಬಂಧಿತ ಆರೋಪಿ. 2018-19ರಲ್ಲಿ ಕ್ಯಾಂಪ್ಕೋ ಸಂಸ್ಥೆಯು ಮಂಗಳೂರಿನ ಜೀವನ್ ಲೋಬೋ ಮಾಲೀಕತ್ವದ ಕೋಸ್ಪಾಕ್ ಏಶಿಯಾ ಇಂಟರ್ ನ್ಯಾಶನಲ್ ಸಂಸ್ಥೆಯ ಮೂಲಕ ವಿದೇಶದಿಂದ ಕೊಕ್ಕೋ ಬೀಜ ಖರೀದಿಗೆ ಷರತ್ತುಬದ್ದ ಖರೀದಿ ಆದೇಶವನ್ನು ನೀಡಿತ್ತು. ಅದರಂತೆ ಜೀವನ್ ಲೋಬೋ ವಿನ್ಸಿ ಪಿಂಟೋರವರ ಸಹ ಮಾಲಿಕತ್ವದಲ್ಲಿ ಕ್ಯಾಂಪ್ಕೋ ಸಂಸ್ಥೆಗೆ ಕೊಕ್ಕೋ ಬೀಜವನ್ನು ಸರಬರಾಜು ಮಾಡಿದ್ದಾರೆ.
2019ನೇ ಇಸವಿಯಲ್ಲಿ ಸೀಮಾ ಸುಂಕ, ತೆರಿಗೆ, ಜಿಎಸ್‌ಟಿ ತೆರಿಗೆ ಇತ್ಯಾದಿಗಳನ್ನು ಸಮರ್ಪಕವಾಗಿ ಪಾವತಿಸದೆ ಕೊಕ್ಕೋ ಬೀಜಗಳನ್ನು ನೀಡಿದ್ದಾರೆ. ಅದಲ್ಲದೇ ಆಫ್ರೀಕಾದ ಕೊಕ್ಕೋವನ್ನು ಥಾಯಿಲೆಂಡ್ನದ್ದು ಎಂದು ಕ್ಯಾಂಪ್ಕೋ ಸಂಸ್ಥೆಗೆ ಮಾರಾಟ ಮಾಡಿದ್ದರು.