ಕೋವಿಡ್ ಸೋಂಕಿನಂತೆ ಸುಲಭವಾಗಿ ಪತ್ತೆಯಾಗಲ್ಲ ಈ ಒಮಿಕ್ರಾನ್..

ಒಮಿಕ್ರಾನ್​​ನಿಂದಲೇ ಸೋಂಕು ತಗುಲಿರುವುದನ್ನು ತಿಳಿಯಲು ಇರುವುದು ಒಂದೇ ಮಾರ್ಗ ಅಂದ್ರೆ ಸದ್ಯಕ್ಕೆ ಜೀನೋಮ್ ಸೀಕ್ವೆನ್ಸಿಂಗ್. ಆದ್ರೆ ಈ ಪರೀಕ್ಷಾ ವಿಧಾನ ಕೆಲ ಹಂತಗಳನ್ನು ಒಳಗೊಂಡಿದ್ದು, ವರದಿ ಕೊಡಲು ಕೆಲ ಸಮಯ ತೆಗೆದುಕೊಳ್ಳಲಿದೆ.

ಬೆಂಗಳೂರು: ಜನರಲ್ಲಿ ಒಮಿಕ್ರಾನ್ ಭೀತಿ ಹೆಚ್ಚಾಗಿದೆ.‌ ರಾಜ್ಯದಲ್ಲಿ ಸದ್ಯ ಇಬ್ಬರಿಗೆ ಒಮಿಕ್ರಾನ್ ಸೋಂಕು ದೃಢಪಟ್ಟಿದೆ‌. ಒಮಿಕ್ರಾನ್ ಸೋಂಕಿತರ ಸಂಪರ್ಕಿತದಲ್ಲಿದ್ದವರಿಗೂ ಕೋವಿಡ್​​ ಪಾಸಿಟಿವ್ ಬಂದ ಹಿನ್ನೆಲೆ, ಅವರ ಸ್ಯಾಂಪಲ್ಸ್​​ ಅನ್ನು ಜಿನೋಮ್ ಸೀಕ್ವೆನ್ಸಿಂಗ್​ಗೆ ಕಳಿಸಲಾಗಿತ್ತು. ಇದೀಗ ಅವರೆಲ್ಲರ ಪರೀಕ್ಷಾ ವರದಿ ನೆಗಟಿವ್ ಬಂದಿದೆ.

ಒಮಿಕ್ರಾನ್ ಅನ್ನು variant of concern ಅಂತ ವಿಶ್ವ ಆರೋಗ್ಯ ಸಂಸ್ಥೆ ಘೋಷಿಸಿದೆ. ಒಮಿಕ್ರಾನ್ ಸೋಂಕಿನ ಪರೀಕ್ಷೆ ಹೇಗೆ ಮಾಡಲಾಗುತ್ತೆ? ಕೋವಿಡ್​ಗಿಂತ ಒಮಿಕ್ರಾನ್ ಪರೀಕ್ಷೆ ಎಷ್ಟು ಭಿನ್ನವಾಗಿ ಇರಲಿದೆ? ಆರ್​​ಟಿ-ಪಿಸಿಆರ್ ಪರೀಕ್ಷೆಯಲ್ಲಿ ಒಮಿಕ್ರಾನ್ ಪತ್ತೆಯಾಗೋಲ್ವಾ? ಜಿನೋಮ್ ಸೀಕ್ವೆನ್ಸಿಂಗ್​​ ಪರೀಕ್ಷೆಯಲ್ಲೇ ಹೇಗೆ ಸೋಂಕು ಪತ್ತೆಯಾಗಲಿದೆ? ಹೆಚ್ಚಿನ ಸಮಯಾವಕಾಶ ಪಡೆದುಕೊಳ್ಳಲು ಕಾರಣವೇನು ಎಂಬ ಅನುಮಾನ ಬರುವುದು ಸಹಜ. ಇದ್ರ ಬಗ್ಗೆ ತಜ್ಞರು 'ಈಟಿವಿ ಭಾರತ'ದೊಂದಿಗೆ ಮಾಹಿತಿ ಹಂಚಿಕೊಂಡಿದ್ದಾರೆ.‌

ವೈದ್ಯರ ಮಾಹಿತಿ:

