ಬೆಂಗಳೂರು: ವಯೋವೃದ್ದರು, ಮಹಿಳೆಯರು, ಅಂಗವಿಕಲರನ್ನು ಟಾರ್ಗೆಟ್ ಮಾಡಿ ಸೈಟ್(ನಿವೇಶನ) ಕೊಡಿಸುವುದಾಗಿ ಹಾಗು ಮದುವೆಯಾಗುವುದಾಗಿ ನಂಬಿಸಿ ಮೋಸ ಮಾಡುತ್ತಿದ್ದ ಆರೋಪಿಯನ್ನು ಬಂಧಿಸುವಲ್ಲಿ ಉತ್ತರ ವಿಭಾಗದ ಡಿಸಿಪಿ, ಆರ್ಎಂ ಸಿ ಯಾರ್ಡ್ ಪೊಲೀಸರು ಯಶಸ್ವಿಯಾಗಿದ್ದಾರೆ.
ಗಣೇಶ್ ಅಲಿಯಾಸ್ ವಿಕ್ರಮ್ ಬಂಧಿತ ಆರೋಪಿ.
ಈತ ಬ್ರಾಹ್ಮಿ ಮ್ಯಾಟ್ರಿಮೋನಿಯಲ್ ವೆಬ್‌ಸೈಟ್‌ನಲ್ಲಿ ಪ್ರೊಫೈಲ್ ಹೊಂದಿದ್ದು, ಈ ವೇಳೆ ಹಲವಾರು ಯುವತಿಯರನ್ನು ನಂಬಿಸಿ ಮದುವೆಯಾಗಿದ್ದಾನೆ. ಇದೇ ರೀತಿ ಲಲಿತಾ ಎಂಬಾಕೆಯನ್ನು 2018 ರಲ್ಲಿ ವರಿಸಿರುವ ವಿಚಾರ ಗೊತ್ತಾಗಿದೆ. ಹೀಗೆ ನಂಬಿಸಿ ಮೋಸ ಮಾಡಿ ಮದುವೆಯಾಗುತ್ತಿರುವ ವಿಚಾರವನ್ನು ತಿಳಿದ ಲಲಿತಾ, ಆರ್ ಎಂಸಿ ಯಾರ್ಡ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ಹೀಗಾಗಿ ಆರೋಪಿಯನ್ನ ಪೊಲೀಸರು ಅರೆಸ್ಟ್ ಮಾಡಿದ್ದಾರೆ.
ವಿಚಾರಣೆ ವೇಳೆ ತನ್ನ ಹೆಸರು ಗಣೇಶ್ ಅಲಿಯಾಸ್ ವಿಕ್ರಮ್ ಎಂದೂ ಮೂಲತಃ ಮೈಸೂರು ನಗರದವನೆಂದು ಆರೋಪಿ ಹೇಳಿದ್ದಾನೆ. ಬ್ಯಾಂಕ್ಗಳಲ್ಲಿ ಲೋನ್ ಹಾಗೂ ಸೈಟ್ ಕೊಡಿಸುವ ಕೆಲಸ ಮಾಡಿಕೊಂಡು ವಯೋವೃದ್ಧರಿಗೆ, ವಿಧವೆಯರಿಗೆ, ಮತ್ತು ಅಸಹಾಯಕ ಹೆಣ್ಣು ಮಕ್ಕಳಿಗೆ ಮೋಸ ಮಾಡಿರುವ ವಿಚಾರ ಬೆಳಕಿಗೆ ಬಂದಿದೆ.
