ಪ್ರವಾಹಕ್ಕೆ ಸಿಕ್ಕು ಸಾವಿರಾರು ಕಿ.ಮೀ. ರಸ್ತೆ, ನೂರಾರು ಸೇತುವೆಗಳು ಹಾನಿ... ದುರಸ್ತಿ ಆಗಿದ್ದು ಎಷ್ಟು?

ಕಳೆದ ಕೆಲವು ತಿಂಗಳ ಹಿಂದೆ ಸುರಿದ ಭಾರಿ ಮಳೆ ಹಾಗೂ ಜಲ ಪ್ರವಾಹದಿಂದ ರಾಜ್ಯದಲ್ಲಿ ಸಾವಿರಾರು ಕಿ.ಮೀ ರಸ್ತೆಗಳು ಹಾನಿಗೀಡಾಗಿದ್ದು, ನೂರಾರು ಸೇತುವೆಗಳು ಕೊಚ್ಚಿ ಹೋಗಿವೆ. ಅಪಾರ ಪ್ರಮಾಣದ ಸಾರ್ವಜನಿಕರ ಆಸ್ತಿ-ಪಾಸ್ತಿಗೆ ನಷ್ಟ ಉಂಟಾಗಿದೆ. ಆದರೆ, ಇದರಲ್ಲಿ ಈವರೆಗೂ ಪೂರ್ಣಗೊಂಡಿರುವ ದುರಸ್ತಿ ಕಾಮಗಾರಿಗಳು ಮಾತ್ರ ಬೆರಳೆಣಿಕೆಯಷ್ಟಿವೆ.

ಬೆಂಗಳೂರು:ಪ್ರವಾಹಕ್ಕೆ ರಾಜ್ಯದಲ್ಲಿ ಹಾನಿಗೀಡಾದ ರಸ್ತೆ, ಸೇತುವೆಗಳು ಅಪಾರ. ಆದರೆ, ಇದರಲ್ಲಿ ಈವರೆಗೂ ಪೂರ್ಣಗೊಂಡಿರುವ ದುರಸ್ತಿ ಕಾಮಗಾರಿಗಳು ಬೆರಳೆಣಿಕೆಯಷ್ಟು ಮಾತ್ರ.

ಲೋಕೋಪಯೋಗಿ ಇಲಾಖೆಯ ಇತ್ತೀಚಿನ ಅಂಕಿ-ಅಂಶಗಳಲ್ಲಿ ನೆರೆ ಪರಿಹಾರ ಕಾಮಗಾರಿ ಪ್ರಗತಿಯ ವಸ್ತುಸ್ಥಿತಿ‌ ನೋಡಿದರೆ ಶಾಕ್​ ಆಗುವುದು ಖಂಡಿತ. ಸಾವಿರಾರು ಕಿಲೋಮೀಟರ್ ರಸ್ತೆಗಳು ಹಾಗೂ ನೂರಾರು ಸೇತುವೆಗಳು ಭೀಕರ ಪ್ರವಾಹಕ್ಕೆ ಕೊಚ್ಚಿ ಹೋಗಿವೆ. ನೆರೆಗೆ 1,166 ಕಿ.ಮೀ. ರಾಜ್ಯ ಹೆದ್ದಾರಿ, 2,341 ಕಿ.ಮೀ. ಪ್ರಮುಖ ಜಿಲ್ಲಾ ರಸ್ತೆಗಳು ಹಾನಿಯಾಗಿವೆ. ನೆರೆ ಪರಿಹಾರ ಕಾಮಗಾರಿಗಳನ್ನು ಸಮರೋಪಾದಿಯಲ್ಲಿ ಕೈಗೊಳ್ಳುತ್ತಿದ್ದೇವೆ ಎಂದು ಸರ್ಕಾರ ಹೇಳುತ್ತಿದ್ದರೂ, ವಾಸ್ತವದಲ್ಲಿ ಮಾತ್ರ ನಿರಾಶಾದಾಯಕವಾಗಿದೆ.

ಲೋಕೋಪಯೋಗಿ ಇಲಾಖೆಯ ಅಂಕಿ-ಅಂಶ ಇಂತಿದೆ...