ಈ ಕುರಿತು ಮಾತಾನಾಡಿರುವ ರಾಜ್ಯ ಜಿನೋಮಿಕ್ ಸೀಕ್ವೆನ್ಸ್ ಸಮಿತಿಯ ತಜ್ಞ ವೈದ್ಯರಾಗಿರುವ ಡಾ. ವಿಶಾಲ್ ರಾವ್, ಜಿನೋಮಿಕ್ ಸೀಕ್ವೆನ್ಸ್ ಅನ್ನುವುದು ಸಾಮಾನ್ಯ ಪರೀಕ್ಷೆಯಂತೆ ಅಲ್ಲ. ಇತರೆ ಪರೀಕ್ಷೆಯಲ್ಲಿ ಮಾದರಿಯನ್ನು ಹಾಕಿದ ಕೂಡಲೇ ಫಲಿತಾಂಶ ಬಂದು ಬಿಡುತ್ತದೆ. ಆದರೆ ಜಿನೋಮಿಕ್ ಟೆಸ್ಟ್​​ನಲ್ಲಿ‌ ಅಷ್ಟು ಸುಲಭ ಇಲ್ಲ. ಸ್ಯಾಂಪಲ್ಸ್ ಸಂಗ್ರಹಿಸಿದಾಗಿನಿಂದ ಹಿಡಿದು ಲ್ಯಾಬ್​ಗೆ ಕಳುಹಿಸುವವರೆಗೆ ಗುಣಮಟ್ಟ ಪರೀಕ್ಷೆ ಮಾಡಬೇಕಾಗುತ್ತದೆ. ಸೀಕ್ವೆನ್ಸ್​​​ಗೆ ಕಳುಹಿಸಿದಾಗ ಭಾಗಶಃ ವರದಿ ಸಿದ್ಧವಿರುತ್ತದೆ. ಆದರೆ ಆ ವರದಿಯನ್ನು ಡಿಎನ್​ಎ ಲೈಬ್ರರಿ ಪ್ರಿಪ್ರೇಷನ್​ಗೆ ಕಳುಹಿಸಲಾಗುತ್ತದೆ. ಇದು ಎರಡು ದಿನಗಳ ಕಾಲ ಸಮಯ ತೆಗೆದುಕೊಳ್ಳುತ್ತದೆ. ಬಳಿಕ ಬಯೋ ಇನ್​ಫಾರ್​​ಮ್ಯಾಟಿಕ್​​ (bioinformatic) ಆಗಿರುವ ಕಂಪ್ಯೂಟರ್ ಅನಾಲಿಸಿಸ್​ಗೆ ಹೋದಾಗ ಅದು ಲಕ್ಷಾಂತರ ಜೀನ್​ಗಳನ್ನು ಪರಾಮರ್ಶಿಸಲಿದೆ.‌ ನಂತರ ಪ್ರೂಫ್ ರೀಡ್ ಮಾಡಿದ ಬಳಿಕವೇ ಒಮಿಕ್ರಾನ್ ಇದೆಯೋ ಇಲ್ವೋ ಅಂತ ಜಿನೋಮ್ ಸೀಕ್ವೆನ್ಸಿಂಗ್​​ನಲ್ಲಿ ತಿಳಿಯಲು ಸಾಧ್ಯ. ಇದು ಹತ್ತಾರು ಹಂತಗಳನ್ನು ದಾಟಿ ಬರಲಿದ್ದು, ಹೆಚ್ಚಿನ ಸಮಯ ತೆಗೆದುಕೊಳ್ಳಲಿದೆ ಎಂದು ತಿಳಿಸಿದರು.

ಇದನ್ನೂ ಓದಿ:ಬ್ರಿಟನ್​​​ನಿಂದ ಬೆಂಗಳೂರಿಗೆ ಬಂದ ಯುವಕನಿಗೆ ಕೋವಿಡ್​ ಪಾಸಿಟಿವ್​​

ಮಣಿಪಾಲ್ ಆಸ್ಪತ್ರೆಯ ರೋಗಶಾಸ್ತ್ರ ವಿಭಾಗದ ಮುಖ್ಯಸ್ಥರು ಹಾಗೂ ವೈದ್ಯರಾಗಿರುವ ಡಾ. ಸಂಜೀವ್ ಕತ್ತಿ ಪ್ರತಿಕ್ರಿಯಿಸಿ, ಜನರಲ್ಲಿ ಈಗ ಆರ್​ಟಿ-ಪಿಸಿಆರ್ ಪರೀಕ್ಷೆ ಒಮಿಕ್ರಾನ್ ಸೋಂಕು ಪತ್ತೆ ಮಾಡುತ್ತೋ ಇಲ್ವೋ ಎಂಬ ಚಿಂತೆ ಕಾಡುತ್ತಿದೆ. ಆದರೆ ಜನರು ತಿಳಿದುಕೊಳ್ಳಬೇಕಾದ ವಿಷಯ ಏನೆಂದರೆ, ಆರ್​ಟಿ-ಪಿಸಿಆರ್ ನಲ್ಲಿ ಒಮಿಕ್ರಾನ್ ಸೋಂಕು ಡಿಟೆಕ್ಟ್​​ ಆಗುತ್ತೆ, ಆದರೆ ಒಮಿಕ್ರಾನ್ ಸೋಂಕಿನಿಂದಲೇ ಸೋಂಕಿತರಾಗಿದ್ದಾರಾ ಅಂತ ಹೇಳಲು ಸಾಧ್ಯವಿಲ್ಲ. ಒಮಿಕ್ರಾನ್ ನಿಂದಲೇ ಸೋಂಕು ತಗುಲಿರುವುದನ್ನು ತಿಳಿಯಲು ಇರುವುದು ಒಂದೇ ಮಾರ್ಗ ಅಂದರೆ ಸದ್ಯಕ್ಕೆ ಜೀನೋಮ್ ಸೀಕ್ವೆನ್ಸಿಂಗ್. ಕೆಲವೊಂದು ಆರ್​ಟಿಪಿಸಿಆರ್ ಟೆಸ್ಟ್​ಗಳು ಮೂರು ಜೀನ್​​ಗಳನ್ನ ಪತ್ತೆ ಹಚ್ಚುತ್ತವೆ, ಈಗಿರುವ ಕೆಲ ಟೆಸ್ಟ್​ನಲ್ಲಿ ಎರಡು ಜೀನ್​ಗಳನ್ನು ಮಾತ್ರ ಪತ್ತೆ ಹಚ್ಚಲಿದೆ ಅಂತ ವಿವರಿಸಿದರು. ಒಮಿಕ್ರಾನ್​ನಲ್ಲಿ ಎಸ್ (S) ಜೀನ್ ಕಂಡು ಬಾರದೇ ಇದ್ದಾಗ ಸೋಂಕು ದೃಢಪಡುತ್ತದೆ‌‌. ಇದನ್ನು ಪರೋಕ್ಷವಾಗಿ ಅಂದಾಜಿಸಲಾಗುತ್ತದೆ ಅಂತ ತಿಳಿಸಿದರು.