ಪಾದರಾಯನಪುರದಲ್ಲಿ ಮತ್ತೊಂದು ಪಾಸಿಟಿವ್ ಕೇಸ್: ನಾಳೆಯಿಂದ 25 ಸಾವಿರ ಮಂದಿ ಪರೀಕ್ಷೆಗೆ ಚಾಲನೆ

ರ್ಯಾಂಡಮ್​ ಟೆಸ್ಟ್​ನಲ್ಲಿ ಪಾದರಾಯನಪುರದ 29 ವರ್ಷದ ಯುವಕನಿಗೆ ಕೊರೊನಾ ಪಾಸಿಟಿವ್​ ಇರುವುದು ತಿಳಿದುಬಂದಿದೆ.

ಬೆಂಗಳೂರು: ಪಾದರಾಯನಪುರದಲ್ಲಿ ಮತ್ತೊಂದು ಕೊರೊನಾ‌ ಪಾಸಿಟಿವ್ ಬಂದಿದ್ದು, 29 ವರ್ಷದ ಯುವಕನಿಗೆ ಸೋಂಕು ತಗುಲಿದೆ.

ರ್ಯಾಂಡಮ್​ ಟೆಸ್ಟ್​ನಲ್ಲಿ ಮತ್ತೊಂದು ಪಾಸಿಟಿವ್ ಪತ್ತೆಯಾಗಿದ್ದು, ಈ ಮೂಲಕ ಪಾದರಾಯನಪುರದಲ್ಲಿ ಸೋಂಕಿತರ ಸಂಖ್ಯೆ 44ಕ್ಕೆ ಏರಿಕೆ ಆಗಿದೆ. ಬೆಂಗಳೂರಿನಲ್ಲಿ ಈವರೆಗೂ 175 ಮಂದಿಗೆ ಸೋಂಕು ತಗಲಿದ್ದು, 86 ಮಂದಿ ಗುಣಮುಖರಾಗಿದ್ದಾರೆ. ಇದರಲ್ಲಿ‌ 82 ಜನ ನಿಗಧಿತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಬೆಂಗಳೂರಿನಲ್ಲಿ ನಿನ್ನೆಯದ್ದು ಸೇರಿ ಈವರೆಗೆ 7 ಮಂದಿ ಸಾವನ್ನಪ್ಪಿದ್ದಾರೆ.

ಇನ್ನು ನಾಳೆಯಿಂದ ಪಾದರಾಯನಪುರ ವಾರ್ಡ್​ನ 25 ಸಾವಿರ ಜನರಿಗೂ ಕೊರೊನಾ ಟೆಸ್ಟ್ ನಡೆಯಲಿದೆ. ‌ಪಾದರಾಯನಪುರದಲ್ಲಿ ಕೊರೊನಾ ಪಾಸಿಟಿವ್ ಹೆಚ್ಚಾದ ಬೆನ್ನಲ್ಲೇ, ಅಕ್ಕ ಪಕ್ಕದ ವಾರ್ಡ್ ಗಳಿಗೂ ತಲೆನೋವಾಗಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಪಾದರಾಯನಪುರ ಸುತ್ತಮುತ್ತಲಿನ 100 ಮೀಟರ್ ಅಂತರದ ವಾರ್ಡ್​ಗಳ ಜನರ ಟೆಸ್ಟ್ ಮಾಡಲು ಚಿಂತನೆ ನಡೆದಿದೆ. ಪೈಪ್ ಲೈನ್ ರೋಡ್ , ಟೆಲಿಕಾಂ ರೈಲ್ವೆ ರೋಡ್ ಗಳಲ್ಲೂ ಆಯ್ದ ಕಡೆ ಕೊರೊನಾ ಟೆಸ್ಟ್ ಮಾಡಲು ಬಿಬಿಎಂಪಿ ಹಾಗೂ ಆರೋಗ್ಯ ಇಲಾಖೆ ಮುಂದಾಗಿದೆ.