ಬಂದರು ನಗರಿ ಮಂಗಳೂರಲ್ಲೂ ಜಲಕ್ಷಾಮ!

ಮಂಗಳೂರಿನ ಜಲ ಮೂಲಗಳಲ್ಲಿ ಒಂದಾದ ಗುಜ್ಜರಕೆರೆಯನ್ನು ಸರಿಯಾಗಿ ನಿರ್ವಹಣೆ ಮಾಡದ ಕಾರಣ ನೀರಿನ ಸಮಸ್ಯೆ ಎದುರಾಗಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.

ಮಂಗಳೂರು: ಬಂದರು ನಗರಿ ಹಿಂದೆಂದೂ ಇಲ್ಲದಂತಹ ನೀರಿನ ಬವಣೆ ಎದುರಿಸುತ್ತಿದೆ. ಆದರೆ ಮಂಗಳೂರಿನ ಗುಜ್ಜರಕೆರೆಯನ್ನು ಸರಿಯಾಗಿ ನಿರ್ವಹಣೆ ಮಾಡಿದ್ದರೆ ಇಂದು ಈ ಸಮಸ್ಯೆ ಉದ್ಭವಿಸುತ್ತಿರಲಿಲ್ಲ ಎಂಬ ಮಾತುಗಳು ಸಹ ಕೇಳಿಬರುತ್ತಿವೆ.

ಮಂಗಳೂರು ನಗರಕ್ಕೆ ನೀರು ಪೂರೈಸುವ ತುಂಬೆ ಡ್ಯಾಂನಲ್ಲಿ ಮಳೆಗಾಲ ಆರಂಭವಾಗುವವರೆಗೂ ಪೂರೈಕೆ ಮಾಡುವಷ್ಟು ನೀರಿಲ್ಲ. ಗುಜ್ಜನಕೆರೆಯನ್ನೂ ಸರಿಯಾಗಿ ನಿರ್ವಹಣೆ ಮಾಡದೇ ಇರುವುದು ಮಂಗಳೂರಿಗರನ್ನು ಸಂಕಷ್ಟಕ್ಕೀಡು ಮಾಡಿದೆ.

ಮಂಗಳೂರಿನ ಮಂಗಳಾ ದೇವಿ ದೇವಸ್ಥಾನದ ಬಳಿ ಇರುವ ಗುಜ್ಜರಕೆರೆ 3.43 ಎಕರೆ ಪ್ರದೇಶದಲ್ಲಿದೆ. ಈ ಕೆರೆ ಮಂಗಳೂರು ನಗರಕ್ಕೆ ಅಗತ್ಯವಿರುವ ಒಂದಷ್ಟು ಪ್ರಮಾಣದ ನೀರನ್ನು ಪೂರೈಸಬಲ್ಲದು. ಆದರೆ ಸರಿಯಾದ ನಿರ್ವಹಣೆ ಇಲ್ಲದೆ ಈ ಕೆರೆಯಲ್ಲಿ ಈಗ ಒಳಚರಂಡಿ ಕೊಳಚೆ ನೀರು ಶೇಖರಣೆಯಾಗಿದೆ.

ಕೆರೆ ಸರಿಪಡಿಸಲು ಸ್ಥಳೀಯರು ಹಲವು ವರ್ಷಗಳಿಂದ ಮಾಡಿದ ಹೋರಾಟಕ್ಕೆ ಮಣಿದ ಸರ್ಕಾರ 6.25 ಕೋಟಿ ಹಣವನ್ನು ಈ ಕೆರೆ ನಿರ್ವಹಣೆಗೆ ವಿನಿಯೋಗಿಸಿದೆ. ಆದರೆ ಕೆರೆಗೆ ಒಳಚರಂಡಿ ನೀರು ಹರಿದು ಬರುವುದನ್ನು ತಡೆಯಲಾಗಿದೆ. ಪರಿಣಾಮ ಕೆರೆ ಸಂಪೂರ್ಣ ಮಲಿನವಾಗಿದೆ.

ಈಗಾಗಲೇ ಒಳಚರಂಡಿ ನೀರು ಬೆರೆತು ಕೆರೆ ಕೆಲವು ವರ್ಷಗಳ ಕಾಲ‌ ಉಪಯೋಗಿಸಲಾಗದಷ್ಟು ಹಾಳಾಗಿದೆ. ಈ ಹಿಂದೆ 1100 ಕೋಲಿಫಾರ್ಮ್ ಅಂಶ ನೀರಿನಲ್ಲಿದ್ದರೆ, ಈಗ 1600ಕ್ಕೇರಿ ನೀರು ವಿಷಕಾರಿಯಾಗಿದೆ. ಅಲ್ಲದೆ, ಕೆರೆಯಲ್ಲಿ ಗಿಡ, ಪಾಚಿ ವ್ಯಾಪಕವಾಗಿ ಹರಿಡಿದೆ.

ಈಗಿನಿಂದ ಕೆರೆ ಸ್ವಚ್ಛತಾ ಕೆಲಸ ಶುರು ಮಾಡಿದರೆ ಒಂದೆರಡು ವರ್ಷಗಳ ಮಳೆಗಾಲದ ಬಳಿಕ ನೀರು ಶುದ್ಧಗೊಳ್ಳಬಹುದು. ಅಂತಹ ಪ್ರಯತ್ನಕ್ಕೆ ಸರ್ಕಾರ ಕ್ರಮ‌ ಕೈಗೊಳ್ಳಬೇಕಾಗಿದೆ ಎಂಬುದು ಸ್ಥಳೀಯರ ಆಗ್ರಹ.