ಬೆಂಗಳೂರಿನಲ್ಲಿ ರಾತ್ರಿ ಸುರಿದ ಮಳೆ-ಗಾಳಿಗೆ ಧರೆಗುರುಳಿದ ಮರಗಳು

ಬೆಂಗಳೂರಿನಲ್ಲಿ ಇಂದು ಮತ್ತು ನಾಳೆಯೂ ಮೋಡ ಕವಿದ ವಾತಾವರಣ ಇರಲಿದ್ದು, ಸಾಧಾರಣ ಮಳೆಯಾಗಲಿದೆ. ನಿನ್ನೆ ಸುರಿದ ಗಾಳಿ ಮಳೆಗೆ ಹಲವೆಡೆ ಮರಗಳು ಧರೆಗುರುಳಿವೆ.

ಬೆಂಗಳೂರು: ನಗರದಲ್ಲಿ ಶುಕ್ರವಾರ ಸಂಜೆ ಹಾಗೂ ರಾತ್ರಿ ವೇಳೆ ಒಟ್ಟು 15 ಮಿ.ಮೀ ಮಳೆಯಾಗಿದೆ. ಇಂದು ಮತ್ತು ನಾಳೆಯೂ ಮೋಡಕವಿದ ವಾತಾವರಣ ಇರಲಿದ್ದು, ಸಾಧಾರಣ ಮಳೆಯಾಗಲಿದೆ. ನಿನ್ನೆ ಸುರಿದ ಮಳೆ -ಗಾಳಿಗೆ ನಗರದ ಹಲವೆಡೆ ಮರಗಳು ನೆಲಕ್ಕುರುಳಿವೆ.

ಯಶವಂತಪುರ ಮೈಸೂರು ಲ್ಯಾಂಪ್ಸ್​​​ ರಸ್ತೆಯಲ್ಲಿ ಬೆಳಗ್ಗೆ 6:30ರ ಸುಮಾರಿಗೆ ಮರ‌ ಬಿದ್ದಿದೆ. ಅದೃಷ್ಟವಶಾತ್ ಯಾರಿಗೂ ಅಪಾಯವಾಗಿಲ್ಲ. ಸಂಪೂರ್ಣ ಎರಡೂ ರಸ್ತೆಗಳಿಗೂ ಅಡ್ಡವಾಗಿ ಮರ ಬಿದ್ದಿದ್ದು, ವಾಹನ ಸಂಚಾರಕ್ಕೆ ತೊಂದರೆಯಾಗಿದೆ.

ಪೂರ್ವ ವಲಯ:ಸಾಧಾರಣ ಮಳೆಯಾಗಿದ್ದು, ಹಲವೆಡೆ ಮರಗಳು ಬಿದ್ದಿರುವ ದೂರುಗಳು ಪಾಲಿಕೆಗೆ ಬಂದಿವೆ. ಸದ್ಯ ತೆರವು ಕಾರ್ಯಾಚರಣೆ ನಡೆಯುತ್ತಿದೆ. ಓಂಬರ್ ಲೇಔಟ್​ನ, ಸಿಎಮ್​ಆರ್ ಲಾ ಕಾಲೇಜ್ ಬಳಿ ಮೊದಲನೇ ಕ್ರಾಸ್​ನಲ್ಲಿ ಮರ ಬಿದ್ದಿದ್ದು ತೆರವು ಮಾಡಲಾಗಿದೆ. ಹೈಗ್ರೌಂಡ್ ಹಾಗೂ ಕೆ.ಆರ್ ಗಾರ್ಡನ್ ಮೊದಲನೇ ಹಂತದಲ್ಲೂ ಬಿದ್ದ ಮರವನ್ನು ತೆರವು ಮಾಡಲಾಗಿದೆ.

ಪಶ್ಚಿಮ ವಲಯ-ಕಡಿಮೆ ಪ್ರಮಾಣದ ಮಳೆಯಾಗಿದ್ದು, ಯಾವುದೇ ಸಮಸ್ಯೆ ಆಗಿಲ್ಲ.

ದಕ್ಷಿಣ ವಲಯ- ಈ ವಲಯದಲ್ಲಿ ಅತ್ಯಧಿಕ ಮಳೆಯಾಗಿದೆ. ಕುಮಾರಸ್ವಾಮಿ ಲೇಔಟ್​ನ ಇಸ್ರೋ ಲೇಔಟ್ ಬಸ್ ನಿಲ್ದಾಣದಲ್ಲಿ ಮರಗಳು ಧರೆಗುರುಳಿದ್ದು, ತೆರವು ಮಾಡಲಾಗಿದೆ.

ಆರ್​ಆರ್ ನಗರ- ಸಾಧಾರಣ ಮಳೆಯಾಗಿದ್ದು, ನಾಗದೇವನಹಳ್ಳಿಯಲ್ಲಿ ಕಟ್ಟಡದ ಸೆಲ್ಲಾರ್ ಒಳಗೆ ನೀರು ತುಂಬಿದೆ. ಈ ಬಗ್ಗೆ ಪಾಲಿಕೆಗೆ ದೂರು ಬಂದಿದ್ದು, ಸ್ಥಳೀಯ ಇಂಜಿನಿಯರ್ ಗಮನಕ್ಕೆ ತರಲಾಗಿದೆ.

ಮಹದೇವಪುರ- ಸಾಧಾರಣ ಮಳೆಯಾಗಿದ್ದು, ಪೈ ಲೇಔಟ್ ಗೆ ನೀರು ನುಗ್ಗಿದೆ.

ಇದನ್ನೂ ಓದಿ:ಮಂಗಳೂರಲ್ಲಿ ದಸರಾ ಪಾರ್ಟಿ ವೇಳೆ ಜಗಳ: ಸ್ನೇಹಿತನಿಗೆ ಚೂರಿ ಇರಿದು ಕೊಂದ ಕಿರಾತಕ

ದಾಸರಹಳ್ಳಿ, ಯಲಹಂಕ ಹಾಗೂ ಬೊಮ್ಮನಹಳ್ಳಿಯಲ್ಲಿ ಯಾವುದೇ ಮಳೆ ಸಮಸ್ಯೆಗಳು ವರದಿಯಾಗಿಲ್ಲ.