ಬೆಂಗಳೂರು ಸಂಚಾರ ವ್ಯವಸ್ಥೆ ಸಮಸ್ಯೆಗಳಿಗೆ ಪರಿಹಾರವಿದ್ದರೆ ನಮ್ಮ ಗಮನಕ್ಕೆ ತನ್ನಿ: ಭಾಸ್ಕರ್ ರಾವ್

ರಾಜ್ಯ ರಾಜಧಾನಿ ಬೆಂಗಳೂರಿನ ಪ್ರಮುಖ ಜಂಕ್ಷನ್​ಗಳ ಅಭಿವೃದ್ಧಿಗೆ ರಚನಾತ್ಮಕ ಸಲಹೆ ನೀಡುವಂತೆ ನಗರ ಪೊಲೀಸ್ ಆಯುಕ್ತ ಭಾಸ್ಕರ್ ರಾವ್ ಮನವಿ‌‌ ಮಾಡಿದ್ದಾರೆ. ಜಂಕ್ಷನ್​ಗಳಲ್ಲಿ ಸವಾರರು ಅನುಭವಿಸುತ್ತಿರುವ ಸಮಸ್ಯೆ ಹಾಗೂ ಅಲ್ಲಿ ಕೈಗೊಳ್ಳಬೇಕಾದ ರಚನಾತ್ಮಕ ಕ್ರಮಗಳ ಬಗ್ಗೆ ಸಲಹೆ ನೀಡುವಂತೆ ಆಯುಕ್ತರು ಟ್ವೀಟ್​ ಮೂಲಕ ಕೇಳಿಕೊಂಡಿದ್ದಾರೆ.

ಬೆಂಗಳೂರು:ಟಾಫ್ರಿಕ್ ಜಾಂ ಸೇರಿದಂತೆ ಸಂಚಾರ ವ್ಯವಸ್ಥೆಯ ಸಮಸ್ಯೆಗಳ ಬಗ್ಗೆ ಪರಿಹಾರ ಕಂಡುಕೊಳ್ಳಲು ಸಾರ್ವಜನಿಕರು ಸಲಹೆ-ಸೂಚನೆ ನೀಡುವಂತೆ ಇತ್ತೀಚೆಗೆ ಮನವಿ‌ ಮಾಡಿದ್ದ ಬೆಂಗಳೂರು‌ ನಗರ ಪೊಲೀಸ್ ಆಯುಕ್ತ ಭಾಸ್ಕರ್ ರಾವ್, ಇದೀಗ ನಗರದ ಪ್ರಮುಖ ಜಂಕ್ಷನ್​ಗಳ ಅಭಿವೃದ್ಧಿಗೆ ರಚನಾತ್ಮಕ ಸಲಹೆ ನೀಡುವಂತೆ ನಗರ ವಾಹನ ಸವಾರರಲ್ಲಿ ಮನವಿ‌‌ ಮಾಡಿದ್ದಾರೆ.

40 ಸಂಚಾರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿರುವ ಪ್ರಮುಖ 40 ಜಂಕ್ಷನ್ ಗಳನ್ನು ಪಟ್ಟಿ‌ ಮಾಡಿ, ಇಲ್ಲಿ ಎದುರಿಸುತ್ತಿರುವ ಸಮಸ್ಯೆಗಳೇನು ? ಸುಗಮ ಸಂಚಾರಕ್ಕೆ ಯಾವ ರೀತಿ ಕ್ರಮ ಕೈಗೊಂಡರೆ ಸೂಕ್ತ ಎಂಬುದರ ಬಗ್ಗೆ ಸಾರ್ವಜನಿರು ತಮ್ಮದೇ ಆದ ಐಡಿಯಾಗಳನ್ನು ನೀಡಬಹುದಾಗಿದೆ. ಈಮೇಲ್, ಮೇಸೆಜ್ ಸೇರಿದಂತೆ ಬೆಂಗಳೂರು ನಗರ ಪೊಲೀಸ್ ಫೇಸ್​ಬುಕ್ ಪೇಜ್ ಹಾಗೂ ಟ್ವಿಟರ್​ನಲ್ಲಿ ನಿಮ್ಮ ಉಪಯುಕ್ತ ಸಲಹೆ- ಸೂಚನೆ ನೀಡಿ ಎಂದು ಆಯುಕ್ತರು ಟ್ವೀಟ್ ಮೂಲಕ ಮನವಿ‌ ಮಾಡಿಕೊಂಡಿದ್ದಾರೆ.

ಸಿಲ್ಕ್ ಬೋರ್ಡ್, ಚಾಲುಕ್ಯ ವೃತ್ತ, ಕಾರ್ಪೊರೇಷನ್ ಸರ್ಕಲ್, ಟಿ‌.ಸಿ.ಪಾಳ್ಯ ಸಿಗ್ನಲ್, ಶಿವಾನಂದ್ ವೃತ್ತ ಹಾಗೂ ಕೆ.ಆರ್.ಮಾರ್ಕೆಟ್ ಸೇರಿದಂತೆ ನಗರದ 40 ಜಂಕ್ಷನ್​ಗಳು ಸದಾ ವಾಹನ ದಟ್ಟಣೆಯಿಂದ ಕೂಡಿರುತ್ತದೆ. ಇನ್ನು ಬಿಗುವಿನ ಸಮಯದಲ್ಲಿ ವಾಹನ ಸವಾರರ ಗೋಳು ಹೇಳತೀರದು. ಜಂಕ್ಷನ್​ಗಳಲ್ಲಿ ಸವಾರರು ಅನುಭವಿಸುತ್ತಿರುವ ಸಮಸ್ಯೆ ಹಾಗೂ ಅಲ್ಲಿ ಕೈಗೊಳ್ಳಬೇಕಾದ ರಚನಾತ್ಮಕ ಕ್ರಮಗಳ ಬಗ್ಗೆ ಸಲಹೆ ನೀಡುವಂತೆ ಆಯುಕ್ತರು ಹೇಳಿದ್ದಾರೆ.