ಜನಸೇವಕ ಈ ಶಾಸಕ.. ಕೊರೊನಾ‌ ಸೋಂಕಿತರಿಗೆ ಪೊಂಗಲ್ ತಯಾರಿಸಿದ ರೇಣುಕಾಚಾರ್ಯ

ಕೋವಿಡ್​ನ ಸಂದಿಗ್ಧ ಪರಿಸ್ಥಿತಿಯಲ್ಲಿ ಹೊನ್ನಾಳಿ ಶಾಸಕ ರೇಣುಕಾಚಾರ್ಯ ಅವರು ಕ್ಷೇತ್ರದ ಸೋಂಕಿತರ ಕಷ್ಟಕ್ಕೆ ಸ್ಪಂದಿಸುತ್ತಿದ್ದಾರೆ. ಹೊನ್ನಾಳಿ ಪಟ್ಟಣದಲ್ಲಿರುವ ಅವರ ಮನೆಯ ಆವರಣದಲ್ಲಿ ಅಡುಗೆ ತಯಾರಿಸಿ ಸೋಂಕಿತರಿಗೆ ಹಂಚುತ್ತಿದ್ದಾರೆ. ಅವರು ಇತ್ತೀಚೆಗೆ ರಾತ್ರೋರಾತ್ರಿ ಆಕ್ಸಿಜನ್​ ಪೂರೈಸಿ 20 ರೋಗಿಗಳ ಪ್ರಾಣ ಉಳಿಸಿದ್ದರು.

ದಾವಣಗೆರೆ: ಕೊರೊನಾ ರೋಗಿಗಳಿಗೆ ಪೌಷ್ಟಿಕ ಆಹಾರವನ್ನು ಸರಬರಾಜು ಮಾಡುವ ದೃಷ್ಟಿಯಿಂದ ಹೊನ್ನಾಳಿ ಶಾಸಕ ರೇಣುಕಾಚಾರ್ಯ ದಿನನಿತ್ಯ ಆಹಾರ ವಿತರಿಸುತ್ತಿದ್ದಾರೆ.

ಜಿಲ್ಲೆಯ ಹೊನ್ನಾಳಿ ಪಟ್ಟಣದಲ್ಲಿರುವ ತಮ್ಮ ಮನೆಯ ಆವರಣದಲ್ಲಿ ಅಡುಗೆ ತಯಾರಿಸಿ ಸೋಂಕಿತರಿಗೆ ಹಂಚುತ್ತಿದ್ದಾರೆ. ಇಂದು ಸಹ ಪೊಂಗಲ್​​ ಸಿದ್ಧಪಡಿಸಿ ಪ್ಯಾಕ್​​ ಮಾಡಿ ಲಸಿಕೆ ಪಡೆಯಲು ಬಂದವರಿಗೆ ಮತ್ತು ಕೋವಿಡ್​​ ಸೋಂಕಿತರಿಗೆ ಆಹಾರ ವಿತರಿಸಿದರು.

ತಮ್ಮ ಕ್ಷೇತ್ರದಲ್ಲಿ ಕೊರೊನಾ ಹಾವಳಿ ಹೆಚ್ಚಿದಾಗಿನಿಂದ ಸೋಂಕಿತರ ಕಷ್ಟ-ನಷ್ಟಗಳಿಗೆ ಸ್ಪಂದಿಸುತ್ತಿದ್ದಾರೆ. ಅಲ್ಲದೆ, ಸದಾ ಜಾಗೃತಿ ಮೂಡಿಸುತ್ತಿರುವ ಸಿಎಂ ರಾಜಕೀಯ ಕಾರ್ಯದರ್ಶಿ ರೇಣುಕಾಚಾರ್ಯ, ಸೋಂಕಿತರಿಗೆ ಇಮ್ಯೂನಿಟಿ ಹೆಚ್ಚಾಗಲು ಗುಣಮಟ್ಟದ ಆಹಾರ ಸರಬರಾಜು ಮಾಡುತ್ತಿರುವ ಇವರ ಕ್ಷೇತ್ರದಾದ್ಯಂತ ಪ್ರಶಂಸೆ ವ್ಯಕ್ತವಾಗ್ತಿದೆ.

ಇತ್ತೀಚೆಗೆ ರಾತ್ರೋರಾತ್ರಿ ಕೋವಿಡ್​ ಆಸ್ಪತ್ರೆಯಲ್ಲಿ ಆಕ್ಸಿಜನ್​ ಕೊರತೆ ಇರುವುದನ್ನು ಗಮನಿಸಿ ತಕ್ಷಣವೇ ಕಾರ್ಯೋನ್ಮುಖರಾಗಿದ್ದ ರೇಣುಕಾಚಾರ್ಯ ಹರಿಹರಕ್ಕೆ ತೆರಳಿ ಆಮ್ಲಜನಕದ ಸಿಲಿಂಡರ್​ಗಳನ್ನು ತಂದಿದ್ದರು. ಅಂದು 20 ಮಂದಿ ಕೊರೊನಾ ರೋಗಿಗಳ ಪ್ರಾಣ ಉಳಿಸಿದ್ದರು.