ಬೆಂಗಳೂರು:ಪಿಎಸ್‌ಎಲ್‌ವಿ - ಸಿ50 ಉಡಾವಣಾ ವಾಹಕವು ಸಂವಹನ ಉಪಗ್ರಹವನ್ನು (ಸಿಎಂಎಸ್-01) ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ (ಎಸ್‌ಡಿಎಸ್‌ಸಿ) ಡಿಸೆಂಬರ್ 17ರಂದು ಉಡಾವಣೆ ಮಾಡಲಿದೆ.
ಎಸ್‌ಡಿಎಸ್‌ಸಿಯ ಶಾರ್‌ನ 2ನೇ ಲಾಂಚ್ ಪ್ಯಾಡ್‌ನಿಂದ (ಎಸ್‌ಎಲ್‌ಪಿ) ಈ ಉಪಗ್ರಹ ಉಡಾವಣೆಗೆ ಅಂದು ಮಧ್ಯಾಹ್ನ 3:41ಕ್ಕೆ ಸಮಯ ನಿಗದಿಪಡಿಸಲಾಗಿದೆ. ಪಿಎಸ್ಎಲ್ವಿಯ 52ನೇ ಉಪಗ್ರಹ ಇದಾಗಿದೆ. ಸಿಎಂಎಸ್-01 ಎಂಬುದು ಭಾರತದ 42ನೇ ಸಂವಹನ ಉಪಗ್ರಹ.
ಉಪಗ್ರಹ ಕಕ್ಷೆಯ ವಿಸ್ತೃತ-ಸಿ ಬ್ಯಾಂಡ್‌ನ ವ್ಯಾಪ್ತಿಗೆ ಬರುವ ಪ್ರದೇಶಗಳಿಗೆ ತರಂಗಗಳ ಸೇವೆ ಒದಗಿಸಲು ಕಲ್ಪಿಸಲಾದ ಸಂವಹನ ಉಪಗ್ರಹವೇ ಸಿಎಂಎಸ್-01. ಅದರ ವ್ಯಾಪ್ತಿಯಲ್ಲಿ ಭಾರತದ ಮುಖ್ಯ ಭೂ ಪ್ರದೇಶಗಳು, ಅಂಡಮಾನ್-ನಿಕೋಬಾರ್ ಮತ್ತು ಲಕ್ಷದ್ವೀಪ ದ್ವೀಪಗಳು ಬರಲಿವೆ.
ಪಿಎಸ್‌ಎಲ್‌ವಿ-ಸಿ50 ಆರು ಮೋಟಾರುಗಳೊಂದಿಗೆ ಸುಧಾರಿತ ಆವೃತ್ತಿಯ 'ಎಕ್ಸ್‌ಎಲ್' ಸಂರಚನೆ ಹೊಂದಿರುವ ಪಿಎಸ್ಎಲ್ವಿಯ 22ನೇ ಉಡಾವಣೆಯಾಗಿದೆ. ಅಲ್ಲದೇ, ಶ್ರೀಹರಿಕೋಟಾದಿಂದ ಉಡಾವಣೆಗೊಳ್ಳುತ್ತಿರುವ 77ನೇ ಉಡಾವಣಾ ವಾಹಕ ಇದಾಗಿದೆ.