ಹುಬ್ಬಳ್ಳಿ:ಲಾಕ್ಡೌನ್ ಹಿನ್ನೆಲೆ ಕಳೆದ 58 ದಿನಗಳಿಂದ ಸ್ಥಗಿತಗೊಂಡಿದ್ದ ಸಾರ್ವಜನಿಕ ಸಾರಿಗೆ ಸಂಚಾರ ಸರ್ಕಾರದ ಅನುಮತಿ ಮೇರೆಗೆ ಪುನಾರಂಭವಾಗಿದೆ.
ಹುಬ್ಬಳ್ಳಿ ವಿಭಾಗದ ಮೊದಲ ದಿನದ ಸಾರಿಗೆ ಆದಾಯ ಎಷ್ಟು ಗೊತ್ತಾ? - ಸಾರ್ವಜನಿಕ ಸಾರಿಗೆ ಸಂಚಾರ ಪುನಾರಂಭ
ಲಾಕ್ಡೌನ್ ಹಿನ್ನೆಲೆ ಕಳೆದ 58 ದಿನಗಳಿಂದ ಸ್ಥಗಿತಗೊಂಡಿದ್ದ ಸಾರ್ವಜನಿಕ ಸಾರಿಗೆ ಬಸ್ ಸಂಚಾರ ಪುನಾರಂಭವಾಗಿದ್ದು, ಹುಬ್ಬಳ್ಳಿ ವಿಭಾಗದ ನಾಲ್ಕು ಘಟಕಗಳಿಂದ ನಿನ್ನೆ 46,000 ರೂ. ಆದಾಯ ಸಂಗ್ರಹವಾಗಿದೆ.
ಹುಬ್ಬಳ್ಳಿ ವಿಭಾಗದ ಮೊದಲ ದಿನದ ಸಾರಿಗೆ ಆದಾಯ ಎಷ್ಟು ಗೊತ್ತಾ?
ಸರ್ಕಾರದ ನಿರ್ದೇಶನಗಳ ಪ್ರಕಾರ ಎಲ್ಲಾ ಸುರಕ್ಷತಾ ಕ್ರಮಗಳ ಜೊತೆಗೆ ಬಸ್ಗಳನ್ನ ರಸ್ತೆಗಿಳಿಸಲಾಗಿದ್ದು, ನಿನ್ನೆ 46,000 ರೂ. ಆದಾಯ ಸಂಗ್ರಹವಾಗಿದೆ. ಹುಬ್ಬಳ್ಳಿ ವಿಭಾಗದ ನಾಲ್ಕು ಘಟಕಗಳಿಂದ 110 ಬಸ್ಗಳನ್ನ ನಿಲ್ದಾಣಗಳಲ್ಲಿ ಪ್ರಯಾಣಿಕರಿಗಾಗಿ ನಿಲ್ಲಿಸಲಾಗಿತ್ತು. ಆದರೆ ಪ್ರಾರಂಭಿಕ ದಿನ ಮತ್ತು ಕೊರೊನಾ ಭೀತಿಯ ಹಿನ್ನೆಲೆ ಪ್ರಯಾಣಿಕರಿಲ್ಲದೆ 63 ಬಸ್ಗಳು ಮಾತ್ರ ಕಾರ್ಯಾಚರಣೆ ನಡೆಸಿವೆ. ಜಿಲ್ಲೆಯೊಳಗಿನ ಪ್ರಮುಖ ಸ್ಥಳಗಳು ಸೇರಿದಂತೆ ಹೊರ ಜಿಲ್ಲೆಗಳಾದ ಬೆಂಗಳೂರು, ಗದಗ, ಹಾವೇರಿ, ಇಳಕಲ್, ಬೆಳಗಾವಿ, ವಿಜಯಪುರ, ಹಾನಗಲ್, ಶಿವಮೊಗ್ಗ ಮುಂತಾದ ಊರುಗಳಿಗೆ ಸಾರಿಗೆ ಬಸ್ಗಳು ಸಂಚರಿಸಿವೆ.
ಕಾರ್ಯಾಚರಣೆ ಮುಗಿಸಿ ಘಟಕಕ್ಕೆ ಹಿಂದಿರುಗಿದ ಎಲ್ಲಾ ಬಸ್ಗಳ ಒಳ ಭಾಗ ಮತ್ತು ಹೊರ ಭಾಗವನ್ನ ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ, ಸೋಡಿಯಂ ಹೈಪೋಕ್ಲೋರೈಡ್ ರಾಸಾಯನಿಕದಿಂದ ಸ್ಯಾನಿಟೈಜೇಷನ್ ಮಾಡಲಾಗಿದೆ ಎಂದು ವಿಭಾಗೀಯ ನಿಯಂತ್ರಣಾಧಿಕಾರಿ ಹೆಚ್.ರಾಮನಗೌಡರ್ ತಿಳಿಸಿದ್ದಾರೆ.