ಮಠಗಳಿಗೆ ಅನುದಾನ ವಿಚಾರ : ಸಿಎಂ ಮೇಲೆ ಸಾರಂಗಧರ ಶ್ರೀಗಳ ಅಸಮಾಧಾನ

ಯಡಿಯೂರಪ್ಪ ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿದಾಗ ವೀರಶೈವ ಲಿಂಗಾಯತ ಸಮಾಜದವರನ್ನೇ ಮುಖ್ಯಮಂತ್ರಿ ಮಾಡಬೇಕು ಎಂದು ನಾಡಿನ ಮಠಾಧೀಶರು ಹಠ ಹಿಡಿದ ಪರಿಣಾಮ ಬೊಮ್ಮಾಯಿ ಅವರು ಮುಖ್ಯಮಂತ್ರಿಯಾಗಿದ್ದು ಎಂದು ಸಾರಂಗಾಧರೇಶ್ವರ ಸ್ವಾಮೀಜಿ ಸಿಎಂ ಮೇಲೆ ಅಸಮಾಧಾನ ತೋರಿದ್ದಾರೆ..

ಕಲಬುರಗಿ : ವೀರಶೈವ ಲಿಂಗಾಯತ ಮಠಗಳಿಗೆ ಸರ್ಕಾರ ಅನುದಾನ ಬಿಡುಗಡೆ ಮಾಡಿಲ್ಲದ ಕಾರಣ ಶ್ರೀಶೈಲ ಸಾರಂಗಧರ ದೇಶಿಕೇಂದ್ರ ಮಠದ ಸಾರಂಗಾಧರೇಶ್ವರ ಸ್ವಾಮೀಜಿ ಸರ್ಕಾರದ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಕಲಬುರಗಿಯಲ್ಲಿ ಹೇಳಿಕೆ ನೀಡಿದ ಸ್ವಾಮೀಜಿ, ಬಸವರಾಜ ಬೊಮ್ಮಾಯಿ ಸಿಎಂ ಆಗಲು ವೀರಶೈವ ಲಿಂಗಾಯತ ಮಠಾಧೀಶರೇ ಕಾರಣ. ಹೀಗಿದ್ದರೂ ವೀರಶೈವ ಲಿಂಗಾಯತ ಮಠಗಳಿಗೆ ಅನುದಾನ ನೀಡಿಲ್ಲ. ರಾಜ್ಯ ಸರ್ಕಾರ ನಿನ್ನೆ ಹಿಂದುಳಿದ ವರ್ಗದ ಮಠಗಳಿಗೆ ₹119 ಕೋಟಿ ಅನುದಾನ ನೀಡಿದೆ. ಇದು ಸ್ವಾಗತಾರ್ಹ. ಆದರೆ, ವೀರಶೈವ ಲಿಂಗಾಯತ ಮಠಗಳಿಗೆ ಯಾಕೆ ಅನುದಾನ ನೀಡಿಲ್ಲ? ಎಂದು ಸ್ವಾಮೀಜಿ ಸಿಎಂ ಮೇಲೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಬಿಎಸ್‌ವೈ ಅವರನ್ನ ಸಿಎಂ ಸ್ಥಾನದಿಂದ ಕೆಳಗಿಳಿಸುವಾಗ ವೀರಶೈವ ಸಮಾಜದವರನ್ನೇ ಸಿಎಂ ಮಾಡಬೇಕು ಅಂತಾ ನಾಡಿನ ಮಠಾಧೀಶರು ಪಟ್ಟು ಹಿಡಿದ ಪರಿಣಾಮ ಬಸವರಾಜ ಬೊಮ್ಮಾಯಿ‌ ಸಿಎಂ ಆಗಿದ್ದಾರೆ. ರಾಜ್ಯ ಸರ್ಕಾರ ಒಂದು ವಾರದೊಳಗೆ ವೀರಶೈವ ಲಿಂಗಾಯತ ಗ್ರಾಮೀಣ ಮಠಗಳಿಗೆ ಅನುದಾನ ಬಿಡುಗಡೆ ಮಾಡಬೇಕು. ಅಸಡ್ಡೆ ತೋರಿದರೆ ಮುಂದಿನ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಸಿಎಂಗೆ ಸ್ವಾಮೀಜಿ ಎಚ್ಚರಿಕೆ ನೀಡಿದ್ದಾರೆ.

ಇದನ್ನೂ ಓದಿ:ಮಹಿಳಾ ಸ್ವಸಹಾಯ ಸಂಘಗಳ ನೆರವಿಗೆ ಆ್ಯಂಕರ್ ಬ್ಯಾಂಕ್ ಸ್ಥಾಪನೆ: ಸಿಎಂ ಬೊಮ್ಮಾಯಿ