ಬಿಆರ್​ಟಿಎಸ್ ಬಸ್​ನಲ್ಲಿ ಎಸಿ ಇಲ್ಲವೆಂದು ಪ್ರಯಾಣಿಕರ ಆಕ್ರೋಶ..

ರಾಜ್ಯದ ಅವಳಿ ನಗರ ಹುಬ್ಬಳ್ಳಿ-ಧಾರವಾಡದಲ್ಲಿ ಸಂಚರಿಸುತ್ತಿರುವ ಬಿಆರ್​ಟಿಎಸ್ ಬಸ್‌ಗಳು ಒಂದಿಲ್ಲೊಂದು ರೀತಿಯಲ್ಲಿ ಸುದ್ದಿ ಆಗುತ್ತಲೇ ಇವೆ. ಇಂದು ಬಸ್​ನಲ್ಲಿ ಎಸಿ ಇಲ್ಲವೆಂದು ಪ್ರಯಾಣಿಕರು ಆಕ್ರೋಶ ವ್ಯಕ್ತಪಡಿಸಿದ ಘಟನೆ ನಡೆಯಿತು.

ಹುಬ್ಬಳ್ಳಿ: ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿರುವ ಬಸ್​ನಲ್ಲಿ ಎಸಿ ಇಲ್ಲವೆಂದು ಆರೋಪಿಸಿ ಪ್ರಯಾಣಿಕರೊಬ್ಬರು ಚಿಗರಿ ಬಸ್ ಡ್ರೈವರ್‌ನ ತರಾಟೆಗೆ ತೆಗೆದುಕೊಂಡ ಘಟನೆ ನಗರದಲ್ಲಿ ನಡೆದಿದೆ.

ಹುಬ್ಬಳ್ಳಿ - ಧಾರವಾಡದ ಮಧ್ಯೆ ಸುಗಮ ಸಂಚಾರ ಸೇರಿದಂತೆ ಶೀಘ್ರ ಪ್ರಯಾಣದ ಉದ್ದೇಶದಿಂದ ಕೋಟ್ಯಂತರ ರೂಪಾಯಿ ಖರ್ಚು ಮಾಡಿ ನಗರಕ್ಕೆ ಬಿಆರ್​ಟಿಎಸ್ ಯೋಜನೆಯನ್ನು ತರಲಾಗಿದೆ. ಈ ಮೂಲಕ ಅತ್ಯುತ್ತಮ ಹವಾನಿಯಂತ್ರಿತ ಬಸ್‌ಗಳನ್ನು ರಸ್ತೆಗೆ ಇಳಿಸಲಾಗಿತ್ತು. ಆದರೆ, ಇದೀಗ ಈ ಬಸ್‌ಗಳು ಒಂದಿಲ್ಲೊಂದು ರೀತಿಯಲ್ಲಿ ಸಮಸ್ಯೆಗಳ ಸುರಿಮಾಲೆಯಲ್ಲಿ ಸಿಲುಕಿಕೊಳ್ಳುತ್ತಿದ್ದು, ಇಂದು ಹವಾನಿಯಂತ್ರಿತ ಬಸ್ಸಿನಲ್ಲೇ ಎಸಿ ಕೈಕೊಟ್ಟ ಕಾರಣ ಎಸಿ ಇಲ್ಲದೇ ಸಂಚಾರ ನಡೆಸುವಂತಾಯಿತು. ಇದು ಪ್ರಯಾಣಿಕರ ಆಕ್ರೋಶಕ್ಕೆ ಕಾರಣವಾಯಿತು.

ಎಸಿ ಇಲ್ಲವೆಂದು ಪ್ರಯಾಣಿಕರೊಬ್ಬರು ಡ್ರೈವರ್​ಗೆ ಕೇಳಿದರೆ, ಪ್ರಯಾಣಿಕರು ಜಾಸ್ತಿಯಾದ್ರೆ ಎಸಿ ರಿಯಾಕ್ಟ್​ ಆಗುತ್ತೆ. ಹೀಗಾಗಿ ನಿಮಗೆ ಎಸಿ ಇರೋದು ಗೊತ್ತಾಗುವುದಿಲ್ಲ. ಸುಮ್ಮನೆ ಏನೇನೋ ಹೇಳಬೇಡಿ. ಎಸಿ ಇಲ್ಲಂದ್ರೆ ಬಸ್ ಆನ್ ಆಗುವುದಿಲ್ಲ ಎಂದು ಹಾರಿಕೆ ಉತ್ತರ ನೀಡಿದ್ದಾರೆ.

ಇಂತಹ ಬಸ್‌ಗಳಲ್ಲೇ ಈ ರೀತಿಯ ಸಮಸ್ಯೆಗಳು ಕಂಡು ಬರುತ್ತಿದ್ದು, ಇದಕ್ಕೆ ಯಾರು ಜವಾಬ್ದಾರಿ ಎಂದು ಸಾರ್ವಜನಿಕರು ಕಿಡಿಕಾರಿದ್ದಾರೆ. ಕೂಡಲೇ ಸಂಬಂಧಿಸಿದ ಅಧಿಕಾರಿಗಳು ಇತ್ತ ಗಮನ ಹರಿಸಬೇಕಾಗಿದೆ ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.