ಉತ್ತರ ವಲಯ:

ಹಾನಿಯಾದ ರಸ್ತೆ, ಸೇತುವೆಗಳ ದುರಸ್ತಿಗೆ ಸಂಬಂಧಿಸಿದಂತೆ 1,016 ಕಾಮಗಾರಿಗಳ ಪೈಕಿ ಈವರೆಗೂ ಕೈಗೆತ್ತಿಕೊಂಡಿರುವ 724 ಕಾಮಗಾರಿಗಳು ಆರಂಭಿಕ ಹಂತದಲ್ಲಿವೆ. ಉಳಿದ 292 ಕಾಮಗಾರಿಗಳು ಇನ್ನೂ ಆರಂಭ ಆಗಿಲ್ಲ. ಅಂದಾಜು ₹ 3,017.43 ಕೋಟಿ ಹಾನಿಯಾಗಿದ್ದು, ₹ 227 ಕೋಟಿ ಮಾತ್ರ ಬಿಡುಗಡೆಯಾಗಿದೆ.

ದಕ್ಷಿಣ ವಲಯ:

ಒಟ್ಟು 667 ಕಾಮಗಾರಿಗಳ ಪೈಕಿ 384 ಕಾಮಗಾರಿಗಳನ್ನು ಮಾತ್ರ ಆರಂಭಿಸಲಾಗಿದ್ದು, ಇದರಲ್ಲಿ 133 ಮಾತ್ರ ಪೂರ್ಣಗೊಂಡಿವೆ. 256 ಕಾಮಗಾರಿಗಳು ಪ್ರಗತಿ ಹಂತದಲ್ಲಿದ್ದು, 278 ಕಾಮಗಾರಿಗಳು ಆರಂಭವೆ ಕಂಡಿಲ್ಲ. ಅಂದಾಜು ₹ 3,031.46 ಕೋಟಿ ನಷ್ಟ ಆಗಿದ್ದು, ದುರಸ್ತಿಗಾಗಿ ₹ 175 ಕೋಟಿ ಅನುದಾನ ನೀಡಲಾಗಿದೆ.

ಈಶಾನ್ಯ ವಲಯ:

ಈಶಾನ್ಯ ವಲಯದ 55 ಕಾಮಗಾರಿಗಳ ಪೈಕಿ 28 ಕಾಮಗಾರಿಗಳು ಆರಂಭವಾಗಿವೆ. ಇದರಲ್ಲಿ ಹಲವು ಪ್ರಗತಿ ಹಂತದಲ್ಲಿದ್ದು, ಅಂದಾಜು ₹ 40.15 ಕೋಟಿ ನಷ್ಟ ಉಂಟಾಗಿದೆ. ₹ 25 ಕೋಟಿ ಅನುದಾನ ನೀಡಲಾಗಿದೆ.

ಒಟ್ಟು ಕಾಮಗಾರಿ ಪ್ರಗತಿ ಹೀಗಿದೆ

ಮೂರು ವಲಯಗಳಲ್ಲಿನ ಒಟ್ಟು 1,738 ಕಾಮಗಾರಿಗಳ ಪೈಕಿ 1,131 ಕಾಮಗಾರಿಗಳು ಮಾತ್ರ ಆರಂಭಿಸಲಾಗಿದೆ. ಇದರಲ್ಲಿ 133 ಮಾತ್ರ ಪೂರ್ಣಗೊಂಡಿದ್ದು, 1,008 ಕಾಮಗಾರಿಗಳು ಪ್ರಗತಿಯಲ್ಲಿವೆ. ಇನ್ನೂ 597 ಕಾಮಗಾರಿಗಳ ಕೆಲಸವೇ ಆರಂಭಿಸಿಲ್ಲ. ರಾಜ್ಯಾದ್ಯಂತ ನೆರೆಗೆ ಅಂದಾಜು ₹ 6,089 ಕೋಟಿ ಮೊತ್ತದ ರಸ್ತೆ, ಸೇತುವೆಗಳು ಕೊಚ್ಚಿ ಹೋಗಿವೆ. ಇದಕ್ಕಾಗಿ ಸರ್ಕಾರ ₹ 427 ಕೋಟಿ ನೀಡಿದೆ.