ಕೋವಿಡ್ ಬಿಕ್ಕಟ್ಟು... ಗರ್ಭಿಣಿಯರಿಗೆ ಸರ್ಕಾರಿ ಆಸ್ಪತ್ರೆಗಳೇ ಆಪತ್ಬಾಂಧವ
ಲಾಕ್ಡೌನ್ ಹೇರಿದ್ದ ಸಂದರ್ಭದಲ್ಲಿ ಚಿಕಿತ್ಸೆಗಾಗಿ ನಾನಾ ಕಷ್ಟ ಅನುಭವಿಸಿದ್ದ ಗರ್ಭಿಣಿಯರಿಗಾಗಿ ಈಗ ಕೆಲವು ಸರ್ಕಾರಿ ಆಸ್ಪತ್ರೆಗಳನ್ನು ನಾನ್ ಕೋವಿಡ್ ಆಸ್ಪತ್ರೆಗಳನ್ನಾಗಿ ಪರಿವರ್ತಿಸಲಾಗಿದೆ. ಹೀಗಾಗಿ, ಆ ಆಸ್ಪತ್ರೆಗಳತ್ತ ಬರುವ ಗರ್ಭಿಣಿಯರ ಸಂಖ್ಯೆ ಹೆಚ್ಚಾಗಿದೆ.
ವಾಣಿವಿಲಾಸ ಆಸ್ಪತ್ರೆ
By
Published : Sep 2, 2020, 1:34 PM IST
ಬೆಂಗಳೂರು:ಕೊರೊನಾ ಲಾಕ್ಡೌನ್ ಸಂದರ್ಭದಲ್ಲಿ ಕೋವಿಡೇತರ ರೋಗಿಗಳು ಅನುಭವಿಸಿದ ಕಷ್ಟ ಅಷ್ಟಿಷ್ಟಲ್ಲ. ಅದರಲ್ಲೂ ಗರ್ಭಿಣಿಯರು ಪಾಡು ಯಾರಿಗೂ ಬೇಡ. ಎಷ್ಟೋ ಖಾಸಗಿ ಆಸ್ಪತ್ರೆಗಳು ಹೆರಿಗೆ ನೋವು ಕಾಣಿಸಿಕೊಂಡ ಗರ್ಭಿಣಿಯರಿಗೆ ಬೆಡ್ ಖಾಲಿ ಇಲ್ಲವೆಂದು ವಾಪಸ್ ಕಳುಹಿಸಿವೆ. ಗರ್ಭಿಣಿಯರು ತಿಂಗಳ ಚೆಕ್ಅಪ್ಗೆ ಸರ್ಕಾರಿ ಆಸ್ಪತ್ರೆಗಳ ಮುಂದೆ ಗಂಟಗಟ್ಟಲೇ ನಿಂತು ಗೋಳಾಟ ಅನುಭವಿಸಿದ್ದರು.
ಇದೀಗ ಹಂತ ಹಂತವಾಗಿ ಅನ್ಲಾಕ್ ಜಾರಿ ಮಾಡಲಾಗಿದೆ. ಹಾಗೆಯೇ ಕೋವಿಡ್ ಆಸ್ಪತ್ರೆಯಾಗಿ ಮಾರ್ಪಾಟು ಮಾಡಿದ್ದ ಕೆಲವು ಸ್ಪೆಷಾಲಿಟಿ ಆಸ್ಪತ್ರೆಗಳನ್ನು ನಾನ್ ಕೋವಿಡ್ ಆಸ್ಪತ್ರೆಗಳಾಗಿ ಪರಿವರ್ತಿಸಲಾಗಿದೆ. ಹೀಗಾಗಿ, ಲಾಕ್ಡೌನ್ನಲ್ಲಿ ನಾನಾ ತೊಂದರೆ ಅನುಭವಿಸಿದ್ದ ಕೋವಿಡೇತರ ರೋಗಿಗಳು ಮತ್ತು ಗರ್ಭಿಣಿಯರಿಗೆ ಈ ಮೂಲಕ ಅನುಕೂಲವಾಗಿದ್ದು, ವಾಣಿ ವಿಲಾಸ ಆಸ್ಪತ್ರೆಗೆ ಬರುತ್ತಿರುವ ಗರ್ಭಿಣಿಯರ ಸಂಖ್ಯೆ ಕಳೆದ ನಾಲ್ಕು ತಿಂಗಳಿಗೆ ಹೋಲಿಸಿದರೆ ಈಗ ಹೆಚ್ಚಾಗಿದೆ.
ಅನ್ಯ ಜಿಲ್ಲೆ-ರಾಜ್ಯಗಳಿಂದಲೂ ವಾಣಿವಿಲಾಸಕ್ಕೆ ರೋಗಿಗಳ ಆಗಮನ
ನಾನ್ ಕೋವಿಡ್ ಆಸ್ಪತ್ರೆಯಾದ ವಾಣಿವಿಲಾಸಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ರೋಗಿಗಳು ಆಗಮಿಸುತ್ತಿರುವ ಕುರಿತು ಈಟಿವಿ ಭಾರತದೊಂದಿಗೆ ಮಾತಾನಾಡಿದ ಆಸ್ಪತ್ರೆ ಆರ್ಎಂಒ ಡಾ.ಸಂತೋಷ್ ಪ್ರಭಾ, ಮೊದಮೊದಲು ಒಳ-ಹೊರ ರೋಗಿಗಳು ಆಸ್ಪತ್ರೆಗೆ ಬರಲು ಹಿಂಜರಿಯುತ್ತಿದ್ದರು. ಈಗ ಜನರಿಗೆ ಕೋವಿಡ್ ಬಗ್ಗೆ ತಿಳಿದಿದ್ದು, ಅಂಜಿಕೆಯಿಲ್ಲದೆ ಬರುತ್ತಿದ್ದಾರೆ ಎಂದರು.
ವಾಣಿವಿಲಾಸ ಆಸ್ಪತ್ರೆ ಆರ್ಎಂಒ ಡಾ.ಸಂತೋಷ್ ಪ್ರಭಾ
ಱಪಿಡ್ ಆ್ಯಂಟಿಜೆನ್ನಿಂದಾಗಿ ಕೂಡಲೇ ವರದಿ ಬರುವ ಕಾರಣ ನೆಗಟಿವ್ ಇದ್ದವರಿಗೆ ಚಿಕಿತ್ಸೆ ನೀಡಲಾಗುತ್ತದೆ. ಪಾಸಿಟಿವ್ ಬಂದರೆ ಕೋವಿಡ್ ಆಸ್ಪತ್ರೆಗೆ ಶಿಫ್ಟ್ ಮಾಡಲಾಗುತ್ತದೆ. ಅನ್ಯ ಜಿಲ್ಲೆ-ಹೊರ ರಾಜ್ಯಗಳಿಂದ ಹೆಚ್ಚಿನ ಸಂಖ್ಯೆಯಲ್ಲಿ ರೋಗಿಗಳು ಬರುತ್ತಿದ್ದಾರೆ. ಗಂಭೀರ ಸ್ಥಿತಿ ಪ್ರಕರಣಗಳಿಂದ ಹಿಡಿದು ಎಲ್ಲಾ ರೀತಿಯ ಶಸ್ತ್ರಚಿಕಿತ್ಸೆ ನಡೆಸಲಾಗುತ್ತಿದೆ ಎಂದು ಮಾಹಿತಿ ನೀಡಿದರು.
