ಯಾರದೋ ಫ್ಲಾಟ್ ಅನ್ನು ಲೀಸ್​​ಗೆ ನೀಡಿ ವಂಚನೆ- ಮಂಗಳೂರಿನಲ್ಲಿ ಇಬ್ಬರ ಬಂಧನ

ಯಾರದೋ ಫ್ಲಾಟ್ ಅನ್ನು ಲೀಸ್​​ಗೆ ನೀಡಿ ವಂಚಿಸಿ, 5 ಲಕ್ಷ ಹಣ ರೂ. ಹಣ ಪಡೆದ ಆರೋಪದಡಿ ಇಬ್ಬರನ್ನು ಮಂಗಳೂರು ಪೊಲೀಸರು ಬಂಧಿಸಿದ್ದಾರೆ.

ಮಂಗಳೂರು:ಬೇರೆಯವರ ಫ್ಲಾಟ್ ಅನ್ನು ಲೀಸ್​​ಗೆ ನೀಡಿ ವಂಚಿಸಿದ್ದ ಇಬ್ಬರನ್ನು ಮಂಗಳೂರಿನ ಬಂದರ್ ಠಾಣಾ ಪೊಲೀಸರು ಬಂಧಿಸಿದ್ದಾರೆ. ಕಾವೂರಿನ ಪ್ರದೀಪ್ ಯಾನೆ ದೀಪಕ್ ಅಂದ್ರಾದೆ (31) ಮತ್ತು ಪಳ್ನೀರ್​ನ ಇಮ್ತಿಯಾಜ್ (43) ಬಂಧಿತ ಆರೋಪಿಗಳು.

ಬೆಳ್ತಂಗಡಿ ತಾಲೂಕಿನ ಪ್ರಿಯಾ ಕೆ ಆರ್ ಎಂಬವರು ಮಂಗಳೂರು ನಗರದಲ್ಲಿ ಕೆಲಸ ಮಾಡುತ್ತಿದ್ದು, ಇವರು ಲೀಸ್​ಗೆ ಮನೆ ಹುಡುಕುತ್ತಿದ್ದ ಸಂದರ್ಭದಲ್ಲಿ ಆರೋಪಿ ದೀಪಕ್ ನಗರದ ಕೆ ಎಸ್ ರಾವ್ ರೋಡ್​ನಲ್ಲಿರುವ ಅಪಾರ್ಟ್ಮೆಂಟ್​ನಲ್ಲಿ ಪ್ಲ್ಯಾಟ್ ಖಾಲಿ ಇರುವ ಬಗ್ಗೆ ಹೇಳಿ 2 ವರ್ಷದ ಅವಧಿಗೆ ರೂ. 5 ಲಕ್ಷವನ್ನು ನಿಗದಿಪಡಿಸಿದ್ದನು. 2020 ಜೂನ್​ನಲ್ಲಿ ದೀಪಕ್ ಮತ್ತು ಇಮ್ತಿಯಾಝ್ ಎಂಬವರು ಬ್ರಿಜೆಶ್ ಎಂಬಾತನನ್ನು ಮನೆಯ ಮಾಲೀಕ ಮೊಹಮ್ಮದ್ ಅಶ್ರಫ್ ಎಂಬುದಾಗಿ ಕರೆದುಕೊಂಡು ಬಂದು ಅಗ್ರಿಮೆಂಟ್​​ಗೆ ಸಹಿ ಹಾಕಿಸಿ 5 ಲಕ್ಷ ಹಣ ರೂ. ಪಡೆದುಕೊಂಡಿದ್ದರು.

ಇದನ್ನೂ ಓದಿ: ಮಂಗಳೂರಿನಲ್ಲಿ ಹೈಟೆಕ್​ ವೇಶ್ಯಾವಾಟಿಕೆ ದಂಧೆ: ಕಾಲೇಜು ವಿದ್ಯಾರ್ಥಿನಿಯರು ಸೇರಿ ನಾಲ್ವರು ಯುವತಿಯರ ರಕ್ಷಣೆ

ಪ್ರಿಯಾ ಅವರು ಮನೆಯಲ್ಲಿ ವಾಸವಿರುವ ಸಂದರ್ಭದಲ್ಲಿ 2021ರ ಫೆಬ್ರವರಿಯಲ್ಲಿ ಮನೆಯ ನೈಜ ಮಾಲೀಕರಾದ ಮೊಹಮ್ಮದ್ ಅಲಿ ಎಂಬವರು ಫ್ಲಾಟ್​ಗೆ ಬಂದಿದ್ದು ಈ ಸಂದರ್ಭದಲ್ಲಿ ವಂಚನೆ ನಡೆದಿರುವುದು ಬೆಳಕಿಗೆ ಬಂದಿದೆ. ಈ ಬಗ್ಗೆ ಪ್ರಕರಣ ದಾಖಲಿಸಿದ್ದ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಈ ಆರೋಪಿಗಳು ಇದೇ ರೀತಿಯ ಮೂರು ವಂಚನೆ ಪ್ರಕರಣಗಳಲ್ಲಿ ಭಾಗಿಯಾಗಿದ್ದು, ಜಾಮೀನು ಪಡೆದುಕೊಂಡು ಬಿಡುಗಡೆಯಾಗಿದ್ದರು. ಇವರು ಬೇರೆ ಬೇರೆ ಕಡೆ ಇದೇ ರೀತಿಯ ವಂಚನೆ ಮಾಡಿರುವ ಮಾಹಿತಿ ಪೊಲೀಸರಿಗೆ ಲಭ್ಯವಾಗಿದ್ದು, ತನಿಖೆ ಮುಂದುವರಿಸಿದ್ದಾರೆ.