ರೈಲು ಬರುತ್ತಿದ್ದ ವೇಳೆ ಹಳಿ ದಾಟಿದ ಮಹಿಳೆ.. ಕೂದಲೆಳೆ ಅಂತರದಲ್ಲಿ ಪಾರು - ವಿಡಿಯೋ

ರೈಲು ಬರುತ್ತಿರುವ ವೇಳೆ ಯಾರೂ ಹಳಿ ದಾಟದಿರಿ, ಚಲಿಸುತ್ತಿರುವ ರೈಲಿನಿಂದ ಇಳಿಯದಿರಿ ಎಂದು ರೈಲ್ವೆ ಇಲಾಖೆ ಜಾಗೃತಿ ಮೂಡಿಸುತ್ತಿರುತ್ತದೆ. ಆದ್ರೆ ಕೆಲ ಪ್ರಯಾಣಿಕರು ನಿಯಮಗಳನ್ನ ಉಲ್ಲಂಘಿಸಿ ಅನಾಹುತ ಮಾಡಿಕೊಳ್ಳುತ್ತಾರೆ. ಇದೀಗ ಮಹಿಳೆಯೊಬ್ಬರು ಟ್ರೈನ್​ ಬರುತ್ತಿದ್ದ ವೇಳೆ ಹಳಿ ದಾಟಿ ಕೂದಲೆಳೆಯ ಅಂತರದಲ್ಲಿ ಪಾರಾದ ವಿಡಿಯೋ ಸಾಮಾಜಿ ಜಾಲತಾಣದಲ್ಲಿ ವೈರಲ್ ಆಗಿದೆ.

ಬೆಂಗಳೂರು: ಟ್ರೈನ್​ ಬರುತ್ತಿರುವ ವೇಳೆ ರೈಲು ಹಳಿ ದಾಟಲು ಯತ್ನಿಸಿದ ಪ್ರಯಾಣಿಕರ ಗುಂಪೊಂದು ಕೂದಲೆಳೆ ಅಂತರದಲ್ಲಿ ಪಾರಾದ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ವಿಡಿಯೋ ಗಮನಿಸಿದಾಗ, ಈಗಾಗಲೇ ಹಳಿ ಮೇಲೆ ನಿಂತಿರುವ ಒಂದು ರೈಲಿನಿಂದ ಇಳಿದ ಮಹಿಳೆ ಹಾಗೂ ಆಕೆಯ ಕುಟುಂಬಸ್ಥರು ಸಾಕಷ್ಟು ಲಗೇಜ್​ ಬ್ಯಾಗ್​ ಹಿಡಿದುಕೊಂಡು ಮತ್ತೊಂದು ಹಳಿ ದಾಟಲು ಪ್ರಯತ್ನಿಸುತ್ತಿರುತ್ತಾರೆ. ರೈಲು​ ಬರುತ್ತಿರುವುದನ್ನ ಗಮನಿಸಿದ ಒಂದಷ್ಟು ಮಂದಿ ಕೂಡಲೇ ಲಗೇಜ್ ಸಮೇತ ಮುಂದೆ ಓಡಿಹೋಗಿದ್ದಾರೆ. ಲಗೇಜ್‌ ಬ್ಯಾಗ್​ ಅನ್ನು ಹಳಿಯ ಮತ್ತೊಂದು ಬದಿಗೆ ಸಾಗಿಸಿದ ಮಹಿಳೆ ಮತ್ತೊಂದು ಲಗೇಜ್ ಹಾಗೂ ತನ್ನ ಪೋಷಕರನ್ನು ಕರೆತರಲು ಮತ್ತೆ ವಾಪಸ್​ ಬಂದಿದ್ದಾರೆ.

ರೈಲು ಬರುತ್ತಿರುವ ಬಗ್ಗೆ ತಿಳಿಸಿದರೂ ಸಹ ಓಡೋಡಿ ಬಂದಿದ್ದು, ಒಂದೇ ಕ್ಷಣದಲ್ಲಿ ರೈಲು ಮುಂದೆ ಸಾಗಿದೆ. ಕೂದಲೆಳೆಯ ಅಂತರದಲ್ಲಿ ಮಹಿಳೆ ಪಾರಾಗಿದ್ದಾರೆ. ಈ ಭಯಾನಕ ಘಟನೆ ಬೆಂಗಳೂರಲ್ಲಿ ನಡೆದಿದೆ ಎನ್ನಲಾಗ್ತಿದ್ದರೂ ಈ ಬಗ್ಗೆ ಯಾವುದೇ ನಿಖರ ಮಾಹಿತಿ ಇಲ್ಲ. ಆದ್ರೆ ವಿಡಿಯೋ ವೈರಲ್ ಆಗಿದ್ದು, ಲಕ್ಷಕ್ಕೂ ಅಧಿಕ ಮಂದಿ ವೀಕ್ಷಿಸಿದ್ದಾರೆ.

ಇದನ್ನೂ ಓದಿ: ಮದ್ಯದ ಗಮ್ಮತ್ತು.. ನಶೆಯಲ್ಲಿ ವಿದ್ಯುತ್ ಕಂಬ ಏರಿದ ವ್ಯಕ್ತಿ - ಮುಂದೇನಾಯ್ತು ವಿಡಿಯೋ ನೋಡಿ