ಪಿಎಸ್​ಐ ನೇಮಕಾತಿ ಪ್ರಕರಣ: ಬಂದೋಬಸ್ತ್​ನಲ್ಲಿ ದಿವ್ಯಾ ಹಾಗರಗಿಯನ್ನು ಕಲಬುರಗಿಗೆ ಕರೆ ತಂದ ಸಿಐಡಿ

ಪಿಎಸ್​ಐ ನೇಮಕಾತಿ ಪ್ರಕರಣ ಪ್ರಮುಖ ಆರೋಪಿ ದಿವ್ಯಾ ಹಾಗರಗಿ ಸೇರಿ ಐವರನ್ನು ಸಿಐಡಿ ಬಂಧಿಸಿ, ಕಲಬುರಗಿಗೆ ಕರೆ ತಂದಿದೆ.

ಕಲಬುರಗಿ:ಪಿಎಸ್ಐ ನೇಮಕಾತಿ ಪರೀಕ್ಷೆ ಅಕ್ರಮದ ಪ್ರಮುಖ ಆರೋಪಿ ಎನ್ನಲಾದ ದಿವ್ಯಾ ಹಾಗರಗಿ ಸೇರಿ ಐವರನ್ನು ಪುಣೆಯಲ್ಲಿ ಸಿಐಡಿ ತಂಡ ಬಂಧಿಸಿ, ಕಲಬುರಗಿ ಕಚೇರಿಗೆ ಕರೆ ತಂದಿದೆ. ಸಿಐಡಿ ತಂಡ ರಾತ್ರಿ ಪುಣೆಗೆ ತೆರಳಿ ಆರೋಪಿಗಳನ್ನು ಬಂಧಿಸಿ, ಪೊಲೀಸ್ ಬಂದೋಬಸ್ತ್​ನಲ್ಲಿ ನಗರಕ್ಕೆ ಕರೆ ತಂದಿದೆ.

ಜ್ಞಾನಜ್ಯೋತಿ ಶಾಲೆಯ ಕಾರ್ಯದರ್ಶಿ ದಿವ್ಯಾ ಹಾಗರಗಿ, ಮೇಲ್ವಿಚಾರಕರಾದ ಅರ್ಚನಾ, ಸುನೀತಾ ಹಾಗೂ ಆರೋಪಿಗಳಿಗೆ ಆಶ್ರಯ ನೀಡಿದ ಉದ್ಯಮಿ ಸುರೇಶ, ಕಾಳಿದಾಸ ಐದು ಜನರನ್ನು ಸಿಐಡಿ ಕರೆ ತಂದಿದೆ. ಪಿಎಸ್​ಐ ಅಕ್ರಮ ಪ್ರಕರಣ ಹೊರ ಬರುತ್ತಿದ್ದಂತೆ ದಿವ್ಯಾ ಮತ್ತು ಟೀಮ್ ತಲೆಮರೆಸಿಕೊಂಡಿತ್ತು. ಇದೀಗ 18 ದಿನಗಳ ನಂತರ ಸಿಐಡಿ ಬಲೆಗೆ ಬಿದ್ದಿದೆ.

ಹೆಡ್​ಮಾಸ್ಟರ್ ಕಾಶಿನಾಥ್, ಪಿಎಸ್​ಐ ಅಭ್ಯರ್ಥಿ ಶಾಂತಾಬಾಯಿ ಸೇರಿದಂತೆ ಇನ್ನೂ ಹಲವರು ತಲೆಮರೆಸಿಕೊಂಡಿದ್ದಾರೆ. ಅವರ ಬಂಧನಕ್ಕೂ ಸಿಐಡಿ ಜಾಲ ಬೀಸಿದೆ. ಇನ್ನು ಪ್ರಾಥಮಿಕ ತನಿಖೆ ನಂತರ ದಿವ್ಯಾ ಮತ್ತು‌ ಸಹಚರರನ್ನು ನ್ಯಾಯಾಂಗ ಬಂಧನಕ್ಕೆ ನೀಡುವ ಸಾಧ್ಯತೆ ಇದೆ.

(ಇದನ್ನೂ ಓದಿ: ಪಿಎಸ್ಐ ನೇಮಕಾತಿ ಅಕ್ರಮ ಪ್ರಕರಣ.. ದಿವ್ಯಾ ಹಾಗರಗಿಗೂ ಬಿಜೆಪಿಗೂ ಸಂಬಂಧ ಇಲ್ಲ.. ತೇಲ್ಕೂರ್‌ ಸ್ಪಷ್ಟನೆ.. )