ಕುಟುಂಬದ ವಿರೋಧ ಲೆಕ್ಕಿಸದೇ Love Marriage.. ಹುಬ್ಬಳ್ಳಿಯಲ್ಲಿ ರಕ್ಷಣೆ ಕೋರಿ ಪೊಲೀಸ್​ ಠಾಣೆ ಮೆಟ್ಟಿಲೇರಿದ ಜೋಡಿ

ಹುಬ್ಬಳ್ಳಿ ನಗರ ನಿವಾಸಿಯಾದ ಮೌನೇಶ್​ ಮತ್ತು ಯುವತಿ ಮನು ಬಳ್ಳಾರಿ ಕಳೆದ 8 ತಿಂಗಳಿಂದ ಪ್ರೀತಿಸುತ್ತಿದ್ದು, ಇದೀಗ ಮದುವೆಯಾಗಿದ್ದಾರೆ. ಅಂತರ್ಜಾತಿ ಎನ್ನುವ ಕಾರಣಕ್ಕೆ ಯುವತಿ ಮನು ಅವರ ಮನೆಯಲ್ಲಿ ಇವರ ಪ್ರೀತಿಗೆ ತೀವ್ರ ವಿರೋಧ ವ್ಯಕ್ತವಾಗಿದೆಯಂತೆ.

ಹುಬ್ಬಳ್ಳಿ:ಪ್ರೇಮಂ ಶರಣಂ ಗಚ್ಛಾಮಿ ಅಂತಾ ಒಬ್ಬರನ್ನೊಬ್ಬರು ಪರಸ್ಪರ ಪ್ರೀತಿಸಿದರು.. ಒಟ್ಟೊಟ್ಟಿಗೆ ಜಾಲಿಯಾಗಿ ಪ್ರೇಮಲೋಕದಲ್ಲಿ ತಿರುಗಾಡಿದರು. ಬಳಿಕ ನನಗೆ ನೀನು, ನಿನಗೆ ನಾನು.. ಒಲವೇ ನಮ್ಮ ಬದುಕು ಎಂದುತಮ್ಮಿಚ್ಛೆಯಂತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು ಈ ಲವ್​ ಬರ್ಡ್ಸ್​. ಆದ್ರೆ ಈ ನವಜೋಡಿ ಈಗ ಆತಂಕದಲ್ಲಿದ್ದಾರೆ. ಕುಟುಂಬಸ್ಥರ ವಿರೋಧದ ಮಧ್ಯೆ ಮದುವೆಯಾದ ತಮಗೆ ಜೀವ ಬೆದರಿಕೆ ಇದೆ ಎಂದು ಪೊಲೀಸರ ರಕ್ಷಣೆ ಕೋರಿ ಠಾಣೆಯ ಮೆಟ್ಟಿಲೇರಿದ್ದಾರೆ.

ಪ್ರೀತಿಗೆ ಅಡ್ಡ ಬಂತು ಜಾತಿ.. ಹೌದು, ವಾಣಿಜ್ಯ ನಗರಿಯ ನಿವಾಸಿಯಾದ ಮೌನೇಶ ಮತ್ತು ಯುವತಿ ಮನು ಬಳ್ಳಾರಿ ಕಳೆದ 8 ತಿಂಗಳಿಂದ ಪ್ರೀತಿಸುತ್ತಿದ್ದರು. ಅಂತರ್ಜಾತಿ ಎನ್ನುವ ಕಾರಣಕ್ಕೆ ಯುವತಿ ಮನು ಅವರ ಮನೆಯಲ್ಲಿ ಇವರ ಪ್ರೀತಿಗೆ ತೀವ್ರ ವಿರೋಧ ವ್ಯಕ್ತವಾಗಿತ್ತು. ಪೋಷಕರ ವಿರೋಧವನ್ನೂ ಲೆಕ್ಕಿಸದೇ ಮನು ಜನವರಿ 7 ರಂದು ಧಾರವಾಡದ ಈರಣ್ಣ ದೇವಸ್ಥಾನದಲ್ಲಿ ಮೌನೇಶ್​ ಜೊತೆ ಸಪ್ತಪದಿ ತುಳಿದಿದ್ದಾರೆ.

ವಿವಾಹವಾಗಿರುವ ಮನು ಬಳ್ಳಾರಿ ಮತ್ತು ಮೌನೇಶ್​

ಬಳಿಕ ಮದುವೆಯ ಸುದ್ದಿ ತಿಳಿದು ಯುವತಿ ಮನು ಅವರ ಕುಟುಂಬಸ್ಥರು, ಮೌನೇಶ್​ ಅವರ ಫೋಟೋ ಹಿಡಿದುಕೊಂಡು ಹುಡುಕುತ್ತಿದ್ದಾರೆ. ಇದರಿಂದ ನಮಗೆ ಜೀವಕ್ಕೆ ಅಪಾಯವಿದೆ. ರಕ್ಷಣೆ ನೀಡಬೇಕು ಎಂದು ಯುವತಿ ಮನು, ಪತಿ ಮೌನೇಶ್​ ಜೊತೆ ನಗರ ಮಹಿಳಾ ಪೊಲೀಸ್ ಕಚೇರಿಗೆ ತೆರಳಿ ದೂರು ನೀಡಿದ್ದಾರೆ. ಮುಂದೆ ತಮಗೇನಾದರೂ ಅಪಾಯವಾದರೆ ನಮ್ಮ ಕುಟುಂಬಸ್ಥರೇ ಕಾರಣ ಎಂದು ಯುವತಿ ಮನು ಬಳ್ಳಾರಿ ಹೇಳಿದ್ದಾರೆ.

ಇದನ್ನೂ ಓದಿ:ಲತಾ ಮಂಗೇಶ್ಕರ್‌ಗೆ ಮುಂದಿನ 10-12 ದಿನಗಳ ಕಾಲ ಐಸಿಯುನಲ್ಲೇ ಚಿಕಿತ್ಸೆ